༄༅། །ལ་སྤྱི་ལས་ཚབ་བསོད་ནམས་ཆོས་སྒྲོན་ལགས་ཀྱིས་རྒྱ་གར་གྲོས་ཚོགས་འོག་མའི་འཐུས་མི་འཇམ་དབྱངས་ཚེ་རིང་རྣམ་རྒྱལ་ལགས་དང་མཇལ་འཕྲད་ཀྱིས་བོད་མིའི་སྒྲིག་འཛུགས་དང་ལ་དྭགས་གནས་སྡོད་བོད་མི་རྣམས་ཀྱི་ཚབ་ཞུས་ཏེ་འཚམས་འདྲི་དང་སྦྲགས། དེ་སྔོན་ཕྱི་ཟླ་ ༠༥ ནང་གྲོས་ཚོགས་འཐུས་མི་འཇམ་དབྱངས་རྣམ་རྒྱལ་ལགས་བསོད་ནམས་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་བོད་མི་རྣམས་ནས་བདེ་སྡུག་ཞུས་དོན་ཁག་ཕྱོགས་བསྡོམས་ཀྱིས་སྙན་སེང་ཞུས་ཡོད། དེ་བཞིན་ཁོང་མོས་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་ལགས་དང་མཇལ་འཕྲད་ཞུས་ཐོག་ཁོང་གཉིས་ནས་ཕྱི་ལོ་ ༢༠༢༣ ཟླ་བ་ ༠༥ ཚེས་ ༡༢ ཉིན་ས་གནས་འཐུས་ཚོགས་ཀྱི་དམིགས་བསལ་ཚོགས་འདུའི་ཐོག་བོད་མིའི་བདེ་སྡུག་ཞུས་དོན་ཁག་གི་སྐོར་གྲོས་མོལ་གནང་ཡོད་པ་རེད། སྐབས་དེར་ལ་སྤྱི་ལས་ཚབ་ནས་ལ་དྭགས་གཞུང་ངོས་ནས་བསོད་ནམས་གླིང་བོད་མིའི་གཞིས་ཆགས་སུ་ཉི་འོད་ལ་བརྟེན་པའི་སྲང་ལམ་གྱི་གློག་དང་། གཞིས་གྲོང་ ༨ དང་ ༩ པར་ཏར་ཞུན་གཞུང་ལམ་བཟོ་རྒྱུ་གཙོས་པའི་མཐུན་རྐྱེན་སྦྱོར་སྤྲོད་གནང་བར་ཐུགས་རྗེ་ལེགས་འབུལ་ཞུས་པ་མ་ཟད། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་ལགས་དང་། གྲོང་གསེབ་ཡར་རྒྱས་ལས་ཁུངས་ཀྱི་འཛིན་སྐྱོང་འཐུས་མི་བཀྲ་ཤིས་རྣམ་རྒྱལ་ལགས་ནས་བོད་མི་འཁོས་ཞན་རྣམས་ཀྱི་ཁང་ཁྱིམ་བསྐྱར་བཟོ་གནང་བར་ཐུགས་རྗེ་ཆེ་ཞུས་ཡོད།

གཞན་ཡང་མཇལ་མོལ་སྐབས་ལ་སྤྱི་ལས་ཚབ་ནས་ལ་དྭགས་སུ་ཕྱི་ལོ་ ༢༠༡༤ ལོའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ལག་བསྟར་གནང་རྒྱུ་ཐེ་བའི་བོད་མིའི་བདེ་སྡུག་དང་འབྲེལ་བའི་གནད་དོན་ཁག་གཅིག་སྙན་སེང་ཞུས་ཡོད་པ་བཅས།།