༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༣ འཚོག་བཞིན་པ་དང་སྟབས་བསྟུན་སུད་སི་སྐུ་ཚབ་དོན་ཁང་དང་། འཇིག་ཉེན་ཡོད་པའི་མི་རིགས་སྲུང་སྐྱོབ་ལྷན་ཚོགས་གཉིས་ཟུང་སྦྲེལ་ཐོག་ཟུར་ཚོགས་ཤིག་བསྐོང་ཚོགས་གནང་སྟེ་རྒྱ་ནག་གཞུང་གིས་བོད་ནང་མུ་མཐུད་དྲག་གནོན་བྱེད་བཞིན་པ་གསལ་སྟོན་གནང་ཡོད་པ་རེད།
དེ་ཡང་ཟུར་ཚོགས་ཀྱི་གཙོ་སྐྱོང་འཇིག་ཉེན་ཡོད་པའི་མི་རིགས་སྲུང་སྐྱོབ་ལྷན་ཚོགས་ཀྱི་ཚོགས་མི་ཧ་ནོ་ཤི་ཊལ་ (Hanno Schedler) ལགས་ཀྱིས་གནང་ཐོག་སུད་སི་བོད་ཀྱི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་དང་། བོད་ཀྱི་ཆབ་སྲིད་བཙོན་ཟུར་ཕུན་ཚོགས་ཉི་སྒྲོན་ལགས། བོད་དོན་ཞུ་གཏུག་མཉམ་སྦྲེལ་གྱི་འབྲེལ་མཐུད་པ་གྷོ་ལོ་རི་ཡ་མོན་ཊོ་གོ་མི་རི་ (Gloria Montgomery) ལགས་བཅས་ནས་གསུང་བཤད་གནང་ཡོད།
སྐབས་དེར་སུད་སི་བོད་ཀྱི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས། མཉམ་འབྲེལ་རྒྱལ་ཚོགས་ནས་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་གནང་སྟེ་ད་བར་ལོ་ངོ་ ༧༥ འགྲོ་བཞིན་ཡོད་ཀྱང་། རྒྱ་ནག་གཞུང་གི་དབང་བསྒྱུར་འོག་བོད་ནང་ཆབ་སྲིད་ཀྱི་དྲག་གནོན་དང་། བོད་མིའི་ངོ་བོ་དང་རིག་གཞུང་སིམ་ཡལ་གཏོང་ཐབས་རྩོམ་བཞིན་པ། མི་རིགས་དབྱེ་འབྱེད། དཔལ་འབྱོར་བཤུ་གཞོག ཁོར་ཡུག་སོགས་གཏོར་བཤིག་ཚབས་ཆེ་བཏང་དང་གཏོང་བཞིན་པའི་སྐོར་དང་། དེ་བཞིན་རྒྱ་ནག་གཞུང་གི་བོད་ནང་དྲག་གནོན་ཅན་གྱི་སྲིད་བྱུས་མུ་མཐུད་ལག་བསྟར་བྱེད་པའི་སྐོར་ངོ་སྤྲོད་དང་འབྲེལ་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་དང་རྒྱལ་སྤྱིའི་ཚོགས་སྡེ་ཁག་ནས་རྒྱ་ནག་གཞུང་གིས་བོད་ནང་གཞི་རྩའི་རང་དབང་རྡོག་རོལ་གཏོང་མཚམས་ཡོང་སླད་ཤུགས་གནོན་ཡོང་བའི་འབོད་སྐུལ་ཞུས་འདུག
རྒྱ་ནག་གི་བཙོན་ཁང་དུ་དུས་ཡུན་རིང་ཤོས་བཙོན་འཇུག་གི་ཁྲིམས་ཆད་ཕོག་མཁན་བོད་ཀྱི་ཆབ་སྲིད་བཙོན་ཟུར་ཕུན་ཚོགས་ཉི་སྒྲོན་ལགས་ཀྱིས་ཕྱི་ལོ་ ༡༩༨༩ ནས་ ༢༠༠༤ བར་རྒྱའི་བཙོན་ཁང་ནང་དཀའ་སྡུག་ཇི་ཙམ་མྱངས་པའི་ལོ་རྒྱུས་ཀྱི་དཔང་རྟགས་ར་སྤྲོད་དང་འབྲེལ་བོད་ནང་གི་གནས་སྟངས་མུ་མཐུད་ཇེ་ཞན་ཇེ་སྡུག་ཏུ་འགྲོ་བཞིན་པའི་སྐོར་དང་། རྒྱལ་སྤྱིའི་ཚོགས་སྡེ་ཁག་ནས་བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་ཡོང་སླད་རྒྱབ་སྐྱོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནང་ཆིབས་སྒྱུར་སླད་རྒྱབ་སྐྱོར་ཡོང་བའི་རེ་སྐུལ་ཞུས་ཡོད།
བོད་དོན་ཞུ་གཏུག་མཉམ་སྦྲེལ་གྱི་འབྲེལ་མཐུད་པ་གྷོ་ལོ་རི་ཡ་མོན་ཊོ་གོ་མི་རི་གས་ཀྱིས། བོད་དོན་ལས་འགུལ་བསྟི་གནས་ཁང་གིས་ཕྱི་ལོ་ ༢༠༢༢ ལོར་བཏོན་པའི་སྙན་ཐོ་ལྟར་ན། རྒྱ་ནག་གཞུང་གིས་བོད་ནང་ལོ་ ༦ ནས་ ༡༨ ལ་སོན་པའི་བོད་པའི་སློབ་ཕྲུག་རྣམས་རང་གི་ཕ་མ་དང་སྤྱི་ཚོགས་ནས་ཁ་བྲལ་བཅུག་སྟེ་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བཙན་པོས་སློབ་འཇུག་བྱེད་བཞིན་པ་དང་། མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་འགྲིམས་བཞིན་པའི་ཕྲུ་གུའི་སེམས་ཁམས་འཕྲོད་བསྟེན་སོགས་ལ་དོ་ཕོག་ཡོང་སྲིད་པར་བརྟེན་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་ནས་རྒྱ་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཕྱིར་བསྡུ་བྱས་ཏེ་སྒེར་གཉེར་བོད་ཀྱི་སློབ་གྲྭ་གསར་འཛུགས་དགོས་པའི་འབོད་སྐུལ་གནང་ཡོད་པ་བཅས།།
