༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༡༣ ཉིན་ཨ་རིའི་རོགས་ཚོགས་ (USAID) ཀྱི་འཛིན་སྐྱོང་འགན་འཛིན་གཞོན་པ་ཨི་སོ་བེལ་ཀོལ་མན་ (Isobel Coleman) མཆོག་གིས་གཙོས་པའི་སྐུ་ཚབ་ཚོགས་ཆུང་ཞིག་བོད་མིའི་སྒྲིག་འཛུགས་སུ་ཆེད་ཕེབས་སྐབས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཕེབས་བསུའི་སྣེ་ལེན་གཟབ་རྒྱས་ཞུས་གནང་ཡོད་པ་རེད། དེ་ཡང་ཨ་རིའི་རོགས་ཚོགས་ཀྱི་འཛིན་སྐྱོང་འགན་འཛིན་གཞོན་པ་ཨི་སོ་བེལ་ཀོལ་མན་ (Isobel Coleman) མཆོག་དང་། འཛིན་སྐྱོང་ལས་རོགས་མ་ཧི་ཀལ་ཤུ་ཧི་ཕར་ (Michael Schiffer) ལགས། ཨ་རིའི་རོགས་ཚོགས་ཀྱི་རྒྱ་གར་ཁུལ་གྱི་ཆེད་གཉེར་དོན་གཅོད་ལས་ཚབ་ཀ་རེན་ཀི་ལི་མུ་སི་ཀི་ (Karen Klimowski) ལགས། འཛིན་སྐྱོང་འགན་འཛིན་གཞོན་པའི་དམིགས་བསལ་ལས་རོགས་ཨི་མི་ལི་གྷི་རིན་ (Emily Green) ལགས། ལས་བྱའི་གཙོ་འཛིན་གཞོན་པ་སོ་ན་ལི་ཀོར་ཊེ་ (Sonali Korde) ལགས། འཛིན་སྐྱོང་འགན་འཛིན་གཞོན་པའི་སློབ་སྟོན་པ་རྒན་པ་སོ་ཕི་ཡ་ལ་ལ་ནི་ (Sophia Lalani) ལགས་བཅས་ལས་གྲུབ་པའི་སྐུ་ཚབ་ཚོགས་ཆུང་ཞིག་བོད་མིའི་སྒྲིག་འཛུགས་སུ་ཆེད་ཕེབས་ཀྱིས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་ལྷན་མཇལ་མོལ་གནང་ཞིང་། དེ་རྗེས་ཕྱི་དྲིལ་བོད་ཀྱི་འགྲེམས་སྟོན་ཁང་དང་། བོད་ཀྱི་དཔེ་མཛོད་ཁང་དུ་གཟིགས་སྐོར་དང་། ཉིན་རྒྱབ་བོད་རིགས་གཞོན་སྐྱེས་ཁག་གཅིག་དང་ལྷན་མཇལ་མོལ་གནང་ཡོད་པ་བཅས།།