༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༢༠ ཉིན་ཨོསྟྲེ་ལི་ཡཱའི་གྲོས་ཚོགས་ནང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཕེབས་བསུ་ཆེ་བསྟོད་གནང་ཡོད་པ་རེད།
དེ་ཡང་གྲོས་ཚོགས་འོག་མའི་ཚོགས་གཞོན་ལྕམ་སྐུ་ཤཱ་རོན་ཀེ་ལེ་ཊོན་ (Sharon Claydon) ལགས་དབུ་བཞུགས་ཐོག་གྲོས་ཚོགས་འཐུས་མི་སོ་ཕི་ཨི་སི་ཀེམ་ (Sophie Scamps) ལགས་དང་། གྲོས་ཚོགས་འཐུས་མི་སུ་སན་ཀྲེམ་པལ་མན་ (Susan Templeman) ལགས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གྲོས་ཚོགས་སུ་ངོ་སྤྲོད་ཕེབས་བསུ་ཞུས་ཐོག་ཁོང་རྣམ་གཉིས་ནས་རྒྱ་ནག་གཞུང་གི་དབང་བསྒྱུར་དྲག་གནོན་འོག་བོད་ནང་རྒྱ་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བོད་ཕྲུག་རྣམས་བཙན་འཇུག་བྱེད་བཞིན་པ་ཐེ་བའི་བོད་ནང་གི་ཛ་དྲག་གནས་སྟངས་དང་། རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གནད་དོན་ལ་ཐེ་བྱུས་བྱེད་བཞིན་པའི་གནས་སྟངས་མཚོན་པའི་བོད་ནང་གི་འགྲོ་བ་མིའི་ཐོབ་ཐང་གནས་བབ་སྐོར་ཐུགས་འཚབ་ཆེན་པོས་གསུང་བཤད་གནང་ཡོད།
དེ་བཞིན་གྲོས་ཚོགས་གོང་མའི་འཐུས་མི་ཇེ་ནེཊ་ར་ཧི་སི་ (Janet Rice) ལགས་ཀྱིས་དཔལ་ལྡན་སྲིད་སྐྱོང་མཆོག་གིས་གཙོས་པའི་བོད་མིའི་སྐུ་ཚབ་རྣམ་པ་གྲོས་ཚོགས་སུ་ཕེབས་བསུ་ཞུས་པ་དང་འབྲེལ། ཨོསྟྲེ་ལི་ཡཱའི་སྲིད་གཞུང་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ལ་རྒྱ་ནག་གཞུང་གི་ཐེ་བྱུས་འགོག་སླད་སྲིད་བྱུས་གཏན་འབེབས་གནང་དགོས་པའི་འབོད་སྐུལ་ཞུས་པའི་ཐོག རྒྱ་ནག་གཞུང་གིས་བོད་རྒྱའི་དཀའ་རྙོག་ཞི་འགྲིག་ཡོང་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གམ་ཁོང་གི་སྐུ་ཚབ་དང་ལྷན་དུ་གྲོས་མོལ་གནང་དགོས་པའི་རེ་འདུན་བཏོན་གནང་ཡོད།
གྲོས་ཚོགས་འཐུས་མི་ལིན་ཊ་རེ་ནོལ་ (Linda Reynolds) ལགས་ཀྱིས་བོད་ནང་དུ་བོད་མིའི་ཆོས་དད་རང་དབང་ལ་རྩིས་མེད་རྡོག་རོལ་ཚབས་ཆེ་གཏོང་བཞིན་པར་རྒྱལ་སྤྱིའི་སྤྱི་ཚོགས་ཀྱིས་བློ་འཚབ་བྱེད་པའི་གནས་སྟངས་མཚོན་པའི་རྒྱ་ནག་གཞུང་གིས་བཙན་དབང་གིས་བོད་ཀྱི་ཆོས་དང་རིག་གཞུང་རྒྱ་སྒྱུར་གཏོང་བཞིན་པའི་ཛ་དྲག་གནས་སྟངས་སྐོར་གསལ་བཤད་དང་སྦྲགས། རྒྱ་ནག་གཞུང་གི་སྟངས་འཛིན་འོག་གི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་རྣམས་ནི་བོད་མིའི་ཕ་མ་དང་ཕྲུ་གུ་རྣམས་ལ་རང་མི་རིགས་ཀྱི་ངོ་བོ་རྒྱུན་འཛིན་བྱེད་རྒྱུའི་གཞི་རྩའི་ཐོབ་ཐང་ལ་རྩིས་མེད་རྡོག་རོལ་གཏང་བ་ཆགས་ཡོད་སྐོར་འགྲེལ་བརྗོད་གནང་རྗེས་གྲོས་ཚོགས་གོང་མའི་འཐུས་མི་ལི་ཊི་ཡ་ཐོར་པེ་ (Lidia Thorpe) ལགས་དང་གྲོས་ཚོགས་གོང་མའི་འཐུས་མི་དེ་བོ་རཱ་ཨོ་ནིལ་ (Deborah O’Neill) ལགས་ཀྱིས་རྒྱ་གཞུང་གིས་བོད་མིའི་ཆོས་དད་རང་དབང་ལ་རྡོག་རོལ་དང་། ཚད་ལས་བརྒལ་བའི་ཉེན་སྲུང་དམ་བསྒྲགས། གཞི་རྒྱ་ཆེ་བའི་བྱ་ར་ཉུལ་ཞིབ། འགྲུལ་སྐྱོད་ལ་དམ་བསྒྲགས་བྱེད་བཞིན་པར་བློ་འཚབ་བསྟན་པ་མ་ཟད། བོད་ནང་རྒྱ་ནག་གཞུང་གིས་རིག་གཞུང་རྩ་མེད་གཏོང་བཞིན་པར་ཨོསྟྲེ་ལི་ཡཱའི་སྲིད་གཞུང་ངོས་ནས་ཡ་ལན་གནང་དགོས་པ་མ་ཟད། མཐུན་ཕྱོགས་རྒྱལ་ཁབ་དང་ལག་སྦྲེལ་གྱིས་མཉམ་འབྲེལ་རྒྱལ་ཚོགས་ཀྱིས་རྒྱ་ནག་གཞུང་གིས་བོད་ཀྱི་རིག་གཞུང་བཙན་སྒྱུར་གཏོང་བཞིན་པའི་གནས་སྟངས་ལ་ཞིབ་འཇུག་གནང་བཞིན་པར་རྒྱབ་སྐྱོར་གནང་དགོས་པའི་རེ་འབོད་ཞུས་ཡོད།
གཞན་ཡང་གྲོས་ཚོགས་གོང་མའི་འཐུས་མི་ཀྲོ་ནི་ཤལ་ཊིན་ (Tony Sheldon) ལགས་དང་། གྲོས་ཚོགས་གོང་མའི་འཐུས་མི་ཇོར་ཊན་ཨི་སི་ཀྲིལ་ཇོན་(Jordon Steele John) ལགས། གྲོས་ཚོགས་གོང་མའི་འཐུས་མི་ནིག་མེག་ཀིམ་ (Nick McKim) ལགས་ཀྱིས་ཀྱང་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་དང་། ཞི་བའི་ངོ་རྒོལ་བ་འཛིན་བཟུང་། བཙན་པོའི་ངལ་རྩོལ་སྒྱུར་བཀོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གནང་སྒོར་རྒྱ་ནག་གཞུང་གིས་ཐེ་བྱུས་བྱེད་པའི་གནས་སྟངས་ལ་ཐུགས་འཚབ་ཆེན་པོ་བསྟན་གནང་ཡོད།
ཕྱོགས་མཚུངས་སྐབས་དེར་ཉེ་སྔོན་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གཅིག་བཞུགས་སྒར་རྡ་རམ་ས་ལར་ཆེད་ཕེབས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་མཇལ་འཕྲད་གནང་བའི་ཉམས་མྱོང་གསུངས་པ་དང་ཆབས་ཅིག བོད་དོན་བདེན་པའི་འཐབ་རྩོད་ལ་རྒྱུན་མཐུད་དེ་རྒྱབ་སྐྱོར་གནང་རྒྱུ་ཡིན་པའི་ཞལ་བཞེས་གནང་ཡོད་པ་རེད།
ཨོསྟྲེ་ལི་ཡའི་གྲོས་ཚོགས་སུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་ལྷན་དུ་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་དང་། ཀེན་བྷེ་ར་བོད་རིགས་སྤྱི་མཐུན་ཚོགས་པའི་སྐུ་ཚབ་བཅས་ལྷན་ཞུགས་གནང་ཡོད་པ་བཅས།།
