༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༨ དང་ ༢༩ ཉིན་ཁེ་ན་ཊའི་ཕྱི་འབྲེལ་མི་སྣ་ཨི་སི་ཊི་ཕ་ནི་བྷར་གེ་རོན་ (Stefanie Bergeron) ལགས་དང་། ཀོ་ལིན་ཝེཊ་མོར་ (Colin Wetmore) ལགས་རྣམ་གཉིས་བཞུགས་སྒར་རྡ་རམ་ས་ལར་ཕེབས་འབྱོར་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་། བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་དང་མཇལ་མོལ་གནང་ཡོད།སྐབས་དེར་ཁེ་ན་ཊའི་ཕྱི་འབྲེལ་སྐུ་ཚབ་རྣམས་ལ་ཁེ་ན་ཊའི་ (Global Affairs Canada) རོགས་ཚོགས་ཀྱིས་མཐུན་འགྱུར་གནང་བཞིན་པའི་ལས་གཞི་ཁག་གི་གལ་གནད་དང། མ་འོངས་དམིགས་ཡུལ། གྲུབ་འབྲས་སྐོར་སྙན་སེང་ཞིབ་ཚགས་ཞུས་ཤིང་། དེ་རྗེས་ཁོང་རྣམས་མེས་དབོན་གཙུག་ལག་དཔེ་སྟོན་སློབ་གྲྭར་ཆེད་ཕེབས་སྐབས་སམ་བྷོ་ཊ་བོད་སློབ་ཚོགས་པའི་ངེས་སྟོན་པ་ཚེ་རིང་དོན་གྲུབ་ལགས་དང་། ངེས་སྟོན་པ་གཞོན་པ་བསྟན་འཛིན་ངག་སྒྲོན་ལགས། སློབ་སྤྱི་ལེགས་བཤད་ཉི་མ་ལགས། དགེ་ཆེ་བསྟན་འཛིན་ཆོས་སྒྲོན་ལགས་ཐེ་བའི་དགེ་ལས་སློབ་ཕྲུག་རྣམས་ནས་ཕེབས་བསུ་གཟབ་རྒྱས་ཞུས་ཏེ། སློབ་གྲྭའི་འཛིན་ཁང་དང་། དཔེ་མཛོད་ཁང་། མདུན་ལམ་སློབ་སྟོན་ཁང་དུ་གཟིགས་སྐོར་དང་བཅས་འཛིན་རིམ་བརྒྱད་པ་ནས་བཅུ་པ་བར་གྱི་སློབ་ཕྲུག་དང་ལྷན་དུ་ཞལ་བརྡ་གནང་ཡོད།

གཞན་ཡང་སྐབས་དེར་སྐུ་ཚབ་ཚོགས་ཆུང་ནས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། སྤྱི་ཚོགས་ཡར་རྒྱས་ཐེབས་རྩའི་འབྲེལ་ཡོད་ལས་བྱེད། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གྱིས་གཙོས་ལས་བྱེད་རྣམ་པ། བཞུགས་སྒར་དུ་རྟེན་གཞི་བྱས་པའི་གཞུངས་ཁོངས་མིན་པའི་ཚོགས་པ་ཁག་གི་སྐུ་ཚབ་ལྷན་མཇལ་མོལ་གནང་ཡོད་པ་བཅས།།