༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༠ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀེན་བྷེ་ར་རུ་ཨོསྟྲེ་ལི་ཡཱའི་གྲོས་ཚོགས་གོང་འོག་གི་འཐུས་མི་རྣམ་པ་དང་མཇལ་འཕྲད་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཨོསྟྲེ་ལི་ཡཱ་བོད་དོན་ལྷན་ཚོགས་ཀྱི་སྐུ་ཚབ་བོད་རིགས་གཞོན་སྐྱེས་གཉིས་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་བཅར་འདྲི་ཞུས་པར་དང་ལེན་གྱིས་ལན་འདེབས་གསལ་བཤད་གནང་ཞིང་། སྐབས་དེར་ཁོང་གིས་ཐེངས་འདིའི་ཕྱོགས་ཕེབས་ཀྱི་དམིགས་ཡུལ་དང་། ཨོསྟྲེ་ལི་ཡཱའི་སྲིད་གཞུང་ངོས་ནས་བོད་དོན་ལ་རྒྱབ་སྐྱོར་སྔར་ལྷག་གནང་བའི་རེ་བ་ཡོད་སྐོར་གསུངས་རྗེས་ཨོསྟྲེ་ལི་ཡཱའི་གྲོས་ཚོགས་སུ་ཆེད་ཕེབས་ཀྱིས་གྲོས་ཚོགས་གོང་མའི་འཐུས་མི་སྐུ་ཞབས་སི་མོན་བྷིར་མིང་གྷམ་ (Simon Birmingham, Shadow Foreign Affairs Minister) ལགས་དང་། ཨོསྟྲེ་ལི་ཡཱའི་ལྗང་ཁུ་སྲིད་དོན་ཚོགས་པའི་འཐུས་མི་ཁག་གཅིག་དང་མཇལ་འཕྲད་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་འགྲོ་བཞིན་པའི་གནས་སྟངས་དང་། རྒྱ་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བོད་ཕྲུག་བཙན་འཇུག་བྱས་ཏེ་བོད་ཀྱི་ཆོས་དང་རིག་གཞུང་བཙན་སྒྱུར་གཏོང་བཞིན་པའི་སྐོར་གྲོས་མོལ་སྙན་སེང་ཞུས་པར། གྲོས་ཚོགས་གོང་མའི་འཐུས་མི་སྐུ་ཞབས་སི་མོན་བྷིར་མིང་གྷམ་ལགས་ཀྱིས་ཐུགས་འཚབ་དང་བཅས་བོད་དོན་ལ་རྒྱབ་སྐྱོར་གནང་རྒྱུའི་ཞལ་བཞེས་གནང་བ་དང་སྦྲགས། དེ་དོན་ཨོསྟྲེ་ལི་ཡཱ་སྲིད་གཞུང་གི་ངོས་ནས་རྒྱུན་མཐུད་དེ་ལས་གཞི་སྤེལ་རྒྱུ་གལ་ཆེན་པོ་ཡིན་པ་མ་ཟད། གནད་དོན་དེ་རིགས་རྒྱ་ནག་གི་སྐུ་ཚབ་དང་ལྷན་གྲོས་མོལ་གནང་སྐབས་གྲོས་བསྡུར་གནང་བའི་རེ་བ་ཡོད་སྐོར་གསུངས། ཉིན་རྒྱབ་གྲོས་ཚོགས་འོག་མའི་འཐུས་མི་སུ་སན་ཀྲེམ་པལ་མན་ (Susan Templemann) ལགས་དང་། གྲོས་ཚོགས་འོག་མའི་འཐུས་མི་སོ་ཕི་ཨི་སི་ཀེམ་ (Sophie Scamps) ལགས་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གྲོས་ཚོགས་སུ་ཕེབས་བསུ་ཞུས་ཏེ་ཁོང་རྣམས་ནས་བོད་དོན་ལ་རྒྱབ་སྐྱོར་གྱི་བསྒྲགས་གཏམ་སྒྲོགས་སྦྱང་གནང་། དེ་རྗེས་གྲོས་ཚོགས་གོང་མའི་འཐུས་མི་ཇེ་ནིཊ་ར་ཧི་སི་ (Janet Rice) ལགས་ཀྱིས་སྤྱི་དམངས་ཀྱི་ཁེ་ཕན་(Matter of Public Interest) མིང་ཐོག་ནས་གྲོས་གཞི་བསྣམས་ཏེ། རྒྱ་གཞུང་གི་སྟངས་འཛིན་བྱེད་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་དང་། རྒྱ་ནག་གཞུང་གི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གནད་དོན་ལ་ཐེ་བྱུས་བྱེད་བཞིན་པའི་གནས་སྟངས་ཐད་བགྲོ་གླེང་གནང་སྟེ། གྲོས་གཞིའི་ཐོག་གྲོས་ཚོགས་གོང་མའི་འཐུས་མི་ལིན་ཊ་རེ་ནོལ་ (Linda Reynolds) ལགས་དང་། དེ་བོ་རཱ་ཨོ་ནིལ་ (Deborah O’Neill) ལགས། ལི་ཊི་ཧ་ཐོར་པེ་ (Lidia Thorpe) ལགས། ཀྲོ་ནི་ཤལ་ཊོན་ (Tony Sheldon) ལགས། ཇོར་ཊན་ཨི་སི་ཊིལ་ཇོན་(Jordan Steele-John) ལགས་ཐེ་བའི་སྲིད་དོན་ཚོགས་པ་འདྲ་མིན་གྱི་གྲོས་ཚོགས་འཐུས་མི་རྣམ་པས་རྒྱབ་སྐྱོར་གནང་ཡོད། དེ་རྗེས་ཨོསྟྲེ་ལི་ཡཱའི་གྲོས་ཚོགས་འོག་མའི་ཚོགས་གཞོན་ཤཱ་རོན་ཀེ་ལི་ཊོན་ (Sharyn Claydon) ལགས་ཀྱིས་སྒེར་གྱི་མཛད་སྒོ་ཞིག་གོ་སྒྲིག་ཞུས་ཐོག་སྲིད་དོན་ཚོགས་པ་འདྲ་མིན་གྱི་གྲོས་ཚོགས་འཐུས་མི་མཉམ་བཅར་ཞུས་ཏེ། གྲོས་ཚོགས་འཐུས་མི་ནང་ཁུལ་བགྲོ་གླེང་དང་བོད་དོན་ལ་ཐུན་མོང་ཐོག་ནས་གདུང་སེམས་མཉམ་སྐྱེད་དང་རྒྱབ་སྐྱོར་ཐོབ་ཐབས་ཀྱི་གོ་སྐབས་བཟང་པོ་ཞིག་བྱུང་ཡོད་པ་རེད།

དགོང་དྲོ་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་དགོང་ཚིགས་གསོལ་སྟོན་ཞིག་གོ་སྒྲིག་ཞུས་ཐོག་གྲོས་ཚོགས་འཐུས་མི་སུ་སན་ཀྲམ་པལ་མན་ལགས་དང་། གྲོས་ཚོགས་འཐུས་མི་ཤཱ་རོན་ཀེ་ལེ་ཊོན་ལགས། གྲོས་ཚོགས་གོང་མའི་འཐུས་མི་ཇེ་ནེ་ཊི་ར་ཧི་སི་ལགས་ཀྱིས་བོད་དོན་ཞུ་གཏུག་གི་གལ་གནད་དང་། ཉེ་ལམ་ཁོང་རྣམས་བཞུགས་སྒར་རྡ་རམ་ས་ལར་ཕེབས་པའི་ཉམས་མྱོང་དང་སྦྲགས། བོད་མིའི་སྒྲིག་འཛུགས་ཀྱིས་དབུ་ཁྲིད་པའི་བཙན་བྱོལ་བོད་མིའི་སེམས་ཤུགས་ལ་བསྔགས་བརྗོད་གནང་ཡོད།

གཞན་ཡང་དགོང་ཚིགས་གསོལ་སྟོན་ཐོག་གྲོས་ཚོགས་འཐུས་མི་མ་ཧི་ཀལ་མེག་ཀོར་མེག་ (Michael McCormack) ལགས་དང་། པི་ཊར་ཁ་ལིལ་(Peter Khalil) ལགས། ཨ་ཊམ་བྷན་ཊ་ (Adam Bandt) ལགས། སོ་ཕི་ (Sophie) ལགས། ཇོར་ཊན་ཨི་སི་ཊིལ་ཇོན་ (Jordan Steele-John) ལགས། ཧེ་ལེན་ཧ་ཡི་ནིས་ (Helen Haines) ལགས། ཝ་རིན་ཨིན་ཇི་ (Warren Entsch) ལགས་བཅས་ལྷན་ཞུགས་གནང་ཡོད།

མཐར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གྲོས་ཚོགས་འཐུས་མི་རྣམ་པས་བོད་དོན་ལ་རྒྱབ་སྐྱོར་གཡོ་མེད་གནང་བཞིན་པར་ཐུགས་རྗེ་ལེགས་འབུལ་དང་འབྲེལ། བོད་དོན་བདེན་པའི་འཐབ་རྩོད་ལ་རྒྱལ་སྤྱིའི་རྒྱབ་སྐྱོར་ཐོབ་ཐབས་སུ་འབད་རྩོལ་ཞུམ་མེད་གནང་རྒྱུ་ཡིན་སྐོར་དང་། ཨོསྟྲེ་ལི་ཡཱའི་སྲིད་གཞུང་ངོས་ནས་ད་ཡོད་རིན་ཐང་ཁག་ལ་བརྩི་སྲུང་མུ་མཐུད་ཞུ་བའི་རེ་བ་ཡོད་སྐོར་གསུངས་ཡོད་པ་བཅས།།