༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕེན་ལེནྚ་གྱི་སྲིད་བློན་གསར་པ་པེ་ཊི་རི་ཨོར་པོ་ (Petteri Orpo) མཆོག་ལ་མཚམས་འདྲི་མཛད་ཡོད། 

དེ་ཡང་མཚམས་འཕྲིན་ནང་མགོན་པོ་མཆོག་གིས། ངོས་རང་སྐུ་ཉིད་ཀྱི་མཛེས་སྡུག་ལྡན་པའི་རྒྱལ་ཁབ་ཏུ་ཐེངས་འགའ་ཤས་བསྐྱོད་རྒྱུའི་གོ་སྐབས་བྱུང་། སྐབས་དེར་ངོས་ཀྱིས་བྱམས་བརྩེ་གོང་འཕེལ་དང་། འགྲོ་བ་མིའི་རིགས་གཅིག་གྱུར་གྱི་འདུ་ཤེས་གོང་མཐོར་གཏང་རྒྱུ་མཚོན་པའི་ཆོས་ལུགས་མཐུན་འབྲེལ་ཆེད་འབད་རྩོལ་བྱེད་བཞིན་པར་ཕིན་ལེནྚ་མི་མང་རྒན་གཞོན་བར་གསུམ་གྱིས་དོ་སྣང་ཆེན་པོ་བྱེད་བཞིན་པར་སེམས་འགུལ་ཐེབས་བྱུང་། 

དེང་སྐབས་འཛམ་གླིང་ལ་དཀའ་ངལ་མང་དག་ཅིག་འཕྲད་བཞིན་ཡོད་པ་མ་ཟད། འཛམ་གླིང་ས་གནས་གང་སར་མི་མང་སྟོང་ཕྲག་མང་པོ་འཚེ་བའི་དམག་འཁྲུག་ལ་བརྟེན་ནས་སྡུག་བསྔལ་མྱོང་བཞིན་པ་མཐོང་དུས་སེམས་ལ་སྐྱོ་སྣང་ཡོང་གི་འདུག རྒྱལ་སྤྱི་མི་མང་ནས་དཀའ་རྙོག་དེ་དག་ཞི་བའི་ལམ་ནས་སེལ་ཐབས་སླད་འབད་འབུངས་ཧུར་སྐྱེད་གནང་དགོས་ལ། དེ་ལྟར་འཛམ་་གླིང་འདི་གོ་མཚོན་ལ་བརྟེན་ནས་བྱུང་བའི་དཀའ་ངལ་ལས་བྲལ་ཏེ་རང་དབང་ལྡན་པ་ཞིག་ཡོང་བའི་ཐབས་ལམ་གཅིག་པུ་ནི་གྲོས་མོལ་བྱེད་རྒྱུ་དེ་ཡིན། ཞེས་དང་། 

མཐར་མགོན་པོ་གང་ཉིད་མཆོག་གིས་སྲིད་བློན་པེ་ཊི་རི་ཨོར་པོ་མཆོག་གིས་ཕིན་ལེནྚ་མི་མང་གི་མངོན་འདོད་བསྒྲུབ་རྒྱུ་མཚོན་པའི་ཞི་བདེ་དང་བྱམས་བརྩེ་ལྡན་པའི་འཛམ་གླིང་ཞིག་བསྐྲུན་པར་འབྱུང་འགྱུར་འཕྲད་ངེས་པའི་དཀའ་ངལ་རྣམས་ལ་གདོང་ལེན་གནང་ཐུབ་པའི་ཐུགས་སྨོན་མཛད་ཡོད་པ་བཅས།།