༄༅། །ཕྱི་ལོ་ ༡༩༩༧ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་གྱིས་ཕྱི་ཟླ་ ༠༦ ཚེས་ ༢༦ ཉིན་མོ་དེ་བཞིན་རྒྱལ་སྤྱིའི་བཙན་གནོན་མནར་གཅོད་མྱོང་མཁན་ལ་རྒྱབ་སྐྱོར་གྱི་ཉིན་མོར་ཡོངས་ཁྱབ་གསལ་བསྒྲགས་བསྐྱངས་པ་བཞིན་དུས་དྲན་དེ་ཉིད་ལོ་ལྟར་སྲུང་བརྩི་ཞུ་སྲོལ་ཡོད།
འཛམ་གླིང་མཉམ་འབྲེལ་རྒྱལ་ཚོགས་ཀྱི་མནར་གཅོད་ཐེ་བའི་བཙན་གནོན་རིགས་འགོག་ཐབས་ཀྱི་ལྷན་ཚོགས་ལྟར་ན། མནར་གཅོད་ཅེས་པ་ནི་གནས་ཚུལ་མཁོ་སྒྲུབ་དང་། ནག་ཉེས་ངོས་ལེན། འཇིགས་སྐུལ་གཏོང་སླད་མི་གཞན་ལ་དམིགས་སུ་བཀར་ཏེ་ལུས་སེམས་གཉིས་ཀྱི་ཐོག་ནས་གནོད་འཚེ་དང་སྡུག་བསྔལ་སྤྲད་པ་ལ་ཟེར་བར་བཤད། རྒྱལ་ཚོགས་ཀྱི་མནར་གཅོད་འགོག་ཐབས་ལྷན་ཚོགས་ནས་ཕྱི་ལོ་ ༡༩༨༧ ལོར་དེ་འབྲེལ་དོན་ཚན་བཅུ་དགུ་ཅན་གྱི་ཁྲིམས་ཡིག་གཏན་འབེབས་ཀྱིས་ལྷན་ཞུགས་ཚོགས་མི་རྒྱལ་ཁབ་རྣམས་ནས་ཁྲིམས་ཡིག་དགོངས་དོན་ལ་བརྩི་སྲུང་དང་ལེན་བྱེད་རྒྱུའི་ཁས་ལེན་བྱས་ཤིང་། རྒྱ་ནག་གཞུང་གིས་ཕྱི་ལོ་ ༡༩༨༦ ལོར་ཁྲིམས་ཡིག་ལ་མིང་རྟགས་བཀོད་དེ་ཕྱི་ལོ་ ༡༩༨༨ ལོར་གཏན་འབེབས་བྱས་ཡོད་སྟབས། རྒྱ་གཞུང་གིས་མནར་གཅོད་འགོག་ཐབས་ཁྲིམས་ཡིག་ལ་བརྩི་སྲུང་གིས་མནར་གཅོད་མཚམས་འཇོག་བྱེད་དགོས་ངེས་རེད།
འོན་ཀྱང་རྒྱ་ནག་གཞུང་གིས་བོད་ས་བཙན་བཟུང་བྱས་ཏེ་བོད་མི་རྣམས་ལ་མནར་གཅོད་ཚད་མེད་གཏོང་བཞིན་པ་མ་ཟད། ལྷག་པར་སྲིད་གཞུང་གི་ཁ་གཏད་དུ་སྐད་ཆ་ཤོད་མཁན་རྣམས་ལ་མི་སྤྱོད་ལས་འདས་པའི་མནར་གཅོད་བཙན་གནོན་གཏོང་གི་ཡོད། དེས་ན། ཕྱི་ཟླ་ ༠༦ ཚེས་ ༢༦ ནི་རྒྱ་ནག་དམར་ཤོག་གཞུང་ནས་བོད་མིར་མནར་གཅོད་གདུག་རྩུབ་གཏོང་མཚམས་འཇོག་སླད་འབོད་སྐུལ་བྱེད་རྒྱུའི་ཉིན་མོ་ཞིག་ཡིན།
བོད་ནང་གི་བོད་མི་རྣམས་རྒྱའི་བཙོན་ཁང་ནང་དཀའ་སྡུག་མུ་མཐུད་མྱོང་བཞིན་ཡོད་པ་དང་། ཁྱད་པར་དུ་ལྟ་སྤྱོད་མི་མཐུན་པའི་བཙོན་པར་མནར་གཅོད་ཚད་ལས་བརྒལ་བ་བཏང་སྟེ་སྐབས་རེ་ཚེ་སྲོག་ཤོར་ལ་ཉེ་བའི་མཚམས་སུ་བཙོན་གྲོལ་གཏོང་གི་ཡོད། རྒྱ་ནག་དམར་ཤོག་གཞུང་གིས་བོད་ནང་མནར་གཅོད་བཙན་གནོན་གཏོང་མཚམས་བཞག་སྟེ་བོད་མི་ཆབ་སྲིད་བཙོན་པ་རྣམས་འཕྲལ་དུ་བཙོན་གྲོལ་གཏོང་དགོས། །
