༄༅།།ཉེ་ལམ་མཇུག་བསྡུས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ཀྱི་རྒྱལ་སྤྱིའི་ལྷན་ཚོགས་ཀྱི་ཚོགས་ཐུན་ (International Convention on Elimination of Discrimination Against Women) བརྒྱད་ཅུ་གྱ་ལྔ་པའི་ཐོག་རྒྱལ་ཚོགས་ཀྱི་ཆེད་མཁས་པ་རྣམས་ནས་རྒྱ་ནག་གཞུང་གིས་བུད་མེད་སྤྱི་དང་། ཡང་སྒོས་བོད་ནང་གི་བུད་མེད་རྣམས་ལ་དབྱེ་འབྱེད་འགོག་ཐབས་ཐད་འདྲི་རྩད་དང་གླེང་སློང་ཤུགས་ཆེ་གནང་ཡོད།
དེ་ཡང་རྒྱལ་ཚོགས་ཀྱི་གཏན་འབེབས་བྱ་རིམ་ལྟར་ཕྱི་ལོ་ ༢༠༢༣ ཟླ་བ་ ༠༥ ཚེས་ ༠༨ ནས་ཟླ་དེའི་ཚེས་ ༢༦ བར་རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ཀྱི་རྒྱལ་སྤྱིའི་ལྷན་ཚོགས་ཀྱི་ཚོགས་ཐུན་གྱ་ལྔ་པ་བསྐོང་ཚོགས་གནང་ཡོད་པ་དང་། ཕྱི་ཚེས་ ༡༢ ཉིན་ཚོགས་ཆུང་གིས་རྒྱ་ནག་གི་དུས་མཚམས་དགུ་པའི་སྙན་ཐོར་ཞིབ་འཇུག་གནང་སྟེ། ཕྱི་ཚེས་ ༣༠ ཉིན་སྙན་ཐོའི་མཇུག་སྡོམ་རྟོགས་ཞིབ་བཏོན་པའི་ནང་རྒྱལ་ཚོགས་ཀྱི་ཚོགས་ཆུང་ངོས་ནས་བོད་ནང་གི་བུད་མེད་རྣམས་ལ་སྤྱི་མཚུངས་དྲང་བདེན་རྩོད་ས་མེད་པ་དང་། སློབ་གྲྭ་ཕྱིར་བསྡུ། མི་སེར་སྤེལ་ཡུལ་གྱི་གཏན་འཇགས་སློབ་གྲྭ་གསར་འཛུགས། བོད་ཀྱི་སྐད་ཡིག་ལ་དམ་བསྒྲགས། ཕྱིར་བསྐྱོད་ལག་ཁྱེར་བཙན་འཕྲོག ངལ་རྩོལ་སྒྱུར་བཀོད། བཙན་པོའི་གཉེན་སྒྲིག་སོགས་བོད་ནང་གི་ཛ་དྲག་གནས་སྟངས་སྐོར་ཐུགས་འཚབ་ཆེན་པོ་བསྟན་ཡོད།
རྒྱལ་ཚོགས་ཀྱི་ཚོགས་ཆུང་གིས་རྒྱ་ནག་གཞུང་གིས་ལག་བསྟར་བྱེད་བཞིན་པའི་ངལ་རྩོལ་སྒྱུར་བཀོད་དང་། ལག་ཤེས་སྦྱོང་བརྡར་ཞེས་པ་བརྒྱུད་བོད་ཀྱི་བུད་མེད་རྣམས་ལ་ཡོང་འབབ་ཞན་པའི་ལས་བཀོད་བྱེད་བཞིན་པར་ཐུགས་འཚབ་དང་སྦྲགས། འབྲེལ་ཡོད་རྒྱ་ནག་གཞུང་ནས་བོད་ནང་ངལ་རྩོལ་གནས་སྤོ་དང་ལག་ཤེས་སྦྱོང་བརྡར་ཞེས་པ་འཕྲལ་དུ་མཚམས་འཇོག་གིས་དོ་ཕོག་འགྲོ་ཡུལ་བོད་མི་རྣམས་དང་ལྷན་དུ་དོན་ཕན་ལྡན་པའི་འབྲེལ་མོལ་གོ་བསྡུར་བྱེད་དགོས་པའི་འབོད་སྐུལ་གནང་ཡོད། དེ་མ་ཟད་ཚོགས་ཆུང་ངོས་ནས་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་སྐད་ཡིག་ལ་གཅེས་སྲུང་གུས་བརྩི་དང་། བོད་མི་ཐེ་བའི་གྲངས་ཉུང་མི་རིགས་དང་ཆོས་ལུགས་ཐོག་དབྱེ་འབྱེད་བྱེད་མཚམས་འཇོག་དགོས་པའི་རེ་སྐུལ་གནང་ཡོད་པ་རེད།
ལྷག་པར་དུ་ཚོགས་ཆུང་ངོས་ནས་རྒྱ་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཕྱིར་བསྡུ་བྱས་ཏེ་བོད་ཀྱི་བུད་མེད་རྣམས་ལ་བོད་ཀྱི་སྐད་ཡིག་སྦྱོང་སྤྱོད་དང་། སྒེར་གཉེར་བོད་ཀྱི་སློབ་གྲྭ་ཁག་ལ་འཚོ་སྣོན་རོགས་རམ་བྱེད་དགོས་པ་མ་ཟད། བོད་མིའི་ཕྱིར་བསྐྱོད་ལག་ཁྱེར་བཙན་འཕྲོག་དང་འབྲེལ་ཏེ་ཚོགས་ཆུང་གིས་རྒྱ་གཞུང་ནས་གྲངས་ཉུང་མི་རིགས་གནས་བབ་ལ་གཞི་བཞག་སྟེ་ཕྱིར་བསྐྱོད་ལག་ཁྱེར་བཙན་འཕྲོག་བྱ་རྒྱུར་དོ་ནན་དགོས་པའི་ཐོག་རྒྱལ་ཁབ་བདེ་སྲུང་ཁྲིམས་ཡིག་འོལ་ཚོད་ཀྱིས་ལག་བསྟར་བྱས་ཏེ་ཕྱིར་བསྐྱོད་ལག་ཁྱེར་བཙན་འཕྲོག་རྒྱུ་མེད་པའི་ལམ་སྟོན་གནང་ཡོད། དེ་མ་ཟད་ཚོགས་ཆུང་གིས་བོད་མི་རྣམས་ནས་དྲང་བདེན་འཐབ་རྩོད་ཆེད་དཔལ་འབྱོར་དང་སྐད་ཡིག་ཐོག་དཀའ་ངལ་འཕྲད་བཞིན་པར་ཐུགས་འཚབ་ཤུགས་ཆེ་བསྟན་ཡོད་པ་རེད།
རྒྱལ་ཚོགས་ཀྱི་ཚོགས་ཆུང་ངོས་ནས་དེ་སྔོན་རྒྱ་གཞུང་ལ་དངོས་ཤུགས་བརྒྱུད་གསུམ་ནས་བུད་མེད་ལ་དབྱེ་འབྱེད་འགོག་ཐབས་བྱ་རིམ་ལག་བསྟར་ཚགས་ཚུད་དགོས་པའི་ལམ་སྟོན་གནང་བ་ལྟར། འདི་ལོར་སླར་ཡང་ཚོགས་ཆུང་གིས་རྒྱ་གཞུང་ངོས་ནས་བུད་མེད་ལ་དམིགས་པའི་དབྱེ་འབྱེད་འགོག་ཐབས་དམིགས་འཕེར་ལག་བསྟར་བྱ་དགོས་པའི་ནན་བརྗོད་གནང་ཡོད།
སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་མཉམ་འབྲེལ་རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ཀྱི་རྒྱལ་སྤྱིའི་ལྷན་ཚོགས་ཀྱི་སྙན་ཐོའི་མཇུག་སྡོམ་རྟོགས་ཞིབ་ལ་དགའ་བསུ་དང་འབྲེལ་ཚོགས་ཆུང་ལ་ཐུགས་ཆེ་ལེགས་འབུལ་ཞུས་པ་དང་ཆབས་ཅིག རྒྱལ་ཚོགས་ཀྱི་ཚོགས་ཆུང་ངོས་ནས་རྒྱ་ནག་གཞུང་ལ་བོད་ཀྱི་གནས་སྟངས་དང་འབྲེལ་ཏེ་ནུས་པ་ཆེ་ཞིང་དངོས་ཡོད་གནས་ཚུལ་དང་མཐུན་པའི་རྟོགས་ཞིབ་འབོད་སྐུལ་གནང་བ་དེ་ལས་རྒྱ་གཞུང་གི་དབང་སྒྱུར་འོག་བོད་ནང་གི་ཛ་དྲག་གནས་སྟངས་མཚོན་ཐུབ་པ་དང་། དེ་མཚུངས་རྟོགས་ཞིབ་གྲུབ་འབྲས་ལྡན་པ་ཡོང་བར་རྒྱ་གཞུང་གིས་རྒྱལ་སྤྱིའི་ཁྲིམས་ཡིག་ཁག་ལག་བསྟར་དོན་འཁྱོལ་དགོས་པའི་འབོད་སྐུལ་གནང་ཡོད་པ་རེད།
མཉམ་འབྲེལ་རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ཀྱི་རྒྱལ་སྤྱིའི་ལྷན་ཚོགས་ཀྱི་ཚོགས་ཐུན་གྱ་ལྔ་པར་བོད་ཀྱི་སྐུ་ཚབ་ཁོངས་སུད་སི་སྐུ་ཚབ་དོན་གཅོད་དང་། དབུས་བུད་མེད་ལྷན་ཚོགས་ཀྱི་ཚོགས་གཙོ། བོད་དོན་ཞུ་གཏུག་མཉམ་སྦྲེལ་བཅས་ཚོགས་ཞུགས་གནང་སྟེ་བོད་ནང་གི་ཛ་དྲག་གནས་སྟངས་སྐོར་ཡིག་ངག་གཉིས་ཐོག་ནས་གསལ་བཤད་གནང་ཡོད་པ་བཅས།།
