༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕྱི་ལོ་ ༢༠༢༣ ཟླ་བ་ ༦ ཚེས་ ༡༣ ནས་ ༢༥ བར་ནིའུ་ཛི་ལེནྜ་དང་ཨོསྟྲེ་ལི་ཡཱ་གཉིས་སུ་གཞུང་འབྲེལ་ཕྱོགས་ཕེབས་ཀྱི་མཛད་འཆར་ཡོད་པ་ལྟར། ཕྱི་ལོ་ ༢༠༢༣ ཟླ་བ་ ༦ ཚེས་ ༡༤ དགོང་མོར་ནིའུ་ཛི་ལེནྜ་གྲོང་ཁྱེར་ཨོཀ་ལེནཌ་དུ་ཕེབས་འབྱོར་གནང་ཞིང་། གནམ་ཐང་དུ་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེང་གེ་ལགས་དང་།  ཨོཀ་ལེནཌ་བོད་རིགས་ཚོགས་པའི་ཚོགས་གཙོ་གཙོས་པའི་རྒྱུན་ལས་རྣམ་པ། དེ་བཞིན་བོད་རྒྱ་མཛའ་འབྲེལ་ཚོགས་པའི་ཚོགས་མི་དང་། བོད་རིགས་སེར་སྐྱ་མང་ཚོགས་བཅས་ནས་དགའ་བསུའི་སྣེ་ལེན་གཟབ་རྒྱས་ཞུས་ཡོད།ཕྱི་ཚེས་ ༡༥ ཉིན་བོད་རིགས་མང་ཚོགས་དང་བོད་དོན་རྒྱབ་སྐྱོར་ཚོགས་པ་ཁག་གི་ཚོགས་མི་དང་མཇལ་འཕྲད་ཀྱིས་གསུང་བཤད་གནང་རྒྱུ་དང་། ཕྱོགས་མཚུངས་གསར་འགོད་པ་ཁག་གཉིས་ཀྱི་བཅར་འདྲི་དང་ལེན་གནང་རྒྱུ་བཅས་ཀྱི་མཛད་འཆར་ཡོད་འདུག ད་རེས་དཔལ་ལྡན་སྲིད་སྐྱོང་མཆོག་ནིའུ་ཛི་ལེནྜ་ཁུལ་དུ་གཞུང་འབྲེལ་འཚམས་གཟིགས་ཕེབས་ཐེངས་དང་པོ་ཆགས་ཀྱི་ཡོད་འདུག་པ་བཅས།།