༄༅། །ལྷོ་སྤྱི་ལས་ཁུངས་ཀྱི་ལས་དྲུང་བསྟན་འཛིན་ཚེ་འཕེལ་ལགས་དང་བདེ་སྲུང་འབྲེལ་མཐུད་པ་ཀུན་དགའ་ཡེ་ཤེས་ལགས་གཉིས་ནས་ཀརནཱ་ཊཀ་མངའ་སྡེའི་ས་ཁང་དང་གྲངས་ཉུང་མི་རིགས་ཀྱི་བདེ་དོན་ལས་ཁུངས་ཀྱི་བློན་ཆེན་སྐུ་ཞབས་ཛ་མིར་ཨེ་མཊ་ (B.Z. Zameer Ahmed) ལགས་དང་མཇལ་འཕྲད་གནང་ཡོད། སྐབས་དེར་བྱེས་ཀྱི་གདན་ས་བཀྲ་ཤིས་ལྷུན་པོ་དང་རྫོང་དཀར་ཆོས་སྡེའི་སྐུ་ཚབ་ཀྱང་ལྷན་བཅར་ཞུས་ཡོད་པ་རེད།

མཇལ་འཕྲད་སྐབས་བོད་མིའི་སྐུ་ཚབ་རྣམ་པས་གཞུང་འཛིན་གསར་པར་འཚམས་འདྲི་དང་སྦྲགས། བློན་ཆེན་མཆོག་ལ་སྟོན་པ་ཤཀྱཱ་ཐུབ་པའི་སྐུ་བརྙན་ཞིག་ཕྱག་རྟགས་སུ་ཕུལ་ཏེ། གྲངས་ཉུང་མི་རིགས་ཆེད་རོགས་དངུལ་དང་། བཀྲ་ཤིས་ལྷུན་པོ་དང་རྫོང་དཀར་ཆོས་སྡེ་གཉིས་ལ་འཕྲད་བཞིན་པའི་དཀའ་ངལ་ཐད་ཞུ་གཏུག་གནང་བར་བློན་ཆེན་མཆོག་གིས་དེ་དོན་དཀའ་སེལ་སླད་རྒྱབ་སྐྱོར་གནང་རྒྱུའི་ཞལ་བཞེས་བཟང་པོ་གནང་ཡོད།

གཞན་ཡང་བོད་མིའི་སྐུ་ཚབ་རྣམས་རྒྱ་གར་གཞུང་གིས་ཐུན་མོང་གི་ཁྲིམས་ཡིག་གཏན་འབེབས་ཆེད་སྤྱི་དམངས་ཀྱི་བསམ་ཚུལ་བསྡུ་ལེན་གྱི་ཚོགས་འདུར་མཉམ་ཞུགས་གནང་ཞིང་། ཚོགས་འདུའི་ཐོག་ཀརནཱ་ཊཀ་མངའ་སྡེའི་གྲངས་ཉུང་མི་རིགས་ལྷན་ཚོགས་ཀྱི་འགན་འཛིན་ཨབ་ཏུལ་ཨ་ཛིམ་ (Abdul Azeem) ལགས་ལྷན་ཞུགས་གནང་ཡོད་པ་བཅས།།