༄༅། །ཕྱི་ལོ་ ༢༠༢༣ ཟླ་བ་ ༦ ཚེས་ ༡༡ ཉིན་ཧན་གྷི་རི་ནང་རྟེན་གཞི་བྱས་པའི་ཏཱར་ནང་བསྟན་ལྟེ་གནས་ཁང་གི་བླ་མ་ཆོས་འཕེལ་ལགས་ཀྱིས་གདན་ཞུས་ལྟར་དགོན་པ་གསར་པའི་མདུན་ཐང་དུ་བོད་ཀྱི་ཟློས་གར་ཚོགས་པའི་སྒྱུ་རྩལ་པ་རྣམས་ཀྱིས་སྟོན་པ་ཤཱཀྱ་ཐུབ་པའི་མཛད་རྣམ་ཆུ་ཚོད་གཅིག་རིང་གཟིགས་འབུལ་ཞུས་ཡོད་ཅིང་། གཟིགས་མོ་བར་མཚོན་ན་ནང་པ་སངས་རྒྱས་པའི་ཆོས་ལུགས་ལ་དད་མོས་དང་ནང་བསྟན་གཞུང་ལུགས་ལ་སློབ་སྦྱོང་བྱེད་མཁན་ཤ་སྟག་ཡིན་འདུག 
འཁྲབ་སྟོན་དབུ་འཛུགས་མ་ཞུས་གོང་ཧན་གྷི་རིའི་སྐད་སྒྱུར་བ་ཞིག་གིས་སྟོན་པའི་མཛད་རྣམ་ཧན་གྷི་རིའི་སྐད་ཡིག་ཐོག་ངོ་སྤྲོད་གནང་སྟེ་ཡུ་རོབ་ཁུལ་གྱི་གཟིགས་མོ་བ་བཞི་བརྒྱ་ལྷག་ཙམ་གྱིས་ཟློས་གར་གྱི་ནང་དོན་ཇི་ལེགས་གོ་རྟོགས་ཡོང་རྒྱུར་དམིགས་པ་དང་། ཧན་གྷི་རིའི་ཉེ་འཁོར་གནས་སྡོད་བོད་རིགས་འགའ་ཤས་ཀྱང་ཕེབས་འབྱོར་གནང་འདུག
གཟིགས་མོ་བས་འཁྲབ་སྟོན་མཇུག་མ་སྒྲིལ་བར་ལྷག་བསམ་རྣམ་དག་དང་སྤྲོ་སྣང་ཆེན་པོས་གཟིགས་ཤིང་། ལྟད་མོ་བ་མང་ཆེ་བས་བསོད་ནམས་ཆེན་པོ་ཡིན་སྙམ་ནས་འཁྲབ་སྟོན་མཇུག་བསྒྲིལ་རྗེས་སྐུ་བཞེངས་ཐོག་ཐལ་མོའི་རྡེབ་སྒྲས་ཁེངས། གཟིགས་མོ་བ་མང་པོ་ཞིག་གིས་སངས་རྒྱས་ཤཱཀྱ་ཐུབ་པའི་སྐུ་ཚེའི་རྣམ་ཐར་ཧ་ཅང་གི་མཛེས་སྡུག་ལྡན་པའི་ངང་ནས་རྒྱས་བཤད་དང་བདེ་སྡུག་གི་ཚོར་བ་འདྲེས་མ་འཕེལ་བ་བྱས་བྱུང་ཞེས་གསུངས།
འཁྲབ་སྟོན་སྐོར་སྐྱོད་དེ་ཉིད་ལེགས་གྲུབ་བྱུང་བ་ནི་སྒྱུ་རྩལ་བ་རྣམས་ཀྱི་བློས་གཏོང་དང་དཀའ་སྤྱད་འབད་འབུངས་ཀྱིས་སྙིང་རུས་འོག་དགེ་རྒན་དང་བོད་ཀྱི་ཟློས་གར་ཚོགས་པའི་རྒྱབ་རྟེན་གྱི་སྐུལ་ལྕག་ལས་བྱུང་བ་ཞིག་ཡིན་པ་དང་། ལྷག་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བྱིན་རླབས་ཉག་ཅིག་ལས་བྱུང་བ་ཞིག་ཡིན།
