༄༅། །བྱང་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་ལོ་སི་ཨན་ཇི་ལེ་སི་ (Los Angeles) རུ་རྒྱ་ནག་གནམ་སྡེ་སྒོ་མོ་ཆེའི་དྲུག་བཞིའི་དོན་རྐྱེན་རྗེས་དྲན་སྲུང་བརྩིའི་མཛད་སྒོར་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་ངོ་བོ་བཅས་པ་རྩ་མེད་གཏོང་བྱུས་བྱེད་བཞིན་པའི་ཛ་དྲག་གནས་སྟངས་སྤྱི་དང་། བྱེ་བྲག་ཏུ་བོད་ནང་གི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་དང་། བོད་མིའི་རིགས་རྫས་དཔེ་མཚོན་བསྡུ་རུབ་བྱེད་པའི་སྐོར་ངོ་སྤྲོད་གནང་ཡོད།མཛད་སྒོའི་ཐོག་རྒྱ་རིགས་མང་གཙོ་དོན་གཉེར་བ་དང་ལས་འགུལ་བ། ས་གནས་གཞུང་དང་ཚོགས་སྡེ་ཁག་གི་སྐུ་ཚབ་སོགས་མཉམ་ཞུགས་གནང་ཞིང་། སྐབས་ཆེན་ཝི་མིང་ (Chen Weiming) ལགས་ཀྱིས་ཁོང་དང་ལས་རོགས་རྣམས་ཀྱིས་བཟོས་པའི་ལྕགས་ཐག་གིས་བཀྱིགས་པའི་བུད་མེད་ཅེས་པའི་རྡོ་བརྐོས་དབུ་འབྱེད་དང་འབྲེལ། ལྕགས་ཐག་གིས་བཀྱིགས་པའི་བུད་མེད་དཔེ་མཚོན་དྲངས་ཏེ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་གསལ་སྟོན་གནང་ཞིང་། མཐར་ལྕགས་ཐག་གིས་བཀྱིགས་པའི་བུད་མེད་དང་རྒྱ་ནག་ལ་རང་དབང་ཐོབ་པའི་རེ་བ་མཚོན་ཕྱིར་ལྕགས་ཐག་བཀྲོལ་ཡོད་པ་རེད།གཞན་ཡང་སྐབས་དེར་སྙན་གྲགས་ཆེ་བའི་རྒྱ་རིགས་འགྲོ་བ་མིའི་ཐོབ་ཐང་འཐབ་རྩོད་པ་ཅེན་གུ་ཧང་ཆེན་ (Chen Guangcheng) ལགས་ཀྱིས་ལྕགས་ཐག་གིས་བཀྱིགས་པའི་བུད་མེད་ཀྱི་གནས་སྟངས་འགྲེལ་བརྗོད་དང་། རྒྱ་ནག་ནང་གི་འགྲོ་བ་མིའི་ཐོབ་ཐང་གནས་བབ་ལ་ཐུགས་འཚབ་བསྟན་པ་མ་ཟད། རྒྱ་ནག་ནང་ཞི་བདེ་དང་མང་གཙོའི་བཅོས་སྒྱུར་ཡོང་སླད་འབྲེལ་ཡོད་ཚང་མས་ཕྱར་གྲུ་མཉམ་འདེགས་གནང་དགོས་པའི་འབོད་སྐུལ་གནང་ཡོད། དེ་མཚུངས་ཡུ་དཱ་ཧི་ (Yu Dahai) ལགས་དང་། ཅེན་ཆུ་ཧང་ཆུ་ཧང་ (Chen Chuangchuang) ལགས་ཀྱིས་ཀྱང་ཚོགས་པའི་ཚབ་ཞུས་ཏེ་མཛད་སྒོར་མཉམ་ཞུགས་ཀྱིས་གསུང་བཤད་གནང་ཡོད།ཟླ་འདིའི་ཕྱི་ཚེས་ ༠༥ ཉིན་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་གཙུག་ལག་སློབ་དཔོན་ལའུ་ཧོང་ཤང་ལགས་དང་མཇལ་འཕྲད་ཞུས་ཏེ་རྒྱ་ནག་གི་རྒྱལ་རབས་ལ་ཞིབ་འཇུག་དཔྱིས་ཕྱིན་པ་གནང་འབྲས་སུ་བོད་ཀྱི་གནས་བབ་དངོས་དོན་ར་སྤྲོད་གནང་བར་བསྔགས་བརྗོད་ཞུས་ཡོད། རྒྱ་རིགས་འབྲེལ་མཐུད་པ་དང་ལྷན་དུ་སྤྱི་ཟུར་བསྟན་འཛིན་ཆོས་ལྡན་ལགས་དང་། ལྷོ་ཀ་ལི་ཕོ་ནི་ཡའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་བརྟན་སྒྲོལ་དཀར་ལགས་མཉམ་ཞུགས་གནང་ཡོད་པ་བཅས།།