༄༅། །མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༣ ཐོག་བོད་ནང་གི་མི་སེར་སྤེལ་ཡུལ་གཏན་འཇགས་སློབ་གྲྭའི་གནས་སྟངས་ཐེ་བའི་བོད་ནང་གི་ཛ་དྲག་གནས་སྟངས་སྐོར་གླེང་སློང་ཤུགས་ཆེ་གནང་ཡོད།
དེ་ཡང་ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༧ ཉིན་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཐུན་གྱི་དོན་ཚན་གསུམ་པའི་དགོངས་དོན་རྒྱལ་ཚོགས་ཀྱི་ཤེས་ཡོན་དང་འབྲེལ་བའི་དམིགས་བསལ་ཆེད་མཁས་པ་དང་ལྷན་དུ་གླེང་སློང་གནང་སྐབས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཨ་རིའི་གཞུང་ཚབ་མི་ཀེ་ལི་ཀྲེ་ལོར་ (Michele Taylor) མཆོག་གིས་རྒྱལ་ཚོགས་ཀྱི་ཤེས་ཡོན་དང་འབྲེལ་བའི་དམིགས་བསལ་འབྲེལ་མཐུད་པས་རྒྱ་ནག་གཞུང་གི་སྟངས་འཛིན་འོག་ཡོད་པའི་བོད་ནང་གི་མི་སེར་སྤེལ་ཡུལ་གཏན་འཇགས་སློབ་གྲྭའི་སྐོར་ཞིབ་འཇུག་གིས་ཞུ་གཏུག་དྲིལ་བསྒྲགས་གནང་བར་བསྔགས་བརྗོད་དང་སྦྲགས། མི་སེར་སྤེལ་ཡུལ་གཏན་འཇགས་སློབ་གྲྭ་དེ་དག་ཏུ་ལོ་ན་བཞི་ལ་སོན་པའི་ཕྲུ་གུ་ཐེ་བའི་བོད་ཕྲུག་ས་ཡ་གཅིག་ལྷག་བཙན་ཤེད་ཀྱིས་ཕ་མ་དང་ཁ་བྲལ་དུ་བཅུག་པ་ནི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་བ་ཆགས་ཡོད་ཅེས་གསུངས།
རྒྱལ་ཚོགས་ཀྱི་ཤེས་ཡོན་དང་འབྲེལ་བའི་དམིགས་བསལ་ཆེད་མཁས་པའི་ཤེས་ཡོན་ཐོབ་ཐང་ཐད་ཀྱི་སྙན་ཐོ་བཏོན་པར་དགའ་བསུ་དང་བཅས་འཇིགས་ཉེན་ཡོད་པའི་མི་རིགས་ལྷན་ཚོགས་ཀྱི་ཚབ་ཞུས་ཏེ་སུད་སི་དོན་ཁང་གི་རྒྱལ་ཚོགས་ཞུ་གཏུག་འགན་འཛིན་སྐལ་ལྡན་མཚོ་མོ་ལགས་ཀྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་རྒྱ་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གཏན་འཇགས་སློབ་གྲྭར་དོ་སྣང་གནང་དགོས་པའི་འབོད་སྐུལ་ཞུས་པ་མ་ཟད། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་ངོ་བོ་བཅས་པ་རྒྱ་ནག་ཅན་དུ་སྒྱུར་བར་ཤེས་ཡོན་ཆབ་སྲིད་ཀྱི་ལག་ཆར་བེད་སྤྱོད་ལོག་པ་གཏོང་གི་ཡོད་ཅེས་གསུངས།
དེ་བཞིན་ཁོང་མོས་བོད་ནང་རྒྱ་ནག་གཞུང་གིས་བོད་ཀྱི་རིག་གཞུང་དང་སྐད་ཡིག་སློབ་ཁྲིད་བྱེད་མཁན་སྒེར་གཉེར་སློབ་གྲྭ་ཁག་ཕྱིར་བསྡུ་བྱེད་བཞིན་པའི་སྐོར་དང་། ལོ་ན་དྲུག་ནས་བཅོ་བརྒྱད་བར་གྱི་བོད་ཕྲུག་ས་ཡ་གཅིག་ལྷག་མི་སེར་སྤེལ་ཡུལ་གཏན་འཇགས་སློབ་གྲྭར་བཙན་འཇུག་བྱེད་སྐོར་གསལ་སྟོན་དང་འབྲེལ། རྒྱལ་ཚོགས་ཀྱི་སྤྱི་ཚོགས་དང་། དཔལ་འབྱོར། རིག་གཞུང་ཐོབ་ཐང་ཚོགས་ཆུང་དང་། རྒྱལ་ཚོགས་ཀྱི་ཤེས་ཡོན་དང་འབྲེལ་བའི་དམིགས་བསལ་ཆེད་མཁས་པ་ཐེ་བའི་ཆེད་མཁས་པ་རྣམས་ནས་རྒྱ་ནག་གཞུང་ལ་མི་སེར་སྤེལ་ཡུལ་གཏན་འཇགས་སློབ་གྲྭ་ཕྱིར་བསྡུ་དང་བོད་ནང་སྒེར་གཉེར་སློབ་གྲྭ་འཛུགས་ཆོག་པའི་ཆོག་མཆན་སྤྲོད་དགོས་པའི་སྐུལ་བརྡ་བཏང་ཡོད་སྐོར་ནན་བརྗོད་གནང་ཡོད།
ཕྱོགས་མཚུངས་ཁོང་མོས་རྒྱ་ནག་གཞུང་གིས་ཞི་དྲག་ཐབས་ལམ་སྣ་ཚོགས་བརྒྱུད་ནས་བོད་མིའི་སྨྲ་བརྗོད་རང་དབང་ལ་དམ་བསྒྲགས་ཀྱིས་བོད་མིའི་འཚོ་བར་དྲག་གནོན་བྱེད་བཞིན་པར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་ཐུགས་ཁུར་བཞེས་དགོས་པའི་འབོད་སྐུལ་ཞུས། དེ་ལྟར་ཉེ་སྔོན་ཟླ་འདིའི་ཚེས་ ༢༢ ཉིན་རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ཀྱི་ལྷན་ཚོགས་ཐོག་ཏུའང་རྒྱ་གཞུང་གི་དབྱེ་འབྱེད་རང་བཞིན་ལྡན་པའི་སྲིད་བྱུས་ལག་བསྟར་གྱིས་བོད་ནང་གི་བུད་མེད་ཀྱི་འཚོ་བར་དོ་ཕོག་འགྲོ་བཞིན་པའི་གནས་སྟངས་སྐོར་གླེང་སློང་གནང་བ་མ་ཟད། སྐབས་དེར་སུད་སི་སྐུ་ཚབ་དོན་ཁང་དང་འཇིགས་ཉེན་ཡོད་པའི་མི་རིགས་ལྷན་ཚོགས་ཟུང་སྦྲེལ་གྱིས་ཟུར་ཚོགས་ཤིག་བསྐོང་ཚོགས་གནང་སྟེ་རྒྱ་ནག་གཞུང་གིས་བོད་ནང་བཙན་གནོན་མུ་མཐུད་གཏོང་བཞིན་པའི་གནས་སྟངས་གསལ་སྟོན་གནང་ཡོད་པ་བཅས།།
