༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༡༦ ཉིན་རྒྱ་གར་ཧི་མ་ཅཱལ་མངའ་སྡེའི་སི་མོར་རྫོངས་ཁོངས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་གཙོས་པའི་ཚོགས་མི་ཁག་གཅིག་བཞུགས་སྒར་རྡ་རམ་ས་ལར་ཕེབས་པ་དང་སྟབས་བསྟུན་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་ཕྱི་དྲིལ་ལས་ཁུངས་སུ་ཕེབས་འབྱོར་གྱིས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་མཇལ་མོལ་གནང་ཡོད།
སྐབས་དེར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་དག་པའི་དབུ་ཁྲིད་ལམ་སྟོན་འོག་རྒྱ་གར་དུ་བོད་མིའི་སྒྲིག་འཛུགས་ (བཙན་བྱོལ་བོད་གཞུང་) བསྐྱར་གསོ་མཛད་ཚུལ་གཙོས་པའི་བོད་མིའི་སྒྲིག་འཛུགས་ཀྱི་སྒྲོམ་གཞི་དང་ལས་དོན་བྱེད་ཕྱོགས། གཞུང་འབྲེལ་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་འཕེལ་རིམ། བོད་མིའི་སྒྲིག་འཛུགས་ཀྱི་བོད་དོན་བདེན་མཐའ་གསལ་ཐབས་དང་བཙན་བྱོལ་བོད་མིའི་བདེ་དོན་གཟིགས་སྐྱོང་གནང་རྒྱུའི་དམིགས་ཡུལ་སྐོར་འགྲེལ་བརྗོད་གནང་ཡོད།
གཞན་ཡང་བཀའ་བློན་མཆོག་གིས་རྒྱ་ནག་གཞུང་གི་དབང་བསྒྱུར་དང་དྲག་གནོན་ཅན་གྱི་སྲིད་བྱུས་འོག་བོད་ནང་གི་བོད་མི་རྣམས་ལ་གཞི་རྩའི་རང་དབང་མེད་པའི་ཛ་དྲག་གནས་སྟངས་གསལ་སྟོན་དང་། ལྷག་པར་དེང་སྐབས་རྒྱ་གཞུང་གིས་ཞི་དྲག་ཐབས་ལམ་སྣ་ཚོགས་བརྒྱུད་དེ་བོད་ཀྱི་ཆོས་དང་རིག་གཞུང་། ངོ་བོ་བཅས་པ་རྒྱ་ནག་ཅན་དུ་བསྒྱུར་རྒྱུའི་ལས་གཞི་རྒྱ་ཆེ་སྤེལ་ཏེ་བོད་མིའི་ངོ་བོ་རྩ་མེད་བཟོ་བའི་བྱུས་ངན་འདིང་བཞིན་པའི་གནས་ཚུལ་ངོ་སྤྲོད་གནང་ཞིང་། དེ་དང་འབྲེལ་ཏེ་ཁོང་མོས་བོད་ནང་རྒྱ་ནག་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བོད་ཕྲུག་བཙན་འཇུག་བྱེད་བཞིན་པ་དང་། བོད་མིའི་འགྲོ་འཆག་ཉལ་འདུག་གི་སྤྱོད་ལམ་ལ་བྱ་ར་ཉུལ་ཞིབ་བྱ་ཕྱིར་རིགས་རྫས་དཔེ་མཚོན་བསྡུ་ལེན་བྱེད་བཞིན་པ་མ་ཟད། ད་བར་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གྱིས་བོད་མི་གྲངས་ ༡༥༧ གྱིས་རང་ལུས་མེར་སྲེག་བཏང་ཡོད་པའི་ཛ་དྲག་གནས་སྟངས་གསལ་བཤད་གནང་།
དེ་དང་ཆབས་ཅིག་ཁོང་མོས་བོད་དོན་དེ་རྒྱལ་སྤྱིར་གལ་གནད་ཆེ་ཚུལ་དང་། རྒྱལ་སྤྱིའི་མི་མང་གིས་བོད་དོན་ལ་རྒྱབ་སྐྱོར་དང་དོ་སྣང་ཇི་ཡོད་གཙོས་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་གནས་བབ་འགྲེལ་བརྗོད་གནང་ཞིང་། དེ་ལས་འཕྲོས་ཏེ་བོད་དོན་ཐད་རྒྱ་གར་གཞུང་དམངས་གཉིས་ནས་རྒྱབ་སྐྱོར་ཚད་མཐོ་གནང་དང་གནང་བཞིན་པར་མངོན་བསྟོད་དང་བཀའ་དྲིན་རྗེས་དྲན་ཞུས་པའི་ཐོག འཕགས་བོད་གཉིས་ཀྱི་ལོ་རྒྱུས་རང་བཞིན་ལྡན་པའི་མཛའ་བཅུགས་ཀྱི་འབྲེལ་བ་དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་གནང་བ་བཞིན་དགེ་སློབ་བར་གྱི་འབྲེལ་བ་ཆགས་ཡོད་སྐོར་སོགས་གསུངས་ཡོད་པ་རེད།
དེ་རྗེས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་འཕགས་བོད་ཀྱི་འབྲེལ་བའི་རང་བཞིན་དང་། ལྷག་པར་རྒྱ་གར་བོད་དོན་རྒྱབ་སྐྱོར་བ་རྣམས་ནས་ལྡི་ལིར་རྟེན་གཞི་བྱས་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མ་དང་། འཕགས་བོད་འབྲེལ་མཐུད་ལས་ཁུངས་དང་འབྲེལ་མཐུད་གནང་དགོས་པའི་ལམ་སྟོན་གནང་ཡོད།
ཐེངས་འདིའི་ཧི་མ་ཅཱལ་མངའ་སྡེའི་སི་མོར་རྫོངས་ཁོངས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པའི་བཞུགས་སྒར་ཁུལ་གྱི་གཟིགས་སྐོར་དེ་བཞིན་སྤོན་ཊ་ཆོལ་གསུམ་ས་གནས་འགོ་འཛིན་ལས་ཁུངས་དང་། པུ་རུ་ཝ་ལ་ས་གནས་འགོ་འཛིན་ལས་ཁུངས། ཀུམ་རའོ་ས་གནས་འགོ་འཛིན་ལས་ཁུངས། ཁམས་ཀཿ ཐོག་ས་གནས་འགོ་འཛིན་ལས་ཁུངས་བཅས་ནས་གོ་སྒྲིག་མཐུན་འགྱུར་ཞུས་ཡོད་པ་དང་། སྐབས་དེར་ཁོང་རྣམས་བཀའ་དྲུང་ཡིག་ཚང་། བོད་ཀྱི་འགྲེམས་སྟོན་ཁང་། བོད་ཀྱི་དཔེ་མཛོད་ཁང་། བོད་མི་མང་སྤྱི་འཐུས་ལྷན་ཁང་བཅས་སུ་གཟིགས་སྐོར་ལ་ཕེབས་ཀྱི་ཡོད་པ་བཅས།། 
