༄༅། །ཨོསྟྲེ་ལི་ཡཱ་དང་ནེའུ་ཛི་ལནྜ་གནས་སྡོད་རྒྱ་ནག་དམར་ཤོག་གཞུང་གི་འོག་གདུག་རྩུབ་མནར་གཅོད་མྱོང་མཁན་མཉམ་སྦྲེལ་ཚོགས་པས་སིཊ་ནི་གྲོང་ཁྱེར་གྱི་ཚོགས་ཁང་མདུན་དུ་ཕྱི་ལོ་ ༡༩༨༩ ལོའི་རྒྱ་ནག་གནམ་སྡེ་སྒོ་མོ་ཆེའི་དྲུག་བཞིའི་དོན་རྐྱེན་བྱུང་ནས་ལོ་ངོ་ ༣༤ ཧྲིལ་པོ་འཁོར་བའི་དུས་དྲན་སྲུང་བརྩིའི་ངོ་རྒོལ་སྐད་འབོད་གོ་སྒྲིག་ཞུས་ཡོད།
དུས་དྲན་ཐོག་རྒྱ་རིགས་ཕྱི་འབྲེལ་མི་སྣ་ཅེན་ཡོང་ལིང་ལགས་དང་། ཨོསྟྲེ་ལི་ཡཱ་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ཀྱིས་གསུང་བཤད་གནང་ཡོད་ཅིང་། སྐབས་དེར་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ཀྱིས་ཕྱི་ལོ་ ༡༩༨༩ ལོར་ལྷ་སར་བྱུང་བའི་ཞི་བའི་ངོ་རྒོལ་དང་། རྒྱ་གཞུང་གིས་བོད་མི་བརྒྱ་ཕྲག་དམར་གསོད་བཏང་བའི་གནས་ཚུལ་རྗེས་དྲན་དང་འབྲེལ། དེང་སྐབས་རྒྱ་ནག་གཞུང་གིས་བོད་ནང་མི་སེར་སྤེལ་ཡུལ་གྱི་གཏན་འཇགས་སློབ་གྲྭའི་ནང་བོད་ཕྲུག་བཙན་འཇུག་བྱེད་བཞིན་པ་དང་། བཙན་དབང་གིས་བོད་མིའི་རིགས་རྫས་དཔེ་མཚོན་བསྡུ་རུབ་བྱེད་བཞིན་པ་སོགས་བོད་ནང་གི་ཛ་དྲག་གནས་སྟངས་ངོ་སྤྲོད་གནང་ཡོད།
གཞན་ཡང་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ཨོསྟྲེ་ལི་ཡཱ་དང་ནེའུ་ཛི་ལནྜ་གནས་སྡོད་རྒྱ་ནག་དམར་ཤོག་གཞུང་གི་འོག་གདུག་རྩུབ་མནར་གཅོད་མྱོང་མཁན་མཉམ་སྦྲེལ་ཚོགས་པས་གོ་སྒྲིག་ཞུས་པའི་རྒྱ་ནག་མང་གཙོའི་ལས་འགུལ་དང་འབྲེལ་བའི་བགྲོ་གླེང་ཚོགས་འདུ་ལའང་མཉམ་ཞུགས་གནང་ཡོད་པ་བཅས།།
