༄༅། །རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་སྡེ་ཚན་གྱི་འགན་འཛིན་བུ་ཆུང་ཚེ་རིང་ལགས་ཀྱིས་རྒྱ་ནག་དམར་ཤོག་ཚོགས་པའི་སྲིད་དབང་སྒེར་འཛིན་ལ་གདོང་ལེན་གྱིས་བོད་ནང་རང་དབང་དང་མང་གཙོའི་ཆེད་སྐུ་ལས་ལྷོད་མེད་སྐྱོན་པར་ཆེ་བསྟོད་ངོས་འཛིན་དུ་དམར་ཤོག་ཚོགས་པའི་གདུག་རྩུབ་མྱོང་མཁན་ལྷན་ཚོགས་ཀྱིས་ཕྱི་ལོ་ ༢༠༢༣ ཟླ་བ་ ༠༦ ཚེས་ ༠༩ ཉིན་རྒྱལ་ཡོངས་མེ་ཏོག་ཞག་འཁོར་དུས་དྲན་ཐེངས་ ༡༦ པའི་ཐོག་ཀྲུ་མན་རེ་གྷན་རང་དབང་གི་གཟེངས་རྟགས་ (Truman-Reagan Medal of Freedom) དེ་བཞིན་ཁོང་ལ་ཕུལ་ཡོད་པ་རེད། ཀྲུ་མན་རེ་གྷན་རང་དབང་གི་གཟེངས་རྟགས་དེ་ནི་ཕྱི་ལོ་ ༡༩༩༩ ལོ་ནས་དབུ་འཛུགས་ཀྱིས་དམར་ཤོག་ཚོགས་པ་གཙོས་པའི་སྲིད་དབང་སྒེར་འཛིན་པར་གདོང་ལེན་གྱིས་རང་དབང་དང་མང་གཙོའི་ཆེད་སྐུ་ངལ་སྐྱོན་མཁན་གྱི་གང་ཟག་སྒེར་ལ་ཕུལ་སྲོལ་ཡོད་པ་ལྟར། དེ་སྔོན་གོང་སྨོས་གཟེངས་རྟགས་དེ་ཉིད་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ཝ་ཀེ་ལེབ་ཧ་ཝེལ་ (Vaclav Havel) མཆོག་དང་། པོ་ལེནྜ་ཡི་སྲིད་འཛིན་ཟུར་པ་ལེ་ཅ་ཝ་ལེ་ས་ (Lech Walesa) མཆོག ཨ་རིའི་གྲོས་ཚོགས་གོང་མའི་འཐུས་མི་ཀྲོམ་ལན་ཊོན་ (Tom Lantos) ལགས་དང་ཇེ་སི་ཧེ་ལེམ་ (Jesse Helms) ལགས་སོགས་ལ་ཕུལ་ཡོད།

ཨ་རིའི་གཞུང་ཚབ་དང་ཨ་རིའི་བོད་དོན་དམིགས་བསལ་འབྲེལ་མཐུད་པ་ཟུར་པ་པའུ་ལ་གྲོབ་རེན་ཀི་ (Paula J. Dobriansky) མཆོག་གིས་བུ་ཆུང་ཚེ་རིང་ལགས་ངོ་སྤྲོད་དང་འབྲེལ་གཟེངས་རྟགས་གནང་ཞིང་། མཛད་སྒོའི་ཐོག་གཞུང་ཚབ་ཁང་བཅུ་བཞིའི་གཞུང་ཚབ་ཆེན་མོ་དང་སྐུ་ཚབ་རྣམ་པ། ཨ་རི་གནས་འཁོད་ཡུ་རོབ་མཐུན་ཚོགས་ཀྱི་སྐུ་ཚབ་ཚོགས་ཆུང་། ཨ་རི་གནས་འཁོད་ཐའེ་ཝན་གྱི་དཔལ་འབྱོར་དང་རིག་གཞུང་སྐུ་ཚབ།  བྱང་ཨ་རི་བོད་ཀྱི་སྐུ་ཚབ་དོན་གཅོད། གཞན་ཡང་ཚོགས་སྡེ་ཁག་ལྔ་བཅུའི་སྐུ་ཚབ་ལྷན་ཞུགས་ཀྱིས་དམར་ཤོག་ཚོགས་པའི་གདུབ་རྩུབ་མྱོང་མཁན་རྣམས་ལ་གདུང་སེམས་མཉམ་སྐྱེ་ཞུས་ཡོད།

བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་རྣམ་གཉིས་མེ་ཏོག་ཞག་འཁོར་དུས་དྲན་ལ་ལྷན་ཞུགས་ཀྱིས་བུ་ཆུང་ཚེ་རིང་ལགས་སུ་གཟེངས་རྟགས་ཐོབ་པར་འཚམས་འདྲི་གནང་བ་མ་ཟད། གཞན་ཡང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་ཀྱིས་གཙོས་པའི་ལས་བྱེད་དང་། ཕྱི་ལོ་ ༢༠༢༣ ལོའི་གཞོན་སྐྱེས་འགོ་ཁྲིད་ལས་གཞིར་མཉམ་ཞུགས་པ་རྣམས་ཀྱང་ལྷན་ཞུགས་གནང་ཡོད་པ་བཅས།།