༄༅། །འདི་གར་ཨོསྟྲེ་ལི་ཡཱ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༠༦ ཚེས་ ༠༣ ཉིན་ཨོསྟྲེ་ལི་ཡཱའི་མངའ་སྡེ་ (NSW) ནང་གི་ས་གནས་དཱི་ཝའི་ (DEE WHY) ཡི་དཔེ་མཛོད་ཁང་ནང་ཐེངས་དང་པོ་བོད་ཡིག་གི་དཔེ་དེབ་སྡེ་ཚན་ཞིག་གསར་འཛུགས་གནང་ཡོད།

དེ་ཡང་དེ་ཉིན་དཔེ་མཛོད་ཁང་གི་འགན་འཛིན་ཨོ་རི་ན་ཨེ་སེ་སེ་ཊོ་ (Orina Acenedo) ལགས་དང་། ས་གནས་ (Northern Beaches) གྲོང་སྡེའི་དཔེ་མཛོད་ཁང་གི་འགན་འཛིན་མེ་ཧ་ར་མ་སི་ཀྲིར་སོན་ (Maera Masterson) ལགས། ས་གནས་ (Northern Beaches) གྲོང་སྡེའི་སྤྱི་ཁྱབ་སུ་ཧི་ཧེན་ (Sue Heins) ལགས། ས་གནས་སིཌ་ཎི་བོད་རིགས་མཐུན་ཚོགས་ཀྱི་ཚོགས་གཙོ་དང་དྲུང་ཆེ། ས་གནས་ཀྱི་བོད་རིགས་དང་རིག་གནས་སྐྱེད་ཚལ་ཁང་གི་སློབ་མ་ཁག་གཅིག་བཅས་མི་གྲངས་བརྒྱ་ཙམ་བོད་ཡིག་གི་དཔེ་དེབ་སྡེ་ཚན་ཞིག་གསར་འཛུགས་ཀྱི་མཛད་སྒོར་མཉམ་བཞུགས་གནང་ཡོད། མཛད་སྒོའི་ཐོག་ས་གནས་ (Northern Beaches) གྲོང་སྡེའི་དཔེ་མཛོད་ཁང་གི་འགན་འཛིན་མེ་ཧ་ར་མ་སི་ཀྲིར་སོན་(Maera Masterson) ལགས་ཀྱིས་འདི་ལྟ་བུའི་ཨོསྟྲེ་ལི་ཡཱའི་མི་མང་གི་དཔེ་མཛོད་ནང་བོད་ཡིག་དཔེ་དེབ་ཕྱོགས་བསྡུ་བྱས་པ་ཐེངས་དང་པོ་ཆགས་ཡོད་པ་གསུངས་ཡོད།དེ་བཞིན་ས་གནས་ (Northern Beaches) གྲོང་སྡེ་སྤྱི་ཁྱབ་སུ་ཧི་ཧེན་ལགས་ཀྱིས་ཁོང་གི་ཁྱབ་ཁོངས་ས་གནས་ (DEE WHY) ཁུལ་བོད་སྐད་བེད་སྤྱོད་བྱེད་མཁན་མང་ཤོས་ལྔ་པ་དེ་ཆགས་ཡོད་པ་དང་།  ས་ཁུལ་དེར་བོད་མི་དང་ཡུན་རིང་ནས་འབྲེལ་ལམ་ཡོད་པ་གསུངས་ཡོད། གཞན་ཡང་མངའ་སྡེའི་དཔེ་མཛོད་ཁང་གི་འགན་འཛིན་ཨོ་རི་ན་ཨེ་སེ་སེ་ཊོ་ལགས་ཀྱིས་དཔེ་མཛོད་ཁང་ནང་བོད་ཡིག་དཔེ་དེབ་མི་འདྲ་བ་སྟོང་ཕྲག་གཅིག་ཙམ་ཕྱོགས་བསྡུས་བྱེད་འཆར་ཡོད་པ་དང་། ད་ལྟའི་ཆར་བོད་ཡིག་དཔེ་དེབ་བརྒྱད་བརྒྱ་ལྷག་ཉོ་སྒྲུབ་བྱས་ཟིན་པ་དང་། མ་འོངས་པར་བོད་པའི་ངོས་ནས་དཔེ་དེབ་ལྟ་ཀློག་བྱེད་མཁན་མང་པོ་བྱུང་ན་རྒན་བྱིས་བར་གསུམ་ཚང་མར་མཁོ་བའི་དཔེ་དེབ་མཁོ་སྒྲུབ་བྱ་རྒྱུ་ཡིན་པ་གསུངས་ཡོད།

སྐབས་དེར་སིཌ་ཎི་བོད་རིགས་མཐུན་ཚོགས་ཀྱི་ཚོགས་གཙོ་དང་དྲུང་ཆེ་ནས་ས་གནས་གྲོང་སྡེའི་སྤྱི་ཁྱབ་གཙོས་པའི་སྐུ་མགྲོན་རྣམས་ལ་ཐུགས་རྗེ་ཆེ་ཞུའི་མཇལ་དར་དང་། ༸གོང་ས་མཆོག་གིས་ལྗགས་རྩོམ་མཛད་པའི་ཕྱག་དེབ་རེ་ཕུལ་གནང་ཡོད། མཇུག་ཏུ་རིག་གནས་སྐྱེད་ཚལ་ཁང་གི་སློབ་མ་དང་ས་གནས་བོད་མི་རྣམས་ནས་བོད་ཀྱི་རིག་གཞུང་གཞས་སྣ་ཁག་གཅིག་གཟིགས་འབུལ་ཏེ་མཛད་སྒོ་མཇུག་སྒྲིལ་གནང་ཡོད་པ་བཅས།།