༄༅། །ཕྱི་ལོ་ ༢༠༢༣ ཟླ་ ༦ ཚེས་ ༡༠ དང་ ༡༡ ཉིན་ཧན་གྷི་རི་དུ་འཁྲབ་སྟོན་གཟིགས་འབུལ་ལེགས་གྲུབ་རྗེས་སུད་སི་སྐུ་ཚབ་དོན་གཅོད་ཁང་ནས་གདན་ཞུ་གནང་དོན་བཞིན་སུད་སིར་བཅའ་བཞུགས་ཟློས་ཟུར་མགོན་པོ་ལགས་དང་ཟློས་ཟུར་སྐྱིད་འཛོམས་ལགས། ཟློས་ཟུར་བདེ་ཆེན་ལགས་ཀྱི་ལྷག་བསམ་ཟོལ་མེད་ཀྱིས་སོ་སོའི་རྩ་ཆེ་དུས་ཚོད་བློས་གཏོང་བྱས་ཏེ་ཚོགས་པར་སྲི་ཞུ་བསྒྲུབ་རྒྱུའི་དམིགས་ཡུལ་བརྟན་པོ་བཅངས་ནས་ཐུགས་འགན་གཙོ་བཞེས་ཀྱིས་གོ་སྒྲིག་གནང་འབྲས་སུ་བོད་ཀྱི་ཟློས་གར་ཚོགས་པའི་དགེ་ལས་སྒྱུ་རྩལ་པ་ཁྱོན་ ༢༢ སུད་སིར་ཕྱི་ཚེས་ ༡༢ ནས་ ༢༠ བར་དངོས་སུ་ངོ་བཅར་བྱུང་བ་ནི་ལོ་ངོ་ཉི་ཤུའི་རྗེས་སླར་ཡང་དེ་གའི་མི་མང་དང་ལྷན་མཇལ་འཛོམས་ཀྱིས་ཕྱི་ཚེས་ ༡༧ ཉིན་  (Furstenlandsaal: Gossau SG)  ཚོགས་ཁང་ཆེན་མོའི་ནང་སྐུ་མགྲོན་གཙོ་བོ་རི་ཀོན་དགོན་པའི་མཁན་རིན་པོ་ཆེ་མཆོག་དང་། སུད་སི་སྐུ་ཚབ་དོན་གཅོད་ཀྱི་སྐུ་ཚབ། བོད་རིགས་ཚོགས་པའི་ཚོགས་གཙོ་དང་ལས་སྣེ་རྣམ་པ་གཙོས་པའི་རྒྱ་ཆེའི་བོད་རིགས་མི་མང་ལྔ་བརྒྱ་ལྷག་ཙམ་འདུ་འཛོམས་ཐོག་ལྷ་གཞུང་སྣང་ས་འོད་འབུམ་དང་རིག་གཞུང་གཞས་སྣ། ཨ་ཀ་མའི་དེང་དུས་རོལ་དབྱངས་གཟིགས་འབུལ་ཞུ་རྒྱུའི་གོ་སྐབས་བྱུང་བ་མ་ཟད། སུད་སིར་བོད་རིགས་ཚོགས་པའི་རིག་གཞུང་འགན་འཛིན་དང་ལས་སྣེ་ནས་རེ་བསྐུལ་ཞུས་དོན་ལྟར་དེ་ཁུལ་གནས་བཞུགས་བོད་རིགས་གཞོན་སྐྱེས་ཚོར་བོད་ཀྱི་ཐུན་མོང་མ་ཡིན་པའི་སྒྱུ་རྩལ་ལ་དོ་དབྱིངས་ཡོད་མཁན་ཁག་གཅིག་དང་བོད་ཀྱི་ཟློས་གར་ཚོགས་པའི་སྒྱུ་རྩལ་བའི་དབར་ཕན་ཚུན་བསམ་ཚུལ་བརྗེ་ལེན་དང་འཁྲབ་སྦྱོང་སོགས་སྒྱུ་རྩལ་ཤེས་མྱོང་གོ་བསྡུར་སྦྱངས་བཤད་དང་རྒྱུད་སྤེལ་བྱེད་རྒྱུའི་གོ་སྐབས་བྱུང་བ་དེས་མ་འོངས་མཐུན་འབྲེལ་གྱི་སྒོ་མོ་ཕྱེ་ཐུབ་པ་བྱུང་། འཁྲབ་སྟོན་སྐབས་བོད་རིགས་རྒྱ་ཆེའི་མང་ཚོགས་ནས་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ནས་བོད་ཀྱི་ཐུན་མོང་མ་ཡིན་པའི་ལྷ་གཞུང་དང་རིག་གཞུང་གཞས་སྣ་འཁྲབ་སྟོན་ཞུས་པར་ཐུགས་དགྱེས་ཚོར་ཆེན་པོས་དགའ་བསུ་དང་ཞལ་འདེབས་གནང་བར་བཀའ་དྲིན་ཆེ་ཞུ།   ད་རེས་ལོ་མང་རྗེས་སུད་སིར་དངོས་སུ་བཅར་ནས་བོད་ཀྱི་སྒྱུ་རྩལ་རིག་གཞུང་རྒྱ་ཆེའི་མང་ཚོགས་ཀྱི་སྤྱན་ལམ་དུ་གཟིགས་འབུལ་ཞུས་ཏེ་དམིགས་བསལ་བོད་རིགས་གཞོན་སྐྱེས་ཚོར་རྒྱུད་སྤེལ་ཞུ་ཐུབ་པ་ནི་གཙོ་བོ་སུད་སི་སྐུ་ཚབ་དོན་གཅོད་ལས་ཁུངས་ནས་མགྲོན་ཤོག་མཐུན་འགྱུར་དང་། སྒོས་སུ་དུས་ཚོད་ཐུང་ཐུང་ཞིག་གི་ནང་མཐོང་ཆེན་ལག་འཁྱེར་ཐོབ་སོན་སླད་ལྡི་ལི་སྐུ་ཚབ་དོན་ཁང་ནས་རྒྱབ་སྐྱོར་དང་དམིགས་བསལ་གོ་སྒྲིག་ཚོགས་ཆུང་གི་འགན་ཁུར་གཙོ་ཕལ་བཞེས་མཁན་ཡོངས་ནས་ལྷག་བསམ་རྣམ་དག་གིས་དུས་ཚོད་ཐུང་ངུའི་ནང་གོ་སྒྲིག་འཐུས་ཚང་དང་སྣེ་ལེན་གཟབ་རྒྱས་གནང་བའི་འབྲས་བུར་སོང་གོང་སྨྲོས་གོ་སྒྲིག་ཚོགས་ཆུང་གི་འགན་ཁུར་རྐང་བཞེས་གནང་མཁན་ཡོངས་དང་མཐུན་འགྱུར་གནང་མཁན་ཡོངས་ལ་རྗེས་སུ་ཡི་རང་དང་ཐུགས་རྗེ་ཆེ་ཞུ་རྒྱུ་ཡིན། །