༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༡༦ ཉིན་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དབུས་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་པའི་གཞོན་ནུའི་འགོ་ཁྲིད་ཟབ་སྦྱོང་གི་མཇུག་སྡོམ་མཛད་སྒོའི་སྐུ་མགྲོན་གཙོ་བོར་ཕེབས་ཞུགས་ཀྱིས་གསུང་བཤད་གནང་ཡོད།སྐབས་དེར་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་གཞོན་སྐྱེས་རྣམས་ལ་རང་ཉིད་དབུས་གཞོན་ནུ་ལྷན་ཚོགས་ཀྱི་རྒྱུན་ལས་གནང་བའི་མྱོང་བ་ཕྱིར་དྲན་དང་སྦྲགས། གཞོན་ནུ་རྣམས་ནས་དངོས་ཡོད་གནས་སྟངས་གཞི་ལ་བཞག་པའི་ཐོག་ནས་ལས་འགུལ་སྤེལ་དགོས་པ་དང་། ལྷག་པར་རྒྱ་གར་ས་གནས་གང་ས་ནས་མཉམ་ཞུགས་གནང་མཁན་ཚོགས་བཅར་བ་གཞོན་ནུ་ཚོས་རང་ཉིད་གནས་ཡུལ་གྱི་སྤྱི་ཚོགས་དང་མཐོ་སློབ་ཁག་ཏུ་བོད་རྒྱའི་དཀའ་རྙོག་སྐོར་གོ་རྟོགས་སྤེལ་དགོས་པའི་ལམ་སྟོན་གནང་མཐར་ཚོགས་བཅར་བ་རྣམས་ལ་ཟབ་སྦྱོང་ལེགས་གྲུབ་ཀྱི་ཕྱག་ཁྱེར་གནང་ཡོད་པ་རེད། བཞུགས་སྒར་རྡ་རམ་ས་ལར་རྟེན་གཞི་བྱས་པའི་དབུས་གཞོན་ནུ་ལྷན་ཚོགས་ཀྱིས་ལོ་ལྟར་གོ་སྒྲིག་ཞུ་བཞིན་པའི་གཞོན་ནུའི་འགོ་ཁྲིད་ཟབ་སྦྱོང་དེ་བཞིན་འདི་ལོའི་ཕྱི་ཟླ་ ༠༦ ཚེས་ ༡༢ ནས་ ༡༦ བར་ཉིན་གྲངས་ལྔ་རིང་རྡ་སྟེང་བོད་ཁྱིམ་གྱི་ཞི་བདེའི་ཚོགས་ཁང་དུ་བསྐོང་ཚོགས་གནང་ཡོད་པ་བཅས།།