ཨོསྟྲེ་ལི་ཡའི་གྲོང་ཁྱེར་སིཌ་ནི་ཁུལ་གྱི་གཞུང་འབྲེལ་མཛད་འཆར་ཁག་ལེགས་པར་གྲུབ་རྗེས་ཨོསྟྲེ་ལི་ཡའི་རྒྱལ་ས་ཁེན་བྷེ་རར་ཕེབས་ཐོན་གྱིས་གནམ་ཐང་དུ་ཕེབས་འབྱོར་སྐབས་ཁེན་བྷེ་ར་བོད་རིགས་ཚོགས་པའི་ཚོགས་གཙོ་གཙོས་པའི་ཚོགས་མི་རྣམ་པ་དང་། བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་ཟུར་པ་དང་སྲི་ཞུའི་ལས་བྱེད་ཟུར་ཁག་གཅིག དེ་བཞིན་བོད་དོན་རྒྱབ་སྐྱོར་བ་དང་། སེར་སྐྱ་མང་ཚོགས་ཁག་གཅིག་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

ཕྱི་དྲོར་དཔལ་ལྡན་སྲིད་སྐྱོང་མཆོག་གིས་ཁེན་བྷེ་ར་ཁུལ་གནས་སྡོད་བོད་མི་དང་ཐུག་འཕྲད་ཀྱིས་གསུང་བཤད་གནང་བའི་སྙིང་པོར། སྐབས་ ༡༦ པའི་བཀའ་ཤག་གི་སྤྱི་ཡོངས་ཀྱི་དགོངས་པ་བཞེས་ཕྱོགས་དང་། བཀའ་ཤག་སྐབས་ ༡༦ པའི་ངོས་ནས་ཆབ་སྲིད་དང་སྤྱི་ཚོགས་བདེ་དོན་སོགས་ལས་དོན་གང་བྱེད་པ་ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་ཤར་བསྐྱོད་བྱེད་རྒྱུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་བོད་མི་རྣམས་ནས་བསམ་ཤེས་དགོས་པ།  བོད་མིའི་སྒྲིག་འཛུགས་ཀྱི་སྒྲོམ་གཞི་བརྟན་པོ་ཇི་ལྟར་བཟོ་ཐབས། བཙན་བྱོལ་བོད་མིའི་གཞིས་ཆགས་ཁག་རྒྱུན་གནས་ཐུབ་ཐབས་དང་བོད་མི་མི་ཉུང་བ་ཞིག་ལ་སྡོད་ཁང་གི་དཀའ་ངལ་འཕྲད་བཞིན་པར་སེལ་ཐབས། བོད་མིའི་མི་འབོར་ཉུང་དུ་འགྲོ་བཞིན་པ། སོ་སོའི་རྒྱལ་ཁབ་ཀྱི་ལོ་རྒྱུས་ལ་དོ་སྣང་དང་ཤེས་རྟོགས་དགོས་རྒྱུ་ཧ་ཅང་གལ་ཆེན་པོ་ཡིན་སྐོར། 

དེ་བཞིན་རྒྱལ་སྤྱིའི་སྤྱི་ཚོགས་དང་། མང་གཙོ་དང་དྲང་བདེན་ལ་རྒྱབ་སྐྱོར་གནང་མཁན་གཞུང་དང་བཅས་པར་རྒྱལ་རབས་ལོ་རྒྱུས་ཀྱི་ཐོག་ནས་བོད་དེ་རང་བཙན་གྱི་རྒྱལ་ཁབ་ཡིན་པ་དང་། བོད་ནང་གི་ད་ལྟའི་ཛ་དྲག་གནས་སྟངས་སྐོར་ངོ་སྤྲོད་འགྲེལ་བརྗོད་དང་གོ་རྟོགས་མཐོ་རུ་གཏོང་ཐབས། རྒྱབ་སྐྱོར་ཐོབ་ཐབས་ཆེད་འབད་བརྩོན་གནང་བཞིན་པ། ཕྱོགས་མཚུངས་ཨ་རིའི་གྲོས་ཚོགས་ནང་བོད་དོན་ཁྲིམས་འཆར་གསར་པ་ངོ་སྤྲོད་སྙིང་བསྡུས་གནང་བ་སོགས་ཀྱི་སྐོར་གསུང་བཤད་གནང་ཡོད། སྐབས་དེར་བཀའ་ཟུར་དང་། སྐུ་ཚབ་དོན་གཅོད་ཟུར་པ། སྲི་ཞུའི་ལས་བྱེད་ཟུར་པ་ཁག་གཅིག་ཕེབས་གནང་ཡོད་པ་བཅས། །