༄༅། །ཕྱི་ལོ་ ༢༠༢༣ ཟླ་བ་ ༦ ཚེས་ ༡༦ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ནིའུ་ཛི་ལེནྜ་རྒྱལ་ས་ཝེ་ལིང་ཊོན་དུ་ཆེད་ཕེབས་ཀྱིས་དང་ཐོག་དེ་ཁུལ་རྟེན་གཞི་བྱས་པའི་ནིའུ་ཛི་ལེནྜ་གཞུང་གི་དཔེ་མཛོད་ཁང་དུ་བོད་ཀྱི་གྲོགས་པོ་དང་། སྙིང་རྗེ་སྤྱི་ཚོགས་ཞབས་ཞུ་ཚོགས་པའི་ཚོགས་མི། ཆོས་སྡེ་ཁག་གི་སློབ་ཕྲུག་ཁག་གཅིག་བཅས་དང་ལྷན་དུ་ཚོགས་མཇལ་གྱིས་བོད་དོན་དང་འབྲེལ་བའི་གསུང་བཤད་གནང་བའི་ནང་། རྒྱ་ནག་གཞུང་གིས་བོད་ཀྱི་མི་རིགས་རྩ་བརླག་ཏུ་གཏོང་ཆེད་སྲིད་བྱུས་འདྲ་མིན་ལག་བསྟར་བྱེད་བཞིན་པའི་ཛ་དྲག་གི་གནས་སྟངས་དང་།  བོད་ཀྱི་ཁོར་ཡུག་གནས་སྟངས།  བོད་ཀྱི་ཆོས་དང་རིག་གཞུང་གི་གལ་གནད་སོགས་ཀྱི་སྐོར་གསུང་བཤང་གནང་ཡོད། དེ་བཞིན་ཁོང་རྣམས་ནས་ལོ་མང་རིང་བོད་དོན་ཐོག་དོ་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་གསུངས།ཉིན་རྒྱབ་ནིའུ་ཛི་ལེནྜ་གྲོས་ཚོགས་སུ་གྲོས་ཚོགས་འཐུས་མི་སྐུ་ཞབས་(Simon O’ Connor, National Party Spokesperson for Foreign Affairs and Co-Chair of Inter-Parliamentary Alliance on China)མཆོག་གི་གོ་སྒྲིག་འོག་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་གནང་བའི་ནང་(ACT)སྲིད་དོན་ཚོགས་པའི་གྲོས་ཚོགས་འཐུས་མི་སྐུ་ཞབས་(James Mcdowall)མཆོག་དངོས་སུ་མཉམ་ཞུགས་དང་། ལྗངས་ཁུ་སྲིད་དོན་ཚོགས་པའི་གྲོས་ཚོགས་འཐུས་མི་ (Golriz Gharaman) མཆོག་དང་། ངལ་རྩོལ་སྲིད་དོན་ཚོགས་པའི་གྲོས་ཚོགས་འཐུས་མི་ (Helen White) མཆོག་རྣམ་གཉིས་དྲྭ་ལམ་བརྒྱུད་མཉམ་ཞུགས་གནང་ཡོད།

སྐབས་དེར་དཔལ་ལྡན་སྲིད་སྐྱོང་མཆོག་གིས་ད་ལྟའི་བོད་ནང་གི་ཛ་དྲག་གི་གནས་སྟངས་དང་། ལྷག་པར་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། མི་རིགས་བཅས་རྩ་བརླག་ཏུ་གཏོང་བཞིན་པའི་ཛ་དྲག་གནས་སྟངས།  དེ་བཞིན་བོད་ཀྱི་ཆོས་དང་རིག་གཞུང་གི་གལ་གནད། བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུའི་གལ་གནད་སྐོར་གསུངས་ཡོད་པ་མ་ཟད། རིང་མིན་ནིའུ་ཛི་ལེནྜ་སྲིད་བློན་མཆོག་རྒྱ་ནག་ཏུ་འཚམས་གཟིགས་ཕེབས་གཏན་ཁེལ་ཡོད་པར་སོང་། ཁོང་གིས་འབྲེལ་ཡོད་རྒྱ་ནག་དཔོན་རིགས་ཁག་དང་མཉམ་བོད་ཀྱི་གནད་དོན་སྐོར་གླེང་སློང་གནང་རྒྱུའི་རེ་འདུན་ཞུས་རྗེས་ཨིས་ཊོབ་(Stuff)གསར་འགྱུར་ལས་ཁང་གི་གསར་འགོད་པ་ཐོ་མ་སི་(Thomas Manch)ལགས་ཀྱི་བཅར་འདྲིར་དང་ལེན་དང་། དེ་ནས་དཔལ་ལྡན་སྲིད་སྐྱོང་མཆོག་གྲོས་ཚོགས་ཚོགས་ཁང་དུ་གཟིགས་སྐོར་དུ་གདན་ཞུ་གནང་ཡོད། 

གོང་གསལ་མཇལ་མོལ་སྐབས་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་དང་།  ས་གནས་ཨོག་ལེཌ་བོད་རིགས་མཐུན་ཚོགས་ཀྱི་ཚོགས་གཙོ་། སྲིད་སྐྱོང་འཚམས་གཟིགས་གོ་སྒྲིག་ཚོགས་ཆུང་གི་ཚོགས་གཙོ་བཅས་མཉམ་ཞུགས་གནང་ཡོད། ནིའུ་ཛི་ལེནྜ་རྒྱལ་ཁབ་ནང་གི་གཞུང་འབྲེལ་མཛད་འཆར་ཁག་ལེགས་གྲུབ་ཟིན་རྗེས་ཚེས་ ༡༧ སྔ་དྲོ་ཨོསྟྲེ་ལི་ཡཱ་གྲོང་ཁྱེར་སིཌ་ནིར་ཕེབས་ཐོན་གནང་རྒྱུ་ཡིན་པ་བཅས།།