༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། སྤྱི་ནོར་༸གོང་༸སྐྱབས་མགོན་ཆེན་པོ་མཆོག་ནི། ཡངས་པའི་འཇིག་རྟེན་སྤྱི་དང་བྱེ་བྲག་གངས་རིའི་ལྗོངས་ཀྱི་བོད་མི་སྤྱི་བོ་གནམ་བསྟན་ཡོངས་ཀྱི་བླ་ན་མེད་པའི་དབུ་ཁྲིད་དང་།  འདི་ཕྱི་ཚེ་རབས་གཏན་གྱི་སྐྱབས་གནས་ཡིན་པའི་རྒྱུ་མཚན་གྱིས།  བཞུགས་སྒར་རྡ་རམ་ས་ལ་གཙོ་གྱུར།  བོད་མི་གནས་ཡུལ་ས་གནས་ཚང་མའི་ནང་རྣམ་པ་སྣ་ཚོགས་ཀྱི་སྒོ་ནས་༸སྐུའི་འཁྲུངས་སྐར་ལོ་ལྟར་སྲུང་བརྩི་ཞུ་གི་ཡོད་པ་བཞིན།  བྱང་ཨ་མེ་རི་ཀའི་བོད་མི་གནས་འཁོད་ས་གནས་ཁག་ཏུའང་ཡུལ་དུས་གནས་བབ་ལ་གཞིགས་ཏེ།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་གྱ་བརྒྱད་ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་ཡོད།  འདིར་སྐབས་སུ་བབ་པ་ས་གནས་ཁག་གཅིག་གིས་༸སྐུའི་འཁྲུངས་སྐར་སྔ་སྣུར་གྱིས་སྲུང་བརྩི་ཞུས་པའི་གནས་ཚུལ་སྙིང་བསྡུས་འགོད་རྒྱུར།  དེ་ཡང་ཟླ་བ་ ༧ ཚེས་ ༦ རེས་གཟའ་ཕུར་བུའི་ཉིན་བྱང་ཨ་རིའི་སྐུ་ཚབ་དོན་གཅོད་ཁང་དང་།  ཤ་ལྷོ་བསུ་དཔལ་བོད་རིགས་སྤྱི་མཐུན་ཚོགས་པ།  མལ་སི་ཆུ་སི་བོད་རིགས་སྤྱི་མཐུན་ཚོགས་པ།  མི་ནི་སོ་ཊ་བོད་རིགས་སྤྱི་མཐུན་ཚོགས་པ་བཅས་ནས་༸གོང་ས་མཆོག་དགུང་གྲངས་ ༨༨ ལ་ཕེབས་པའི་༸སྐུའི་འཁྲུངས་སྐར་དུས་ཆེན་སྔ་སྣུར་གྱིས་སྲུང་བརྩི་ཞུས།

ས་གནས་ཁག་ཚང་མར་༸སྐུའི་འཁྲུངས་སྐར་མཛད་སྒོ་གནང་སྟངས་གནང་ལུགས་དང་།  གཞི་རྒྱ་ཆེ་ཆུང་ཕྲན་བུ་མི་འདྲ་བ་ཡོད་ཀྱང་།  སྤྱིའི་ཆ་ནས་བཤད་ན།  ཐོག་མར་སྤྱི་མར་༸གོང་ས་༸སྐྱབས་མགོན་ཆེན་པོའི་བཞུགས་ཁྲིར་མལ་ཌན་རྟེན་གསུམ་འབུལ་བ་དང་།  རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ།  ས་གནས་ཚོགས་གཙོས་གལ་ཆེའི་སྐུ་མགྲོན་ཁག་ངོ་སྤྲོད་དང་།  ༸སྐུའི་འཁྲུངས་སྐར་དང་འབྲེལ་བའི་གསུང་བཤད།  ས་གནས་ཀྱི་ཕྱི་རྒྱལ་སྐུ་མགྲོན་དང་།  བོད་པའི་སྐུ་མགྲོན་ནས་༸སྐུའི་འཁྲུངས་སྐར་དང་འབྲེལ་བའི་གསུང་བཤད།  མངར་ཟས་གཅོད་བྲེག ༸གོང་ས་མཆོག་ལ་བསྟོད་དབྱངས་དང་།   རྣམ་ཐར་སོགས་ཐུན་མོང་མ་ཡིན་པའི་བོད་ཀྱི་རིག་གཞུང་འཁྲབ་སྟོན་གཟིགས་འབུལ།  ༸སྐུའི་མཛད་པ་དང་འབྲེལ་བའི་བརྙན་ཐུང་གཟིགས་འབུལ།  ༸སྐུའི་འཁྲུངས་སྐར་མཛད་སྒོ་དང་བསྟུན་ནས་བྱ་དགའ་གསོལ་རས་དང་གཟེངས་བསྟོད་འབུལ་བ་སོགས་ཀྱི་ལམ་ནས་སྲུང་བརྩི་ཞུ་གི་ཡོད།  

བྱང་ཨ་རི་སྐུ་ཚབ་དོན་གཅོད་ཁང་དང་།  རྒྱལ་སྤྱིའི་བོད་དོན་ལས་འགུལ་ཁང་།  རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པ་བཅས་ཐུན་མོང་ནས་སྐུ་ཚབ་དོན་གཅོད་ཁང་གི་ལས་ཁུངས་སུ་༸སྐུའི་འཁྲུངས་སྐར་མཛད་སྒོ་སྲུང་བརྩི་ཞུ་སར།  ཨ་རི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛ་ར་ཛེ་ཡ་ (Uzra Zeya)  མཆོག་དང་།  ཨ་རིའི་གྲོས་ཚོགས་འཐུས་མི་ཁག་གཅིག་གི་ལས་ཁུངས་ཀྱི་གནད་ཡོད་ལས་བྱེད།  ཕྱོགས་བཞུགས་སྤྱི་འཐུས།  རྒྱ་རིགས་བོད་དོན་རྒྱབ་སྐྱོར་བ།  རྒྱལ་སྤྱིའི་བོད་དོན་ལས་འགུལ་ཁང་གི་དབུ་འཛིན་སོགས་འབྲེལ་ཡོད་ལས་བྱེད།  བོད་སྐད་རླུང་འཕྲིན་ཁང་ཁག་གཉིས་ཀྱི་འགན་འཛིན།  ཆོས་ཚོགས་ཀྱི་སྐུ་ཚབ་སོགས་མཉམ་ཞུགས་གནང་ཡོད།  མལ་སི་ཆུ་སིའི་འཁྲུངས་སྐར་མཛད་སྒོར།  ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) ལགས་དང་།  མངའ་སྡེའི་གྲོས་ཚོགས་འོག་མའི་འཐུས་མི་ལིནྜ་སི་སཱ་བྷ་ཌོ་སཱ་ (Lindsay Sabadosa) ལགས།  ཌེ་ནི་ཡལ་ཀེ་རི་ (Daniel Carey) ལགས། ཀྲིས་ཌེན་ཨེ་ལེཀ་ཀོ་ (Kristen Elechko) ལགས།  དེ་བཞིན་མངའ་སྡེའི་བློན་ཆེན་མོ་ར་ཧི་ལི་ (Maura Healey) མཆོག་གི་ནུབ་བརྒྱུད་ལྟ་རྟོག་འགན་འཛིན། (the Western Mass Director for Governor Maura Healey) གྲོང་ཁྱེར་སྤྱི་ཁྱབ་ནི་ཀོ་ལི་ལ་ཆ་པལ་ (Nicole LaChapelle) ལགས། ཨེམ་ཧ་སི་གྲོང་རྡལ་གྲོས་ཚོགས་ཀྱི་ཚོགས་གཙོ་ (Lynn Griesemer, President of Amherst Town Council) ལགས། ཕྱོགས་བཞུགས་སྤྱི་འཐུས་དོན་གྲུབ་ཚེ་རིང་ལགས་བཅས་གདན་ཞུས་ལྟར་ཕེབས།མི་ནི་སོ་ཌའི་༸སྐུའི་འཁྲུངས་སྐར་མཛད་སྒོར་སྐུ་མགྲོན་དུ་ལོ་མང་ཞབས་ཞུ་གནང་མཁན་གཞུང་ཞབས་ཟུར་པ་དང་།  སྤྱི་ཟུར།  ས་གནས་ཀྱི་ཕྱི་རྒྱལ་སྐུ་མགྲོན་གྲས་སུ་ Representative Sandra Fiest, Anoka County Commissioner Mandy Meisner, Professor Norman Piatti, Professor Miriam Cameron and Michael Ormand ལགས་བཅས་ཕེབས་ཡོད།  ཤེས་རྟོགས་བྱུང་བར་གཞིགས་ན།  ལྕམ་སྐུ་ཨུ་ཛ་ར་ཛེ་ཡ་མཆོག་དང་།  ཨ་རིའི་གྲོས་ཚོགས་ཀྱི་འཐུས་མི་ཇིམ་མེག་གྷོ་ཝན་ལགས་སོགས་གནད་ཡོད་སྐུ་མགྲོན་ཚོའི་གསུང་བཤད་སྙིང་པོར་བསྡུས་ན།  ༸གོང་ས་མཆོག་གི་འཛམ་གླིང་ཞི་བདེར་སྨན་པའི་མཛད་ཆེན་ཁག་ལ་ཡི་རང་བསྔགས་བརྗོད་དང་།  ཨ་རི་གཞུང་དང་གྲོས་ཚོགས་ནས་འཚེ་མེད་ཞི་བའི་བོད་ཀྱི་བདེན་དོན་འཐབ་རྩོད་ལ་རྒྱབ་སྐྱོར་ཡོད་པ།  ༸གོང་ས་མཆོག་གིས་གཙོ་བོ་གནང་བའི་བོད་མི་རིགས་ཀྱི་རིན་ཐང་ལ་ཚད་མཐོའི་གདེང་འཇོག  བོད་ཀྱི་ཆོས་དང་རིག་གཞུང་།  མི་རིགས། ངོ་བོ་དང་བཅས་པ་སྲུང་སྐྱོབ་གནང་རྒྱུར་འགྱུར་བ་མེད་པའི་དམ་བཅའ་བརྟན་པོ་ཡོད་པ།  རྒྱ་ནག་གུང་ཁྲན་གཞུང་གིས་བོད་ནང་འཛིན་པའི་སྲིད་བྱུས་ནི་ནོར་འཁྲུལ་གྱི་སྲིད་བྱུས་ཡིན་པ་བཅས་ཀྱི་སྐོར་གསུང་འདུག  ས་གནས་མང་ཆེ་བར་རེས་གཟའ་སྤེན་པ་དང་ཉི་མ་གུང་གསེང་དང་བསྟུན་ནས་༸སྐུའི་འཁྲུངས་སྐར་སྲུང་བརྩི་གནང་གི་ཡོད་པ་ལྟར།  སྐབས་མཚམས་སུ་ས་གནས་ནས་བསྐུར་འབྱོར་བྱུང་བའི་གནས་ཚུལ་རྣམས་ཕྱོགས་སྒྲིག་གིས་མདོར་བསྡུས་འགོད་འབུལ་ཞུ་རྒྱུ་བཅས།  །