ཕྱི་ཚེས་ ༢༢ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨོསྟྲེ་ལི་ཡཱའི་གྲོང་ཁྱེར་མེལ་བྷོན་དུ་རྟེན་གཞི་བྱས་པའི་ཨོསྟྲེ་ལི་ཡཱ་དང་། རྒྱ་གར་འབྲེལ་ལམ་བསྟི་གནས་ཁང་ (Australia-India Institute) ཞེས་པའི་ཉམས་ཞིབ་ཁང་གི་གོ་སྒྲིག་འོག་འཕགས་བོད་གཉིས་དབར་གནའ་དེང་གི་འབྲེལ་བ་ཞེས་པའི་བརྗོད་གཞིའི་ཐོག་གསུང་བཤད་དང་དྲི་བ་དྲི་ལན་གནང་ཡོད་པ་རེད།

དེ་ཡང་དཔལ་ལྡན་སྲིད་སྐྱོང་མཆོག་གིས་བོད་དུ་ནང་ཆོས་དང་བོད་ཀྱི་ཡི་གེ་བཅས་པ་རྒྱ་གར་འཕགས་པའི་ཡུལ་ནས་དར་སྤེལ་བྱུང་བའི་སྐོར་དང་། གཞན་ཡང་རྒྱ་གར་གཞུང་མང་གཉིས་ནི་བོད་མི་རྣམས་ལ་ཧ་ཅང་བཀའ་དྲིན་ཆེན་པོ་ཡིན་སྐོར་སོགས་ཀྱི་གསུང་བཤད་གནང་རྗེས་དྲི་བ་ཁག་ལ་ལན་འདེབས་གནང་ཡོད།

ཕྱི་དྲོ་དཔལ་ལྡན་སྲིད་སྐྱོང་མཆོག་གིས་ཝིག་ཊོ་རི་ཡ་ཁུལ་གནས་སྡོད་བོད་རིགས་མང་ཚོགས་དང་ཐུག་འཕྲད་ཀྱིས་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས། སྐབས་ ༡༦ པའི་བཀའ་ཤག་གི་སྤྱི་ཡོངས་ནས་དགོངས་པ་བཞེས་ཕྱོགས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཞག་གིས་ཕྱག་ལས་གནང་བཞིན་པའི་སྐོར། བཙན་བྱོལ་བོད་མིའི་གཞིས་ཆགས་ཁག་རྒྱུན་གནས་ཐུབ་ཐབས། བོད་མི་མི་ཉུང་བ་ཞིག་ལ་སྡོད་ཁང་གི་དཀའ་ངལ་འཕྲད་བཞིན་པ་སེལ་ཐབས། སོ་སོའི་རྒྱལ་ཁབ་ཀྱི་ལོ་རྒྱུས་ལ་དོ་སྣང་དང་ཤེས་རྟོགས་དགོས་རྒྱུ་ཧ་ཅང་གལ་ཆེན་པོ་ཡིན་སྐོར།  དང་བླངས་དཔྱ་དངུལ་བསྡུ་འབབ་དང་འབྲེལ་བའི་གནད་དོན་གལ་ཆེ་ཁག་གཅིག་སྐོར་གསུངས།

གཞན་ཡང་དཔལ་ལྡན་སྲིད་སྐྱོང་མཆོག་གིས། རྒྱལ་སྤྱིའི་སྤྱི་ཚོགས་དང་། མང་གཙོ་དང་དྲང་བདེན་ལ་རྒྱབ་སྐྱོར་གནང་མཁན་གཞུང་དང་བཅས་པར་རྒྱལ་རབས་ལོ་རྒྱུས་ཀྱི་ཐོག་ནས་བོད་དེ་རང་བཙན་གྱི་རྒྱལ་ཁབ་ཡིན་པ། རྒྱལ་སྤྱིའི་སྟེང་བོད་དོན་གནས་བབ་མཐོ་རུ་གཏོང་ཐབས་སུ་འབད་བརྩོན་གནང་བཞིན་པ། བོད་ནང་གི་ད་ལྟའི་ཛ་དྲག་གནས་སྟངས་སྐོར་འགྲེལ་བརྗོད་དང་གོ་རྟོགས་མཐོ་རུ་གཏོང་ཐབས་དང་རྒྱབ་སྐྱོར་ཐོབ་ཐབས་ཆེད་འབད་བརྩོན་གནང་བཞིན་པ་སོགས་ཀྱི་སྐོར་གསུང་བཤད་གནང་རྗེས་མང་ཚོགས་ཁྲོད་ནས་བསམ་འཆར་དང་།  དྲི་བར་ལན་འདེབས་གསལ་བཤད་གནང་གྲུབ་རྗེས་རྒྱ་རིགས་མང་གཙོ་དོན་གཉེར་བ་ཁག་གཅིག་གིས་དཔལ་ལྡན་སྲིད་སྐྱོང་མཆོག་ལ་དགའ་བསུའི་ཆེ་བསྟོད་གསོལ་སྟོན་ཞིག་ཏུ་མགྲོན་འབོད་གནང་དོན་ལྟར་ཆེད་ཕེབས་གནང་ཡོད་པ་བཅས། །