༄༅། །ཕྱི་ལོ་ ༢༠༢༣ ཟླ་བ་ ༦ ཚེས་ ༢༣ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨོ་སྟྲེ་ལི་ཡཱའི་གྲོང་ཁྱེར་མེལ་བྷོརན་ཁུལ་གྱི་མཛད་འཆར་ཁག་ལེགས་པར་གྲུབ་རྗེས་སྦེ་རིསི་སྦེན་གྲོང་ཁྱེར་དུ་ཕེབས་འབྱོར་སྐབས་ཕྱོགས་བཞུགས་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་དང་། ས་གནས་བོད་རིགས་མཐུན་ཚོགས་ཀྱི་རྒྱུན་ལས་རྣམ་པ། མང་ཚོགས་ཁག་གཅིག་བཅས་ནས་དགའ་བསུའི་སྣེ་ལེན་གཟབ་རྒྱས་ཞུས་གནང་འདུག
དེ་ཡང་གོང་ཚེས་ཉིན་གྱི་ཕྱི་དྲོར་དཔལ་ལྡན་སྲིད་སྐྱོང་མཆོག་སྦེ་རིསི་སྦེན་དུ་བོད་ཀྱི་དུས་སྟོན་ཐེངས་ ༡༥ པའི་མཛད་སྒོར་གདན་ཞུས་ལྟར་ཆེད་ཕེབས་གནང་ཡོད། དཔལ་ལྡན་སྲིད་སྐྱོང་མཆོག་གྲོང་ཁྱེར་གྱིས་ (Powerhouse) ཞེས་པའི་ཚོགས་ཁང་དུ་དུས་སྟོན་གྱི་དམིགས་བསལ་ལས་རིམ་ཐོག་ཨོ་སྟྲེ་ལི་ཡཱ་རྒྱལ་ཡོངས་རླུང་འཕྲིན་ཁང་གི་ལྕམ་སྐུ་སཱ་རཱ་ (Sarah Kanowski) ལགས་དང་ལྷན་ཕ་ཡུལ་ (Homeland) ཞེས་པའི་བརྗོད་གཞིའི་ཐོག་གསུང་བཤད་དང་དྲི་བར་ལན་འདེབས་གནང་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་ཀྱི་ས་བབ་ཆགས་ཚུལ་དང་། བོད་ཀྱི་གཙང་པོ་ཁག་གི་གལ་གནད། བོད་ནང་རྒྱ་ནག་གཞུང་གིས་གཏན་འཇགས་སློབ་གྲྭ་བརྒྱུད་བོད་ཀྱི་རིག་གཞུང་རྩ་མེད་གཏང་རྒྱུའི་སྲིད་བྱུས་ལག་བསྟར་བྱེད་བཞིན་པའི་ཛ་དྲག་གནས་སྟངས། བོད་མིའི་སྒྲིག་འཛུགས་ཀྱི་སྒྲོམ་གཞི། དབུ་མའི་ལམ་གྱི་སྲིད་བྱུས་བརྒྱུད་བོད་རྒྱ་གཉིས་ཀྱི་དཀའ་རྙོག་སེལ་ཐབས་སོགས་ཀྱི་སྐོར་གསུངས་ཡོད།
གསུང་བཤད་ཀྱི་ལས་རིམ་གྲུབ་རྗེས་དཔལ་ལྡན་སྲིད་སྐྱོང་མཆོག་གིས་བོད་ཀྱི་དུས་སྟོན་གོ་སྒྲིག་གནང་མཁན་སྦེ་རིསི་སྦེན་གནས་སྡོད་བསྟན་འཛིན་ཆོས་རྒྱལ་ལགས་དང་ཁོང་གི་ཕྱག་རོགས་རྣམ་པས་དུས་སྟོན་གོ་སྒྲིག་ཆེད་རོགས་ཕན་མཐུན་འགྱུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞེས་དང་། འདི་ལྟ་བུའི་དུས་སྟོན་བརྒྱུད་བོད་ཀྱི་གནད་དོན་དང་བོད་མིའི་འཐབ་རྩོད་སྐོར་གོ་རྟོགས་རྒྱ་ཆེ་སྤེལ་ཐུབ་རྒྱུར་ཕན་ཐོགས་ཧ་ཅང་ཡོང་རྒྱུ་ཡིན་སྐོར་གསུངས།
ཕྱི་ཚེས་ ༢༤ རེས་གཟའ་སྤེན་པ་ཉིན་བོད་རིགས་མང་ཚོགས་དང་ཐུག་འཕྲད་ཀྱིས་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་སྐབས་ ༡༦ པའི་བཀའ་ཤག་གི་སྤྱི་ཡོངས་ཀྱི་དགོངས་པ་བཞེས་ཕྱོགས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་ཕྱག་ལས་གནང་བཞིན་པའི་སྐོར། གཞན་ཡང་བོད་མིའི་སྒྲིག་འཛུགས་ཀྱི་སྒྲོམ་གཞི་བརྟན་པོ་ཇི་ལྟར་བཟོ་ཐབས། བཙན་བྱོལ་བོད་མིའི་གཞིས་ཆགས་ཁག་རྒྱུན་གནས་ཐུབ་ཐབས་དང་བོད་མི་མི་ཉུང་བ་ཞིག་ལ་སྡོད་ཁང་གི་དཀའ་ངལ་འཕྲད་བཞིན་པ་སེལ་ཐབས། བོད་ནས་བཙན་བྱོལ་དུ་ཕེབས་མཁན་ཧ་ཅང་ཉུང་དུ་ཕྱིན་སྐོར། སོ་སོའི་རྒྱལ་ཁབ་ཀྱི་ལོ་རྒྱུས་ལ་དོ་སྣང་དང་ཤེས་རྟོགས་དགོས་རྒྱུ་ཧ་ཅང་གལ་ཆེན་པོ་ཡིན་པ། རྒྱལ་སྤྱིའི་སྟེང་བོད་དོན་གནས་བབ་མཐོ་རུ་གཏོང་ཐབས་སུ་འབད་བརྩོན་གནང་བཞིན་པ་སོགས་ཀྱི་སྐོར་གསུང་བཤད་གནང་རྗེས་མང་ཚོགས་ཁྲོད་ནས་བསམ་འཆར་དང་། དྲི་བར་ལན་འདེབས་གསལ་བཤད་གནང་སྟེ་ཐེངས་འདིའི་ནིའུ་ཛི་ལེནཌ་དང་ཨོཨོ་སྟྲེ་ལི་ཡཱ་ཁུལ་གྱི་གཞུང་འབྲེལ་མཛད་འཆར་ཁག་ཡོངས་སུ་ལེགས་གྲུབ་བྱུང་ཡོད་པ་བཅས། །
དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ནིའུ་ཛི་ལེནྜ་དང་ཨོསྟྲེ་ལི་ཡཱ་ཁུལ་གྱི་གཞུང་འབྲེལ་མཛད་འཆར་ཁག་ཡོངས་སུ་ལེགས་གྲུབ་བྱུང་བ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)