༄༅། །ཕྱི་ལོ་ ༢༠༢༣ ཟླ་བ་ ༠༦ ཚེས་ ༡༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ནིའུ་ཛི་ལེནྜ་གྱི་གྲོང་ཁྱེར་ཨོག་ལེན་ཌི་ཁུལ་གྱི་གཞུང་འབྲེལ་མཛད་འཆར་ཁག་དབུ་འཛུགས་གནང་ཡོད།

དེ་ཡང་ཐོག་མར་ནིའུ་ཛི་ལེནྜ་གཞུང་གི་རླུང་འཕྲིན་ཁང་དང་། ཉིན་རེའི་གསར་ཤོག་ (New Zealand Herald) ཞེས་པ་གཉིས་ཀྱི་གསར་འགོད་པའི་བཅར་འདྲིར་དང་ལེན་གནང་ཞིང་། ཉིན་རྒྱབ་ནིའུ་ཛི་ལེནྜ་གྱི་གྲོང་ཁྱེར་ཨོག་ལེན་ཌི་རུ་རྟེན་གཞི་བྱས་པའི་དཔལ་སྤུངས་ཆོས་ཚོགས་སུ་ཁུལ་དེར་གནས་སྡོད་བོད་མི་རྣམས་དང་ཐུག་འཕྲད་ཀྱིས་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས། སྐབས་ ༡༦ པའི་བཀའ་ཤག་གི་སྤྱི་ཡོངས་ཀྱི་དགོངས་པ་བཞེས་ཕྱོགས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་གཞིར་བཞག་གིས་ཕྱག་ལས་གནང་བཞིན་པའི་སྐོར།གཞན་ཡང་བོད་མིའི་སྒྲིག་འཛུགས་ཀྱི་སྒྲོམ་གཞི་བརྟན་པོ་ཇི་ལྟར་བཟོ་ཐབས། བཙན་བྱོལ་བོད་མིའི་གཞིས་ཆགས་ཁག་རྒྱུན་གནས་ཐུབ་ཐབས་དང་བོད་མི་མི་ཉུང་བ་ཞིག་ལ་སྡོད་ཁང་གི་དཀའ་ངལ་འཕྲད་བཞིན་པར་སེལ་ཐབས། བོད་ནས་བཙན་བྱོལ་དུ་ཕེབས་མཁན་ཧ་ཅང་ཉུང་དུ་ཕྱིན་པའི་སྐོར། སོ་སོའི་རྒྱལ་ཁབ་ཀྱི་ལོ་རྒྱུས་ལ་དོ་སྣང་དང་ཤེས་རྟོགས་དགོས་རྒྱུ་ཤིན་ཏུ་གལ་ཆེན་པོ་ཡིན་སྐོར།  རྒྱལ་སྤྱིའི་སྟེང་བོད་དོན་གནས་བབ་མཐོ་རུ་གཏོང་ཐབས་སུ་འབད་བརྩོན་གནང་བཞིན་པ། དེ་བཞིན་ཨ་རིའི་གྲོས་ཚོགས་ནང་ངོ་སྤྲོད་གནང་འཆར་ཡོད་པའི་བོད་དོན་ཁྲིམས་འཆར་གསར་པའི་སྐོར་ངོ་སྤྲོད་སྙིང་བསྡུས་གནང་རྗེས་མང་ཚོགས་ཁྲོད་ནས་བསམ་འཆར་དང་།  དྲི་བར་ལན་འདེབས་གསལ་བཤད་གནང་།དེ་རྗེས་དཔལ་ལྡན་སྲིད་སྐྱོང་མཆོག་གིས་མུ་མཐུད་ནིའུ་ཛི་ལེནྜ་གྱི་གྲོང་ཁྱེར་ཨོག་ལེན་ཌ་ནང་རྟེན་གཞི་བྱས་པའི་ (Ellerslie War Memorial Hall) ཞེས་པའི་ཚོགས་ཁང་ནང་དགོང་ཚིགས་རྒྱས་སྟོན་དང་འབྲེལ་མཛད་སྒོ་ཞིག་ཚོགས་པའི་ཐོག་གདན་ཞུས་ལྟར་ཆེད་ཕེབས་ཀྱིས་རྒྱ་ནག་གཞུང་ནས་བོད་ནང་དྲག་གནོན་ཅན་གྱི་སྲིད་བྱུས་འདྲ་མིན་ལག་བསྟར་བྱེད་བཞིན་པའི་ཛ་དྲག་གི་གནས་སྟངས་དང་།  བོད་དོན་དང་འབྲེལ་བའི་ཆབ་སྲིད་གནས་ལུགས། འཛམ་གླིང་ནང་རྒྱ་ནག་གི་གནོན་ཤུགས་ཇི་ལྟར་སྤྲོད་བཞིན་པ་སོགས་ཀྱི་སྐོར་གསུང་བཤད་གནང་བ་མ་ཟད། བོད་དོན་རྒྱབ་སྐྱོར་བ་རྣམས་ནས་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཞུས། མཛད་སྒོའི་སྟེང་དཔལ་ལྡན་སྲིད་སྐྱོང་མཆོག་ལ་བོད་རིགས་མཐུན་ཚོགས་ནས་ཐུགས་རྗེ་ཆེ་ཞུའི་ཚུལ་དུ་དྲན་རྟེན་ཕྱག་རྟགས་དང་། གཞས་སྣ་འཁྲབ་སྟོན་གནང་ཡོད། སྐབས་དེར་ནིའུ་ཛི་ལེནྜ་གྲོས་ཚོགས་ཀྱི་ཚོགས་གཞོན་ཟུར་པ་དང་། ནིའུ་ཛི་ལེནྜ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་པོ་སྐུ་ཞབས་ཨ་ཡན་རཱ་ཝིལ་ (Ian Ravell) མཆོག་གིས་གསུང་བཤད་དང་། བོད་དོན་རྒྱབ་སྐྱོར་ཚོགས་པ། (Friends of Tibet)  བོད་ཕྲུག་རོགས་སྐྱོར་ཚོགས་པ། (Tibetan Children Relief Society) བོད་རྒྱ་མཛའ་འབྲེལ་ཚོགས་པ་ (Chinese-Tibetan Friendship Association) བཅས་ཀྱི་ཚོགས་མི་རྣམས་ནས་སོ་སོའི་ཚོགས་པའི་སྐོར་ངོ་སྤྲོད་གནང་ཡོད།མཛད་སྒོའི་ཐོག་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས།ནིའུ་ཛི་ལེནྜ་བོད་རིགས་མཐུན་ཚོགས་དང་། བོད་དོན་རྒྱབ་སྐྱོར་ཚོགས་པ། མན་ཇུ་རིག་གཞུང་ཚོགས་པ་བཅས་ཀྱི་ཚོགས་མི་རྣམས་དང་། ཆོས་སྡེ་ཁག་གི་སློབ་ཕྲུག་སོགས་ཕེབས་ཡོད་ཅིང་།  མཛད་སྒོ་དེ་བཞིན་ཨོག་ལེན་ཌིའི་བོད་རིགས་མཐུན་ཚོགས་ནས་གོ་སྒྲིག་ཞུས་ཡོད་པ་བཅས།།