༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༠༨ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་བཞུགས་སྒར་རྡ་རམ་ས་ལའི་གངས་སྐྱིད་སྲིད་སྐྱོང་ཚོགས་ཁང་དུ་རྒྱ་ནག་དང་རྒྱལ་སྤྱིའི་ཆབ་སྲིད་འགྱུར་ལྡོག་ཁྲོད་རེ་བ་དང་གདོང་ལེན་ཞེས་པའི་རྒྱལ་སྤྱིའི་རང་བཞིན་ལྡན་པའི་ཚོགས་འདུའི་དབུ་འབྱེད་གནང་ཡོད་པ་རེད།
ཚོགས་འདུའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གཙོ་བཞུགས་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་། ཐའེ་ཝན་དང་། ཧོང་ཀོང་། ཡུ་གུར། ལྷོ་སོག མན་ཇུ། དེ་བཞིན་ཨ་རི་དང་ལྷོ་ཀོ་རི་ཡའི་རྒྱ་རིགས་བཅས་ཀྱི་སྐུ་ཚབ་དང་ཚོགས་བཅར་བ་སོགས་ལྷན་ཞུགས་ཀྱིས་རྒྱ་ནག་ནང་གི་ཆབ་སྲིད་གནས་སྟངས་དང་། དབང་བསྒྱུར་དྲག་གནོན། འགྲོ་བ་མིའི་ཐོབ་ཐང་གི་གནས་བབ། རྒྱ་ནག་དམར་ཤོག་གཞུང་ལ་གདོན་ལེན་བྱེད་ཕྱོགས་སོགས་ཀྱི་ཐད་དགོངས་ཚུལ་གསུངས་ཡོད།
སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འཛམ་གླིང་ཕྱོགས་མཐའ་ཁག་ནས་ཕེབས་པའི་ཚོགས་བཅར་བ་རྣམས་ལ་འཚམས་འདྲིའི་ཕེབས་བསུ་དང་འབྲེལ་ཚོགས་བཅར་བ་ཡོངས་རྫོགས་རྒྱ་ནག་དམར་ཤོག་གཞུང་གི་དབང་བསྒྱུར་གཉའ་གནོན་མྱོང་མཁན་གཅིག་མཚུངས་ཡིན་པའི་ཆ་ནས་ཐུན་མོང་གི་ཁ་གཏད་ལ་ཕྱར་གྲུ་མཉམ་འདེགས་ཀྱིས་གདོང་ལེན་གནང་དགོས་པ་དང་། དེའི་ཆེད་དང་ཐོག་མི་རིགས་ཚོགས་སྡེ་ནང་ཁུལ་འཆམ་མཐུན་ཆིག་སྒྲིག་དགོས་རྒྱུ་གལ་གནད་ཆེན་པོ་ཡིན་པ་ལྟར། རྒྱ་ནག་དམར་ཤོག་གཞུང་གི་གདུག་རྩུབ་མྱོང་མཁན་ཐུན་མོང་བ་ཕན་ཚུན་མཐུན་ལམ་ཆིག་སྒྲིལ་ཐོག་མཉམ་སྦྲེལ་གྱིས་ལས་འགུལ་སྤེལ་རྒྱུ་ནི་དུས་ཀྱི་དགོས་མཁོ་ཡིན་པ་མ་ཟད། མཉམ་སྦྲེལ་གྱིས་རྒྱ་ནག་དང་རྒྱལ་སྤྱིའི་ཆབ་སྲིད་ཀྱི་འཕོ་འགྱུར་ལ་དོ་སྣང་རྒྱུས་ལོན་བྱས་ཏེ་གོ་སྐབས་དམ་འཛིན་གནང་དགོས་པའི་ཁར། ལྷག་པར་ཐེངས་འདིའི་ཚོགས་འདུ་ནང་བསམ་གྲོས་ཞིབ་སྡུར་གནང་འབྲས་སུ་རྒྱ་ནག་ལ་གདོང་ལེན་བྱེད་ཐབས་ལས་འགུལ་སྤེལ་ཕྱོགས་ཇི་དགེའི་ཐད་གནད་དུ་སྨིན་པའི་འཆར་གཞི་འཆར་འགོད་གནང་དགོས་པའི་ལམ་སྟོན་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་འོག་བཙན་བྱོལ་ནང་དུ་བོད་མིའི་སྒྲིག་འཛུགས་སླར་གསོ་ཐུབ་ཚུལ་དང་། དེའི་སྒྲོམ་གཞི་དང་ལས་དོན་བྱེད་ཕྱོགས་སྐོར་ངོ་སྤྲོད་དང་འབྲེལ། ད་ལྟའི་ཆར་བོད་མིའི་སྒྲིག་འཛུགས་ཀྱི་གཞུང་འབྲེལ་སྲིད་བྱུས་དབུ་མའི་ལམ་གཞིར་བཞག་ཐོག་ཐབས་བྱུས་ལ་འགྱུར་བ་ཕྲན་བུ་བཏང་སྟེ་ལོ་རྒྱུས་ཐོག་བོད་རང་བཙན་ཡིན་པའི་གནས་བབ་སྐོར་ནན་བརྗོད་གནང་བཞིན་པའི་སྐོར་འགྲེལ་བརྗོད་དང་། དེ་ལས་འཕྲོས་ཏེ་རྒྱ་ནག་གི་བྱེད་ཕྱོགས་ལ་བསམ་གཞིག་གིས་ཕྱིའི་རྒྱལ་ཁབ་ཁག་ནས་རྒྱ་ནག་དང་ཚོང་འབྲེལ་བྱེད་སྐབས་དོ་གཟབ་གནང་དགོས་པའི་ཉེན་བརྡ་གནང་ཡོད།
ཚོགས་འདུའི་དབུ་འབྱེད་མཛད་སྒོ་གྲུབ་མཚམས་དངོས་གཞིའི་ཚོགས་འདུ་ས་རཱ་བོད་ཀྱི་མཐོ་སློབ་ཏུ་འཚོག་རྒྱུ་ཡིན་ཞིང་། ཉིན་གྲངས་གཉིས་རིང་གི་ཚོགས་འདུའི་ནང་ཨ་རི་དང་། ཧོང་ཀོང་། ཐེའི་ཝན། ལྷོ་ཀོ་རི་ཡ། སོག་པོ་བཅས་ནས་ཚོགས་བཅར་བ་གྲངས་ལྔ་བཅུ་ལྷག་ཕེབས་ཞུགས་གནང་ཡོད་ལ། སྐབས་དེར་ཚོགས་བཅར་བ་རྣམས་ནས་༸གོང་ས་ཏཱ་ལའི་བླ་མ་སྐུ་ཕྲེང་རིམ་བྱོན་དང་། རྒྱ་ནག་གི་མིང་། ཆིང་། མི་སེར་རྒྱལ་ཁབ། རྒྱ་ནག་དམར་གཞུང་བཅས་བར་གྱི་ཆོས་ལུགས་ཀྱི་འབྲེལ་བའི་སྐོར་དང་། གདུག་རྩུབ་སྲིད་དབང་ཚར་གཅོད་དང་སྤྱི་མཐུན་ལམ་ལུགས་གསར་འཛུགས། བོད་རྒྱ་བར་གྱི་དམངས་ཁྲོད་འབྲེལ་བ་ལ་བརྩི་མཐོང་བྱེད་དགོས་པའི་སྐོར། དུས་དང་ཆིག་སྒྲིལ་གྱི་ནུས་པ་མཉམ་སྤུངས་བྱ་དགོས་སྐོར། བོད་དང་ཐའེ་ཝན་གྱི་རང་དབང་གནས་སྟངས་དང་རྒྱ་ནག་གི་ཤུགས་རྐྱེན། ལྟ་གྲུབ་གཞི་འཛིན་ཐོག་དཔལ་འབྱོར་གྱི་བྱང་ཆིངས་འཛུགས་པའི་དུས་ལ་བབ་སྐོར། བོད་དོན་སྐོར་གྱི་བརྙན་ཐུང་བཟོ་སྒྲིག རྒྱལ་ཁབ་ཀྱི་འཚོ་གནས་དང་བདེན་དོན་ལ་ཡུ་གུར་དང་བོད་གཉིས་ཐུན་མོང་གི་གྲོས་གཞི། ད་ལྟའི་རྒྱལ་སྤྱིའི་གནས་བབ་གསར་པའི་འོག་ང་ཚོས་གང་བྱེད་དགོས་སྐོར། སྣ་མང་ཅན་གྱི་བཙན་བྱོལ་བོད་མིའི་སྤྱི་ཚོགས་དང་སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལ་བཅར་འདྲི། རྒྱ་གཞུང་གི་མ་འོངས་སྲིད་བྱུས་ཀྱི་འགྲོ་ཕྱོགས་ནི་སྡོམ་རྒྱུ་ཁོ་ན་ཡིན་སྐོར། ད་ལྟའི་རྒྱལ་སྤྱིའི་གནས་བབ་འོག་རྒྱ་གཞུང་གོ་རྟིང་སློག་པའི་གོ་སྐབས་དང་གདོང་ལེན། བོད་ཀྱི་ཉམས་མྱོང་ལ་དཔེ་བལྟས་ཏེ་གནམ་སྡེ་སྒོ་མོ་དང་ཧོང་ཀོང་ལ་རྒྱུས་ལོན་བྱ་དགོས་སྐོར། རྒྱ་དམར་འཇིགས་སྐུལ་རིང་ལུགས་བཀག་སྡོམ་འོག་གི་བོད། ཐའེ་ཝན་དུ་བོད་སྐད་དང་བོད་ཀྱི་ལོ་རྒྱུས་རིག་གནས་རྒྱང་བསྒྲགས་སྐོར། མན་ཇུ་རྒྱལ་ཁབ་སླར་གསོའི་ལས་འགུལ་གྱིས་ཤར་ཨེ་ཤི་ཡར་ཤུགས་རྐྱེན། ཐའེ་ཝན་སྤྱི་ཡོངས་ཀྱི་རྒྱལ་སྲུང་འཆར་འགོད་དང་རྒྱལ་ཁབ་བར་གྱི་མཉམ་འབྲེལ་བཅས་ཀྱི་ཐོག་བགྲོ་གླེང་ཞིབ་ལྷུག་གནང་གི་ཡོད་པ་བཅས།།
