༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་ནག་ཉམས་ཞིབ་དང་ཐབས་བྱུས་བསྟི་གནས་ཁང་གིས་གོ་སྒྲིག་ཞུས་པའི་བགྲོ་གླེང་ཚོགས་འདུའི་ཐོག་སྲིད་འཛིན་ཞི་ཅིན་ཕིང་གི་དབང་བསྒྱུར་འོག་རྒྱ་ནག་གི་བོད་དོན་སྲིད་བྱུས་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་ཞི་ཅིན་ཕིང་གིས་རྒྱལ་ཁབ་གཅིག་དང་། རིག་གཞུང་གཅིག སྐད་ཡིག་གཅིག་བཟོ་རྒྱུའི་ཕུགས་དམིགས་འོག་རྒྱ་ནག་ནང་དུ་ཕྱིའི་རང་དབང་ལྡན་པའི་རྒྱལ་ཁབ་ལྟར་ཆབ་སྲིད་ཀྱི་རང་དབང་མེད་པའི་སྐོར་ནན་བརྗོད་དང་སྦྲགས། བོད་རྒྱའི་དཀའ་རྙོག་ཞི་འགྲིག་ཡོང་བར་བོད་མིའི་སྒྲིག་འཛུགས་ཀྱི་ངོས་ནས་དབུ་མའི་ལམ་ཐོག་ཤར་བསྐྱོད་གནང་མུས་དེ་ལྟར་ཡང་། སྐབས་བཅུ་དྲུག་པའི་བཀའ་ཤག་གིས་དབུ་མའི་ལམ་གྱི་ཐབས་བྱུས་ལ་བསྒྱུར་བ་ཕྲན་བུ་བཏང་སྟེ་ལོ་རྒྱུས་ཐོག་བོད་རང་བཙན་ཡིན་པའི་གནས་བབ་ལ་བསྐྱར་ནན་གནང་གི་ཡོད་ཅིང་། དེ་ལ་བརྟེན་ནས་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་བོད་མིའི་དབུ་ཁྲིད་ལྷན་གྲོས་མོལ་ལ་ཞུགས་རྒྱུར་སྐུལ་མ་ཐེབས་རེ་ཡོད་སྐོར་དང་། གལ་ཏེ་དབུ་མའི་ལམ་བརྒྱུད་བོད་རྒྱའི་དཀའ་་རྙོག་ཞི་འགྲིག་བྱུང་ན་བོད་དང་ས་འབྲེལ་ཡོད་པའི་ལྷོ་ཨེ་ཤི་ཡའི་རྒྱལ་ཁབ་ཁག་གི་བདེ་འཇགས་ལ་ཕན་ཐོགས་ཡོང་སྲིད་པའི་སྐོར་འགྲེལ་བརྗོད་གནང་ཡོད།
དེ་བཞིན་དཔལ་ལྡན་སྲིད་སྐྱོང་མཆོག་གིས་མུ་མཐུད། དེང་སྐབས་རྒྱ་ནག་སྟོབས་ཆེན་རྒྱལ་ཁབ་ཅིག་ཏུ་གྱུར་ཡོད་ནའང་ད་དུང་རྒྱ་ནག་རང་ལ་གདེང་ཚོད་དང་ཕུགས་བརྟན་མེད་པ་ཞིག་ཏུ་མཐོང་གི་འདུག རྒྱ་ནག་ལྟ་བུར་མཚོན་ན། ཕྱིའི་བདེ་འཇགས་ལས་ནང་གི་བདེ་འཇགས་ཆེད་འགྲོ་སོང་ཕོན་ཆེ་བ་གཏོང་མཁན་གྱི་རྒྱལ་ཁབ་ཁོ་ན་ཡིན་ཞིང་། རྒྱུ་མཚན་དེ་ལ་བརྟེན་ནས་རྒྱ་ནག་གཞུང་གིས་བོད་ཐོག་ཁྲིམས་འགལ་དབང་བསྒྱུར་བྱས་པ་དེ་རྒྱལ་སྤྱིའི་སྤྱི་ཚོགས་ཀྱིས་ཁྲིམས་མཐུན་བཟོ་ཐབས་ཐད་འབད་རྩོལ་ལྷོད་མེད་བྱེད་བཞིན་ཡོད་ཅེས་དང་། དེ་ལས་འཕྲོས་ཏེ་དཔལ་ལྡན་སྲིད་སྐྱོང་མཆོག་གིས་རྒྱལ་སྤྱིའི་སྤྱི་ཚོགས་ནས་ལོ་རྒྱུས་ཐོག་བོད་རྒྱ་ནག་གི་མངའ་ཁོངས་ཡིན་པ་ཁས་ལེན་བྱས་ན་བོད་རྒྱའི་དཀའ་རྙོག་ཞི་འགྲིག་ཡོང་བར་རྒྱབ་སྐྱོར་གནང་རིན་མེད་པ་དང་། ལོ་རྒྱུས་ཀྱི་བྱུང་བ་རྣམས་རྒྱལ་སྤྱིའི་སྤྱི་ཚོགས་ཀྱི་འཁྲུལ་སྣང་རྟོགས་བཟོས་ཐག་གཅོད་ཐུབ་ཐབས་མེད་སྐོར་བསྐྱར་ནན་དང་འབྲེལ། བོད་ཀྱི་གནས་བབ་ཁྲིམས་མཐུན་ལུགས་གཙང་བཟོ་རྒྱུའི་དབང་ཚད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་ལ་ཡོད་པ་གསལ་བཤད་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་ཀྱི་ངོ་བོ་མཚོན་བྱེད་ཀྱི་རྩ་བ་ལྟ་བུར་གྱུར་པའི་བོད་ཀྱི་སྐད་ཡིག་མེད་པ་བཟོ་རྒྱུའི་ལས་འགུལ་སྤེལ་བཞིན་ཡོད་སྟབས། བོད་ཀྱི་རིག་གཞུང་རིམ་པས་རྩ་སྟོང་འགྲོ་ཉེན་ཆེ་བའི་སྐོར་དང་། བོད་ནང་ཆབ་སྲིད་ཀྱི་རང་དབང་མེད་པས་ད་བར་བོད་མི་གྲངས་ ༡༥༧ ནས་རང་ལུས་མེར་སྲེག་གིས་རྒྱ་གཞུང་ལ་མངོན་གསལ་དོད་པོས་ངོ་རྒོལ་བྱས་པ་མ་ཟད། རྒྱལ་སྤྱིའི་སྤྱི་ཚོགས་ནས་ཁོང་ཚོའི་མངོན་འདོད་ལ་དོ་སྣང་བྱེད་པའི་རེ་བ་བཅང་ཡོད་སྐོར་གསུངས།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་མིར་དྲག་གནོན་ཚབས་ཆེ་གཏོང་བཞིན་པའི་ཐོག་ཕྱི་རྒྱལ་གསར་འགོད་པ་དང་། གཞུང་ཚབ་མི་སྣ། འགྲོ་བ་མིའི་ཐོབ་ཐང་འཐབ་རྩོད་པ་རྣམས་བོད་དུ་འགྲོ་བསྐྱོད་བཀག་སྡོམ་བྱས་ཡོད་ལ། ད་ལྟའི་ཆར་རྒྱ་ནག་གཞུང་གིས་དམར་ཤོག་ཚོགས་པ་རྒྱུན་གནས་ཁོ་ནའི་ཐད་སེམས་འཚབ་བྱེད་ཀྱི་ཡོད་པས་རྒྱ་ནག་དམར་ཤོག་གཞུང་གིས་རྒྱ་གར་གྱི་ས་མཚམས་མཚོན་པའི་ལྷོ་རྒྱ་ནག་རྒྱ་མཚོ་དང་། ཐའེ་ཝན་ལ་འཇིགས་སྐུལ་བཙན་ཤེད་གཏོང་གི་ཡོད་སྐོར་འགྲེལ་བརྗོད་གནང་ཡོད།
དེ་མཚུངས་ཁོང་གིས་རྒྱལ་སྤྱིའི་མི་མང་ལ་འབོད་སྐུལ་གྱི་ཚུལ་དུ། ང་ཚོས་སྲིད་གཞུང་ཁག་དང་། སྲིད་བྱུས་བཟོ་མཁན་རྣམས་ལ་བོད་དེ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཁོངས་གཏོགས་རེད་ཅེས་ཟེར་མཚམས་འཇོག་རོགས་ཞེས་འབོལ་སྐུལ་ཞུ་རྒྱུ་ཡིན། དེ་ལྟར་བཤད་ན་ཁྱེད་ཚོས་རྒྱ་ནག་གིས་བོད་ས་བཙན་བཟུང་བྱས་པ་དེ་ཁྲིམས་མཐུན་བཟོ་གི་ཡོད། རྒྱལ་སྤྱིའི་སྤྱི་ཚོགས་དང་རང་དབང་ལྡན་པའི་འཛམ་གླིང་གིས་རང་ཉིད་ཀྱི་རིན་ཐང་བརྟན་བཟུང་གནང་དགོས་ཞེས་སོགས་གསུངས་ཡོད་པ་བཅས།།
