༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༢ ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་རྒྱ་གར་གུ་ཇུ་རཏ་མངའ་སྡེའི་ནང་རྟེན་གཞི་བྱས་པའི་རཤ་ཏྲི་ཡཱ་རཀ་ཥ་གཙུག་ལག་སློབ་གཉེར་ཁང་ (Rashtriya Raksha University) གི་རྒྱལ་སྤྱིའི་མཉམ་ལས་དང་། བདེ་འཇགས། ཐབས་བྱུས་སྡེ་ཚན་ (School of International Cooperation, Security and Strategic Languages) གྱི་དགེ་རྒན་དང་སློབ་གཉེར་བ་ཁག་གཅིག་དང་མཇལ་འཕྲད་ཀྱིས་བོད་དོན་འཐབ་རྩོད་སྐོར་འགྲེལ་བརྗོད་གནང་ཡོད།
དེ་ཡང་སྐབས་དེར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་དགེ་སློབ་རྣམས་ལ་ལོ་རྒྱུས་ཐོག་ནས་བོད་དེ་རང་བཙན་ཡོད་པའི་རྒྱལ་ཁབ་ཅིག་ཡིན་ནའང་། ཕྱི་ལོ་ ༡༩༥༠ ཙམ་ལ་རྒྱ་ནག་དམར་ཤོག་གཞུང་གིས་བཙན་འཛུལ་གྱིས་བོད་ཀྱི་བདག་དབང་བཙན་འཕྲོག་བྱས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མི་ཁྲི་བརྒྱད་ལྷག་བཙན་བྱོལ་དུ་ཕེབས་དགོས་བྱུང་བའི་གནས་སྟངས་གསལ་བཤད་གནང་བ་དང་སྦྲགས། རྒྱ་ནག་གཞུང་གིས་བོད་རྒྱ་ཁོངས་ཡིན་ཚུལ་བཤད་དེ་བཙན་བཟུང་བྱས་པ་ནི་ལོ་རྒྱུས་ཀྱི་བདེན་དཔང་དང་། རྒྱལ་སྤྱིའི་ཁྲིམས་ཡིག་གཉིས་ལས་ཡོངས་སུ་འགལ་ཚུལ་དཔང་རྟགས་ལུང་འདྲེན་དང་བཅས་འགྲེལ་བརྗོད་གནང་བ་མ་ཟད། བཙན་བྱོལ་དུ་འབྱོར་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་ཡངས་དཀྱེལ་ཆེའི་ལམ་སྟོན་དབུ་ཁྲིད་འོག་བོད་མིའི་སྒྲིག་འཛུགས་ (བཙན་བྱོལ་བོད་གཞུང་) གཙོས་པའི་ཆོས་བརྒྱུད་རིས་མེད་ཀྱི་གདན་ས་དགོན་སྡེ་སླར་གསོ་དང་། བཙན་བྱོལ་བོད་མིའི་གཞིས་ཆགས་དང་སློབ་གྲྭ་གསར་འཛུགས་སོགས་ཀྱིས་རྒྱ་གར་ནས་བོད་དོན་བདེན་པའི་འཐབ་རྩོད་དབུ་འཛུགས་གནང་ཚུལ་སྤྱི་དང་། ལྷག་པར་བོད་མིའི་སྒྲིག་འཛུགས་དེ་བཞིན་ཚད་ལྡན་མང་གཙོའི་རིང་ལུགས་སུ་འཕེལ་བའི་རིམ་པ་དང་། སྒྲོམ་གཞི། ལས་དོན་གནང་ཕྱོགས་ཐེ་བའི་དམིགས་ཡུལ་སྲིད་བྱུས་སོགས་ཀྱི་སྐོར་ངོ་སྤྲོད་གནང་།
དེ་དང་འབྲེལ་ཏེ་བཀའ་བློན་མཆོག་གིས་བོད་རྒྱ་འབྲེལ་མོལ་གྱི་འཕེལ་རིམ་དང་གྲུབ་འབྲས་ཇི་སོན། རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་གནོན་ཅན་གྱི་སྲིད་བྱུས་འོག་བོད་མི་རྣམས་ནས་དཀའ་སྡུག་མྱོང་བཞིན་པའི་ཡ་ང་བའི་གནས་སྟངས་གསལ་སྟོན་དང་སྦྲགས། ད་ལྟའི་བོད་ནང་གི་དངོས་ཡོད་གནས་སྟངས་ནི་བཙོན་ཁང་ཆེན་པོ་ཞིག་གི་རྣམ་པ་ཡིན་ཞིང་། དེའི་ནང་དུ་རྒྱ་གཞུང་གིས་མེ་འཁོར་ལྕགས་ལམ་སོགས་ཡར་རྒྱས་གཏོང་གི་ཡོད་ཚུལ་བཤད་ཀྱང་ཡར་རྒྱས་ཀྱི་རྣམ་པ་དེ་དག་ཆབ་སྲིད་ཀྱི་དགོས་མཁོའི་དབང་དུ་བཟོས་པ་ཞིག་ཡིན་ལ། ད་ལྟའི་ཆར་བོད་ནང་རྒྱ་གཞུང་གིས་མི་སེར་སྤེལ་ཡུལ་གཏན་འཇགས་སློབ་གྲྭའི་ནང་བོད་ཕྲུག་བཙན་འཇུག་གིས་བོད་ཀྱི་ཆོས་དང་རིག་གཞུང་ནག་བསུབ་གཏོང་བྱུས་བྱེད་བཞིན་པ་མ་ཟད། བོད་ཀྱི་རང་འབྱུང་ཁོར་ཡུག་ལ་བག་མེད་གཏོར་སྐྱོན་ཚབས་ཆེ་བཏང་རྐྱེན་ཨེ་ཤི་ཡའི་ཆུ་བོ་མང་པོའི་བཞུར་ལམ་ལ་དོ་ཕོག་གིས་གཤམ་འོག་མི་མང་སྟོང་ཕྲག་མང་པོའི་འཚོ་བར་གནོད་སྐྱོན་ཕོག་གི་ཡོད་སྐོར་གསུངས།
དེ་བཞིན་རྒྱ་དཀར་ནག་གཉིས་ཀྱི་ས་མཚམས་དཀའ་རྙོག་དང་འབྲེལ་ཏེ་རྒྱ་གར་གཞུང་ངོས་ནས་རྒྱ་གར་བྱང་ཤར་ས་མཚམས་ (McMohon Line) ཁྲིམས་མཐུན་དུ་འདོད་པར་ས་མཚམས་གཏན་འབེབས་བྱེད་པའི་ཕྱི་ལོ་ ༡༩༡༤ ལོའི་སིམ་ལའི་ཆིངས་ཡིག་ནང་རྒྱ་གར་ཨིན་གཞུང་དང་ལྷན་དབང་ཚད་འདྲ་མཉམ་ཐོག་ཆིངས་ཡིག་ལ་མཚན་རྟགས་འགོད་མཁན་བོད་དེ་ལོ་རྒྱུས་ཐོག་རང་བཙན་རྒྱལ་ཁབ་ཅིག་ཏུ་མི་འདོད་ཐབས་མེད་ཡིན་སྐོར་གསལ་བཤད་གནང་རྗེས་དགེ་སློབ་ཁག་གཅིག་གི་དྲི་བར་ལན་འདེབས་གནང་ཡོད་པ་བཅས།།
