༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༠༧ ཉིན་རྒྱ་གར་གྱི་རྒྱལ་ས་ལྡི་ལིར་བཀའ་སྤྱི་ལྷན་རྒྱས་ནས་ཕྱི་རྒྱལ་གཞུང་ཚབ་མི་སྣ་ཁག་ཅིག་ལ་བོད་དོན་ཞུ་གཏུག་ལེགས་གྲུབ་བྱུང་རྗེས་གསར་འགོད་གསལ་བསྒྲགས་ཤིག་བསྐྱངས་ཡོད་པ་རེད།
དེ་ཡང་གསར་འགོད་གསལ་བསྒྲགས་ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཐེངས་འདིའི་བོད་དོན་ཞུ་གཏུག་ལས་རིམ་གྱི་དམིགས་ཡུལ་གཙོ་བོ་ནི་བོད་ནང་གི་ཛ་དྲག་གནས་སྟངས་སྐོར་སྙན་སེང་དང་། བོད་རྒྱའི་དཀའ་རྙོག་ཞི་འགྲིག་ཡོང་ཐབས་སླད་རྒྱབ་སྐྱོར་ཐོབ་ཐབས་གཙོ་བོ་ཡིན་པ་ལྟར། ཞུ་གཏུག་སྐབས་སྐུ་ཚབ་ཚོགས་ཆུང་ནས་བོད་ནང་གི་འགྲོ་བ་མིའི་ཐོབ་ཐང་གནས་བབ་དང་། རྒྱ་གཞུང་གིས་བོད་མིའི་ཆོས་དད་རང་དབང་དང་། བོད་ཀྱི་རང་འབྱུང་ཁོར་ཡུག་རྡོག་རོལ་གཏོར་སྐྱོན་གཏོང་བཞིན་པའི་སྐོར་སྙན་སེང་ཞུས་ཡོད་པ་མ་ཟད། གཞུང་ཚབ་རྣམ་པས་ཀྱང་བོད་ནང་རྒྱ་གཞུང་གིས་བོད་ཀྱི་ཆོས་དང་རིག་གཞུང་རྒྱ་ནག་ཅན་དུ་བསྒྱུར་ཐབས་རྩོམ་བཞིན་པ་དང་། ལྷག་པར་དུ་མི་སེར་སྤེལ་ཡུལ་གཏན་འཇགས་སློབ་གྲྭར་བོད་ཕྲུག་བཙན་འཇུག་བྱེད་བཞིན་པའི་ཁར། བོད་མིའི་རིགས་རྫས་དཔེ་མཚོན་བསྡུ་རུབ་བྱེད་པའི་ཛ་དྲག་གནས་སྟངས་ལ་ཐུགས་འཚབ་བསྟན་ཡོད་པའི་སྐོར་གསལ་བཤད་གནང་ཡོད།
གཞན་ཡང་སྤྱི་འཐུས་ཚོགས་གཙོ་མཆོག་གིས་བོད་རྒྱ་འབྲེལ་མོལ་ཡོང་ཐབས་སུ་རྒྱལ་སྤྱིའི་རྒྱབ་སྐྱོར་ཐོབ་ཐབས་ཐད་གཞུང་ཚབ་རྣམས་པར་འབོད་སྐུལ་གནང་ཡོད་པ་མ་ཟད། གཞུང་ཚབ་རྣམས་ནས་ཀྱང་བོད་མིའི་སྐུ་ཚབ་རྣམ་པའི་འབད་རྩོལ་ལ་བསྔགས་བརྗོད་དང་སྦྲགས། ཞུས་དོན་ཁག་སྲིད་གཞུང་སོ་སོར་སྙན་སེང་ཞུ་རྒྱུའི་ཞལ་བཞེས་གནང་བའི་ཐོག་ཁོང་རྣམས་ནས་བོད་རྒྱའི་དཀའ་རྙོག་ཞི་འགྲིག་ཡོང་བར་རྒྱབ་སྐྱོར་མུ་མཐུད་གནང་རྒྱུའི་ཞལ་བཞེས་བཟང་པོ་གནང་ཡོད་སྐོར་འགྲེལ་བརྗོད་གནང་ཡོད་པ་རེད།
ཕྱི་ལོ་ ༢༠༢༣ ཟླ་བ་ ༠༦ ཚེས་ ༠༥ ནས་ ༠༧ བར་བཀའ་སྤྱི་གཉིས་ཀྱི་སྐུ་ཚབ་ཚོགས་ཆུང་ནས་ཨ་རི་དང་། ཅེཀ་སྤྱི་མཐུན་རྒྱལ་ཁབ། ལི་ཐུ་ནི་ཡཱ། ཐའི་ཝན་འཚུད་པའི་རྒྱལ་ཁབ་བཅུ་བདུན་གྱི་གཞུང་ཚབ་ཆེན་པོ་དང་གཞུང་ཚབ་གཞོན་པ་ལྷན་མཇལ་འཕྲད་གནང་ཡོད་ཅིང་། བཀའ་སྤྱིའི་སྐུ་ཚབ་ཁོངས་སུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག དེ་བཞིན་སྤྱི་འཐུས་རྒྱུན་ལས་རྣམ་པ། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་བཅས་ཡོད་པ་བཅས།།
