༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༡༥ ཉིན་ལྷོ་སོག་ལྷན་ཚོགས་དང་། ཉི་འོང་སྐུ་ཚབ་དོན་ཁང་། ཐའི་ཝན་མང་གཙོའི་སློབ་གྲྭ་གསར་པ་མཉམ་སྦྲེལ་གྱི་གོ་སྒྲོག་འོག་ཕྱི་ལོ་ ༡༩༡༣ ལོའི་བོད་སོག་ཆིངས་ཡིག་བཞག་ནས་ལོ་ངོ་ ༡༡༠ འཁོར་བའི་དུས་དྲན་དང་བསྟུན་བོད་སོག་རིག་གཞུང་དང་ཆོས་ཕྱོགས་བགྲོ་གླེང་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་ཚོགས་འདུའི་ཐོག་མར་མི་ཧུ་ར་ཀོ་ཊ་རོ་(Miura Kotaro)ལགས་ནས་ཚོགས་བཅར་བ་རྣམས་ལ་ཕེབས་བསུའི་འཚམས་འདྲི་དང་ཚོགས་འདུའི་དམིགས་ཡུལ་ངོ་སྤྲོད་གནང་བ་མ་ཟད། ཚོགས་བཅར་བ་རྣམས་ནས་ཕྱི་ལོ་ ༡༩༡༣ ལོར་བོད་དང་སོག་པོ་བར་བཞག་པའི་ཆིངས་ཡིག་གི་ཁྲིམས་མཐུན་རང་བཞིན་སོགས་ཀྱི་སྐོར་དོ་སྣང་གནང་དགོས་པའི་རེ་སྐུལ་ཞུས།
སྐབས་དེར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་འདི་ལྟ་བུའི་ཚོགས་འདུ་ཞིག་གོ་སྒྲིག་གནང་བར་ཐུགས་རྗེ་ལེགས་འབུལ་ཞུས་པ་དང་འབྲེལ། བོད་དང་སོག་པའི་ལོ་རྒྱུས་དང་ཆོས་ཕྱོགས་ཀྱི་འབྲེལ་ལམ་སྐོར་ངོ་སྤྲོད་གནང་བ་དང་ཆབས་ཅིག་ཕྱི་ལོ་ ༡༩༡༣ ལོའི་བོད་སོག་ཆིངས་ཡིག་དེ་བོད་དང་སོག་པོ་ལོ་རྒྱུས་ཐོག་རང་བཙན་རྒྱལ་ཁབ་ཅིག་ཡིན་པའི་དཔང་རྟགས་ཡིན་སྐོར་གསལ་བཤད་གནང་ཡོད།
བགྲོ་གླེང་ཚོགས་འདུ་དེ་བཞིན་ཚོགས་ཐུན་གསུམ་དུ་དབྱེ་བ་ཕྱེས་ཏེ། ཚོགས་ཐུན་དང་པོའི་ནང་ཕྱི་ལོ་ ༡༩༡༣ ལོའི་བོད་སོག་མཛའ་འབྲེལ་ཆིངས་ཡིག་གི་གལ་གནད་སྐོར་དང་། ཚོགས་ཐུན་གཉིས་པའི་ནང་བོད་སོག་གི་ལོ་རྒྱུས་དང་རིག་གཞུང་འབྲེལ་ལམ་དང་དེའི་གལ་གནད་སྐོར། ཚོགས་ཐུན་གསུམ་པར་ད་ལྟའི་བོད་དང་སོག་པོའི་གནས་སྟངས་དང་། ཡོང་འགྱུར་བོད་སོག་མཉམ་འབྲེལ་བྱེད་ཕྱོགས་ཀྱི་སྐོར་བགྲོ་གླེང་ལྷུག་པོ་གནང་ཡོད། མཐར་ཀྲོག་ཡོ་གཙུག་ལག་སློབ་གཉེར་ཁང་གི་གཙུག་ལག་སློབ་དཔོན་ཨ་ཀོ་ཀྲོ་མོ་ཀོ་ལགས་ཀྱིས་མཁས་པ་རྣམས་ནས་གཙུག་ལག་སློབ་ཁང་གི་ཨེ་ཤི་ཡའི་གལ་ཆེའི་ལོ་རྒྱུས་གནད་དོན་ཐོག་བགྲོ་གླེང་གནང་བར་དགའ་ཚོར་ཆེན་པོ་བྱུང་ཚུལ་གསུངས།
ཐེངས་འདིའི་བགྲོ་གླེང་ཚོགས་འདུའི་ཐོག་སོག་པོ་དང་། ཐའི་ཝན། བོད་མིའི་མཁས་པ་བཅོ་ལྔ་མཉམ་ཞུགས་ཀྱིས་བོད་སོག་གི་ལོ་རྒྱུས་གནས་བབ་ཐོག་བགྲོ་གླེང་གནང་ཡོད་ཅིང་། ཕྱི་དྲིལ་བཀའ་བློན་མཆོག་གིས་མཁས་པ་རྣམས་ནས་གསུང་བཤད་དང་དཔྱད་རྩོམ་སྒྲོགས་སྦྱང་གནང་བར་བསྔགས་བརྗོད་དང་ཐུགས་རྗེ་ལེགས་འབུལ་ཞུས་ཡོད་པ་བཅས།། 
