༄༅། །ཕྱི་ལོ་ ༢༠༢༣ ཟླ་ ༧ ཚེས་ ༣ ནས་ཟླ་ ༧ ཚེས་ ༡༣ བར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་བོད་ལུགས་གསོ་བ་རིག་པ་དང་དེང་རབས་སྨན་ལུགས་ཟུང་འབྲེལ་ལས་གཞིའི་འོག་བོད་ཀྱི་གསོ་བ་རིག་པའི་སྨན་པ་རྣམས་ལ་དེང་རབས་སྨན་ལུགས་ངོ་སྤྲོད་ཟབ་འཁྲིད་ཅིག་སྦེལ་ཀོབ་ས་དགོན་མགྲོན་ཁང་དུ་གོ་སྒྲིག་ཞུས་ཤིང་། ཟབ་འཁྲིད་ཐོག་འགྲོ་ཕན་སྨན་རྩིས་ཁང་གི་ལྷོ་ཕྱོགས་ཁུལ་གྱི་བརྟག་དཔྱད་སྨན་པ་གྲངས་ ༩ དང་། དེ་བཞིན་ལྕགས་པོ་རི་དྲན་རྟེན་བོད་སྨན་སློབ་གཉེར་ཁང་གི་སྨན་པ། ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་བརྟག་དཔྱད་སྨན་པ། གསོ་རིག་འབུམ་བཞིའི་མཐོ་སློབ་སྨན་རི་གླིང་གི་བརྟག་དཔྱད་སྨན་པ་བཅས་ཁྱོན་སྨན་པ་གྲངས་ ༡༣ ཟབ་འཁྲིད་ཐོག་མཉམ་ཞུགས་གནང་ཡོད།

ཟབ་འཁྲིད་ཀྱི་བརྗོད་གཞི་གཙོ་བོ་ཁག་ནི་དེང་རབས་སྨན་ལུགས་ཀྱི་ལུས་ཀྱི་ཕུང་གྲུབ་དང་བྱེད་ལས། དེ་བཞིན་འཇུ་བྱེད་དང་དབང་རྩ་སོགས་ལུས་ཀྱི་མ་ལག་ངོ་སྤྲོད། སྤྱི་ཚོགས་ནང་ཁྱབ་གདལ་ཆེ་བའི་ནད་གཞི་ཁག་ངོ་སྤྲོད་དང་། དེ་དེག་སྨན་བཅོས་ཐབས་ལམ་སོགས་ཁྱོན་གཞུང་འཁྲིད་ཚོགས་ཐེངས་ ༢༠ དང་། ཕྱི་ལུགས་སྨན་གྱི་རིག་པ་ནས་ནད་པའི་ཁྲག་ལུད་དང་། གློག་དཔར་སྙན་ཤོག་ཀློག་ཐབས། གཞན་ཡང་ནད་པ་དྲན་མེད་བརྒྱལ་བའི་སྐབས་ཛ་དྲག་མྱུར་སྐྱོབ་སྨན་བཅོས། སྦྲུལ་དུག་དང་ཁྱིས་རྨས་པ། མེས་འཚིག་རྨ། གློག་འཁྱུད་པ་སོགས་ཛ་དྲག་མྱུར་སྐྱོབ་བྱེེད་སྒོའི་ཐོག་ལག་ལེན་དམར་འཁྲིད་ཀྱི་ཚོགས་ཐེངས་ ༡༠ བསྡོམས་ཁྱོན་ཉིན་གྲངས་བཅུའི་ནང་གསུང་བཤད་གནང་མཁན་མི་གྲངས་ ༢༣ ནས་བརྗོད་གཞི་འདྲ་མིན་གྲངས་༣༠ ཐོག་ཟབ་འཁྲིད་གནང་ཡོད། ཟབ་འཁྲིད་འདི་བཞིན་ཨ་རི་བོད་ཀྱི་ཐེབས་རྩ་བརྒྱུད་ཨ་རིའི་རོགས་ཚོགས་ (USAID)ནས་རོགས་དངུལ་ཞུས་ཐོབ་བྱུང་བ་ལས་གོ་སྒྲིག་ཞུས་པ་བཅས།།