༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༦ པའི་ཚེས་ ༡༦ ཉིན་སྦིར་སྡེ་དགེ་དཔལ་ལྡན་ལྷུན་གྲུབ་སྟེང་གི་མདུན་ཐང་དུ་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་ ༦༥ འཁོར་བའི་དུས་དྲན་དང་། ཛ་སག་དམག་སྤྱི་ཨ་འབྲུག་མགོན་པོ་བཀྲ་ཤིས་མཆོག་སྐུ་གཤེགས་ནས་མི་ལོ་ ༦༠ འཁོར་བའི་རྗེས་དྲན། རྒྱལ་ཡོངས་ཚོགས་ཆེན་ ༢༣ པའི་དབུ་འབྱེད་བཅས་ཀྱི་མཛད་སྒོ་ཚོགས་གནང་སོང་།སྐབས་དེའི་མཛད་སྒོའི་སྐུ་མགྲོན་གཙོ་བོར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དམིགས་བསལ་སྐུ་མགྲོན་རྣམ་པ།  གཞན་སྐུ་མགྲོན་དུ་བོད་མི་མང་སྤྱི་འཐུས་རྣམ་པ། སྤྱི་ཟུར་རྣམ་པ།  ཆུ་སྒང་དབུས་རྒྱུན་རྣམ་པ། གསར་དུ་བདམས་ཐོན་བྱུང་བའི་དབུས་རྒྱུན་རྣམ་པ། ས་གནས་ཁག་གི་སྐུ་ཚབ། མང་ཚོགས་བཅས་ཆེད་ཕེབས་གནང་འདུགམཛད་སྒོའི་ཐོག་སྐུ་མགྲོན་གཙོ་བོ་དཔལ་ལྡན་ཚོགས་གཙོ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་རྗེས། དུས་དྲན་དང་འབྲེལ་བའི་གསུང་བཤད་གནང་དོན། མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་འདི་ཉིད་ཕྱི་ལོ་ ༡༩༥༨ ལོའི་ཟླ་ ༢ པའི་ནང་ཨ་འབྲུག་ཚང་གི་མཆོད་ཁང་ནང་གནད་ཡོད་མི་སྣ་ཁག་ཅིག་ལྷན་འཛོམས་ཀྱིས་གོ་བསྡུར་བྱུང་རྗེས། ལོ་འདིའི་ཟླ་ ༦ པའི་ཚེས་ ༡༦ ཉིན་ཡོངས་ཁྱབ་གསལ་བསྒྲགས་གནང་སྟེ་དམག་གི་སྒྲིག་འཛུགས་དབུ་བརྙེས་པ་ཞིག་ཡིན་ཞིང་། དེ་ཡང་སྒྲིག་འཛུགས་ཀྱི་དམིགས་ཡུལ་གཙོ་བོ་ནི་རྒྱ་དམར་བོད་ནས་མཐར་སྐྲོད་གཏོང་རྒྱུ་དང་། བོད་ཀྱི་རང་དབང་རང་བཙན་སླར་གསོ་གནང་རྒྱུས་མཚོན་པའི་བོད་ཀྱི་བསྟན་པ་མི་ཉམས་གོང་སྤེལ་ཡོང་རྒྱུའི་ཆེད་དུ་བཙུགས་པ་ཞིག་ཆགས་ཀྱི་ཡོད། སྐབས་དེ་དུས་བོད་ཀྱི་ཆབ་སྲིད་ཀྱི་གནས་སྟངས་ཧ་ཅང་གི་ཛ་དྲག་དང་གཉན་འཕྲང་ཆེན་པོ་ཞིག་ཆགས་བསྡད་དུས། ཚང་མས་སོ་སོའི་རྒྱུ་ནོར་ལོངས་སྤྱོད་དང་། ནུས་པ་གང་ཡོད་ཀྱི་ཐོག་ནས་བློས་གཏོང་ཆེན་པོ་གནང་སྟེ། རྒྱ་དམར་གཞུང་ལ་གདོང་ལེན་གནང་ཡོད་པ་རེད།དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༩ ཟླ་ ༣ པའི་ཚེས་ ༡༧ ཉིན་བཙན་བྱོལ་ལ་ཕེབས་སྐབས། ཐོག་མར་ལྷོ་ཁ་ལྷུན་རྩེ་རྫོང་ལ་ཆུ་སྒང་དམག་གི་ཐོག་ནས་རྒྱ་དམར་ཚང་མ་མཐར་སྐྲོད་བཏང་རྗེས། ལྷུན་རྩེ་རྫོང་ལ་བོད་གཞུང་གསར་འཛུགས་ཀྱི་ཡོངས་ཁྱབ་གསལ་བསྒྲགས་བསྐྱངས་ཐུབ་པ་བྱུང་ཡོད། རྗེས་སུ་༧སྐྱབས་མགོན་རིན་པོ་ཆེ་མཆོག་དང་། བཀའ་ཤག་ལྷན་རྒྱས། དེ་བཞིན་སྐུ་འཁོར་དང་བཅས་པ་རྒྱ་གར་ལ་ཕེབས་ཏེ། ཐོག་མར་ཏེཛ་པུར་གྲོང་ཁྱེར་ལ་ཕེབས་འབྱོར་རྗེས། རྒྱ་ནག་དམར་གཞུང་གིས་བཙན་དབང་འོག་ཕྱི་ལོ་ ༡༩༥༡ ལོར་བཞག་པའི་གྲོས་མཐུན་དོན་ཚན་བཅུ་བདུན་ཟེར་བ་དེར་ངོས་ལེན་མེད་པའི་ཡོངས་ཁྱབ་གསལ་བསྒྲགས་གནང་བ་དང་། དེ་ནས་མ་སུ་རིར་བོད་གཞུང་བསྐྱར་གསོ་གནང་སྟེ། ཐོག་མར་ཕྱི་སྲིད་དང་། ནང་སྲིད། དཔལ་འབྱོར་འདུ་འགོད་ལས་ཁུངས། ལྡི་ལི་དོན་ཁང་བཅས་ལས་ཁུངས་ཆེ་ཁག་ཁ་ཤས་དེ་མ་ཐག་ཏུ་གསར་འཛུགས་གནང་བ་དང་།ཕྱི་ལོ་ ༡༩༦༠ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་གནའ་སྔ་མོའི་ཆབ་སྲིད་ལམ་ལུགས་ཕ་ཤུལ་བུ་འཛིན་གྱིས་གནས་སྟངས་དེར་འགྲིག་གི་མེད་པར་གཟིགས་ནས་རྒྱལ་སྤྱིའི་གནས་བབ་དང་མཐུན་པའི་ཐོག་ནས་མང་གཙོའི་ལམ་ལུགས་ཐོག་བསྐྱོད་རྒྱུའི་སླད། ཕྱི་ལོ་ ༡༩༦༠ ལོའི་ཟླ་ ༢ པའི་ནང་བོད་ཆོལ་གསུམ་ཆོས་བརྒྱུད་དང་བཅས་པའི་སྐུ་ཚབ་རྣམས་ནས་གནས་མཆོག་རྡོ་རྗེ་གདན་དུ་མནའ་གན་མཐུ་མོ་ཆེ་བཞག་པ་དང་། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོལ་ཁ་གསུམ་ནས་འཐུས་མི་གསུམ་རེ་དང་། ཆོས་བརྒྱུད་ཆེན་པོ་བཞི་ནས་འཐུས་མི་གཅིག་རེ་འདེམས་དགོས་པའི་བཀའ་སློབ་བཀའ་དྲིན་སྩལ་བ་བཞིན་ལོ་དེའི་ཟླ་བ་ ༩ ཚེས་ ༢ སྤྱི་འཐུས་སྐབས་དང་པོས་དམ་འབུལ་ཞུས་གནང་ཡོད་པ་དང་། དེ་རྗེས་རིམ་པས་ལོ་ལྟར་ཕྱི་ཟླ་ ༩ ཚེས་ ༢ ཉིན་མོ་དེ་མང་གཙོའི་དུས་ཆེན་སྲུང་བརྩི་བྱེད་བཞིན་ཡོད།བཙན་པོའི་ལོ་རྒྱུས་ཐོག་བལྟས་པ་ཡིན་ན། བོད་ཆོས་རྒྱལ་མེས་དབོན་རྣམ་གསུམ་གྱི་སྐབས་སུ་ད་ལྟའི་བོད་ཆོལ་ཁ་གསུམ་གྱིས་མཚོན་པའི་འཛམ་གླིང་སུམ་ཉིས་ལ་དབང་བསྒྱུར་བྱས་པའི་གནས་བབ་དེ་འདྲ་བྱུང་ཡོད། ༸རྒྱལ་དབང་སྐུ་ཕྲེང་ལྔ་པའི་སྐབས་དགའ་ལྡན་ཕོ་བྲང་གི་གཞུང་དབུ་བརྙེས་པའི་དུས་སུ། ལོ་རྒྱུས་ཉམས་ཞིབ་པ་ཚོས་གསུང་སྟངས་བྱས་ན། ༸རྒྱལ་དབང་སྐུ་ཕྲེང་ལྔ་པའི་དགོངས་པར་བོད་བཙན་པོའི་སྐབས་ཀྱི་ས་ཁྱོན་ལ་དབང་བསྒྱུར་གནང་རྒྱུའི་གནས་བབ་འདྲ་རེད་འདུག་ཅེས་གསུང་གི་ཡོད། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནང་ཆབ་སྲིད་ཀྱི་ཐུགས་འགན་བཞེས་པའི་སྐབས་དུས་ཚོད་ཧ་ཅང་གཉན་འཕྲང་ཅན་དང་། དགུང་ལོ་ཡང་ ༡༦ ཆགས་ཀྱི་ཡོད། རྒྱ་དམར་གྱི་བཙན་གནོན་འོག་དགོངས་པ་ཇི་བཞིན་མ་བྱུང་བའི་གནས་སྟངས་ཆགས་ཀྱི་ཡོད། དེ་ནས་བཙན་བྱོལ་ནང་ཕེབས་འབྱོར་བྱུང་མ་ཐག་བོད་ཆོལ་ཁ་གསུམ་ཡོངས་རྫོགས་ལ་མང་གཙོ་གསོལ་སྩལ་གནང་སྟེ། ཐོབ་ཐང་འདྲ་མཉམ་གྱི་གོ་སྐབས་གནང་རྒྱུས་མཚོན་པའི་བོད་བཙན་པོའི་དབང་བསྒྱུར་འོག་གཏོགས་པའི་མི་མང་ཚང་མར་གཅིག་མཚུངས་ཀྱི་གཟིགས་སྐྱོང་གནང་ཡོད་པ་ཙམ་མ་ཟད། བོད་ཀྱི་ཆོས་དང་། སྐད་ཡིག རིག་གཞུང་དང་བཅས་པའི་གཅིག་བསྒྱུར་ཡིན་པའི་བོད་ཆོལ་ཁ་གསུམ་ཚང་མ་སྐྱིད་ན་སྐྱིད་མཉམ་དང་། སྡུག་ན་སྡུག་མཉམ་ཀྱི་དགོངས་པ་བཞེས་ཏེ། ད་ལྟའི་ཆར་ཆབ་སྲིད་ཀྱི་གནས་བབ་ཐོག་ནས་བལྟས་ན། རྒྱལ་སྤྱིའི་ནང་བོད་དོན་ཟེར་དུས་ཚང་མས་དོ་སྣང་གནང་དགོས་པ་ཞིག་དང་། རྒྱལ་སྤྱིའི་གཞུང་དང་གྲོས་ཚོགས་ཚང་མའི་ཐོག་ནས་རྒྱབ་སྐྱོར་ཤུགས་ཆེ་ཤོས་གནང་སའི་བཙན་བྱོལ་སྒྲིག་འཛུགས་གཞན་དང་མི་འདྲ་བ་ཞིག་ཆགས་ཡོད་པ་རེད།དེ་ཡང་བོད་ཆོལ་ཁ་གསུམ་གྱི་ཐོག་ནས་མགོན་པོ་གང་གི་དགོངས་པ་ཇི་བཞིན་ཤར་བསྐྱོད་བྱས་ཐུབ་པའི་གནས་བབ་ལ་བརྟེན་ནས་ད་ལྟ་ང་ཚོ་བཙན་བྱོལ་བ་གཞན་དང་མ་འདྲ་བའི་གནས་སྟངས་ཤིག་ཆགས་བསྡད་ཡོད། དེར་བརྟེན་ཚང་མས་སོ་སོའི་ངོ་བོ་ངོས་འཛིན་བྱེད་ཐུབ་དགོས་པ་དེ་གལ་ཆེན་པོ་ཡིན་པ་དང་། མི་རབས་གཞོན་པ་ཚོས་དེ་དག་རྒྱུན་མཐུད་དེ་བོད་དོན་བདེན་མཐའ་གསལ་རྒྱུའི་སླད་ཆ་ཤས་བཞེས་ཐུབ་དགོས་པ་དང་། དེ་བཞིན་༸སྐྱབས་མགོན་རིན་པོ་ཆེའི་ཆབ་སྲིད་སྐྱོང་ཕྱོགས་ཀྱི་དགོངས་པ་གཞིར་བཟུང་ང་ཚོ་ཚང་མས་མདུན་བསྐྱོད་བྱེད་ཐུབ་དགོས་པ་ཧ་ཅང་གི་གལ་ཆེན་པོ་རེད།དེ་བཞིན་བཙན་བྱོལ་ནང་མི་མང་གི་བདེ་དོན་དང་། ཆབ་སྲིད་ཀྱི་འཐབ་རྩོད་ཆེད་གཞུང་དང་། གཞུང་འབྲེལ་མིན་པའི་ཚོགས་པ་མང་པོ་ཞིག་བཙུགས་ཡོད། དེ་ཡང་མདོ་ཁམས་ཆུ་བཞི་སྒང་དྲུག་གི་ཚོགས་པ་འདི་ཉིད་གཞུང་འབྲེལ་མིན་པའི་ཚོགས་པ་ཞིག་ཡིན་ཞིང་། ཚོགས་པ་འདི་གཅིག་ནས་ཆོལ་ཁ་གཅིག་གི་ངོོ་བོ་མཚོན་ཐུབ་པ་དང་། གཉིས་ནས་ཐོག་མར་ཚོགས་པ་དེ་བོད་བསྟན་སྲིད་ཆེད་བཙུགས་པ་ཡིན་པ། དམིགས་ཡུལ་དེ་གཞིར་བཟུང་བྱས་ནས་ད་ལྟ་མདོ་ཁམས་རྒྱ་ཆེའི་མང་ཚོགས་ཐོག་ནས་ཡིད་ཆེས་དང་། རེ་བ་ཆེན་པོ་གནང་གི་ཡོད་པ་རེད། སྐབས་ཐོག་སོ་སོའི་འགན་ཁུར་མཁན་རྣམ་པས་དཀའ་ངལ་རྣམས་ལ་བཟང་ཕྱོགས་ཀྱི་གདོང་ལེན་བྱས་ནས་ད་ཆ་གྲུབ་འབྲས་དམིགས་འདོན་བྱེད་ཐུབ་པའི་གནས་བབ་ཅིག་ཆགས་ཡོད། ད་ལྟ་གོང་དུ་ཚོགས་གཙོས་གསུངས་པ་ལྟར། ཚོགས་པ་འདིའི་ནང་ཚང་མས་ཐེ་ཚོམ་མེད་པའི་ཐོག་ནས་ཆ་ཤས་བཞེས་རྒྱུ་དང་། ཕྱག་ལས་གནང་ཐུབ་དགོས་པ་གལ་ཆེན་པོ་ཆགས་ཀྱི་ཡོད་པ་རེད། མཚམས་རེ་ཆབ་སྲིད་པའི་བྱེད་ཕྱོགས་དང་། ཡང་མཚམས་རེ་ང་ཚོར་དཀའ་ངལ་འདྲ་མིན་འཕྲད་རྒྱུའི་གནས་སྟངས་ཀྱི་ཐོག་ནས་དེར་ཁག་དཀྲི་ནས་སོ་སོའི་འགན་ཇི་བཞིན་མ་བླངས་ཏེ་ལས་དོན་འཐུས་ཤོར་བཏང་བའི་གནས་སྟངས་དེ་འདྲ་ཡོང་གི་འདུག དེ་འདྲ་མ་ཡིན་པར་སོ་སོ་གང་ཡིན་པ་དངོས་ཡོད་ཀྱི་ཐོག་ནས་མདུན་བསྐྱོད་བྱེད་ཐུབ་དགོས་པ་དེ་གལ་ཆེན་པོ་རེད་ཅེས་དེ་གཅིག་ཞུ་རྒྱུ་ཡིན།ཚོགས་པ་འདིའི་དམིགས་ཡུལ་གཅིག་དེ་བསྟན་པ་སྲུང་སྐྱོབ་བྱེད་རྒྱུ་དེ་རེད། སྐབས་དེ་དུས་རྒྱལ་བསྟན་ཆབ་སྲིད་ཅེས་པའི་ཚིག་དེ་མང་བ་བེད་སྤྱོད་གནང་གི་འདུག ཚོགས་པ་འདིའི་ཐོག་ནས་དམིགས་བསལ་གྱིས་རླབས་ཆེ་བའི་བྱས་རྗེས་བཞག་ཡོད། དུས་ད་ལྟ་ཡིན་ནའང་ང་ཚོའི་སེམས་ནང་ཚོགས་པ་འདིར་བློ་ཉེ་པོའི་ཐོག་ནས་བསམ་བློ་འཁོར་ཡོང་གི་འདུག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཚོན་པའི་རིས་མེད་ཀྱི་བླ་ཆེན་མང་པོ་ཞིག་བཙན་བྱོལ་ནང་ཆིབས་བསྒྱུར་གནང་ཐུབ་ཡོད། ཆིབས་བསྒྱུར་གནང་བའི་རྗེས་ལ། མགོན་པོ་མཆོག་གིས་མཚོན་པའི་བླ་ཆེན་རྣམ་པའི་དགོངས་པ་གཞིར་བཟུང་བོད་ཀྱི་བསྟན་པ། དེ་ཡང་ལུང་དང་རྟོགས་པའི་བསྟན་པ་འཆད་ཉན་གྱི་ཐོག་ནས་ལོ་ངོ་དྲུག་ཅུའི་ནང་གདན་ས་ཁག་གིས་མཚོན་པའི་དགོན་སྡེ་ཁག་གི་ནང་བསླབ་པ་སློབ་གཉེར་གནང་སྟེ། བོད་དང་། ཧི་མ་ལ་ཡ་ཙམ་མིན་པར་ནང་ཆོས་ཀྱི་ཐ་སྙད་ལའང་དེ་སྔོན་དོ་སྣང་མེད་པའི་འཛམ་གླིང་ཡུལ་གྲུ་ཁག་མང་པོའི་ནང་ནང་ཆོས་ཁྱབ་པ་དང་། དོ་སྣང་གསར་པ་ཞིག་སླེབས་བཞིན་པ་ཆགས་ཀྱི་འདུག དེ་ཚོའི་ཐོག་ལའང་ཚོགས་པ་འདིའི་ཐོག་ནས་ཞབས་འདེགས་དམིགས་བསལ་བསྒྲུབས་ཡོད།གཞན་ཡང་ཇོ་བོ་ཝ་ཏི་བཟང་པོའི་སྐུ་དེ་བཞིན་བལ་ཡུལ་ནས་རྒྱ་གར་ལ་གདན་འདྲེན་ཞུས་པ་དང་། དེ་སྔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་གཅིག་ཕེབས་ཡོད་པ་རེད། བཙན་བྱོལ་ནང་༸རྒྱལ་དབང་སྐུ་ཕྲེང་ལྔ་པས་མཛད་པའི་དག་སྣང་གསང་བ་རྒྱ་ཅན་ཞེས་པའི་ཕྱག་དཔེ་དེ་མ་རག་པའི་དཀའ་ངལ་བྱུང་བའི་སྐབས་ཤིག་ལ་ཆུ་བཞི་སྒང་དྲུག་གི་དམག་མི་ཞིག་གིས་ཕྱག་དཔེ་དེ་བསྣམས་ཕེབས་སོང་ཞེས་དམིགས་བསལ་གྱི་རྟེན་འབྲེལ་འདྲ་པོ་ཞིག་བྱུང་ཡོད། དེ་འདྲ་བའི་བྱས་རྗེས་ཀྱི་ལོ་རྒྱུས་མང་པོ་ཤོད་རྒྱུ་ཡོད་རེད་དྲན་གྱི་ཡོད། ཚོགས་པ་འདིའི་ཐོག་མའི་དམིགས་ཡུལ་གཞིར་བཟུང་ད་བར་བོད་ཀྱི་ཆབ་སྲིད་དང་། རིག་གཞུང་། ནང་བསྟན་བཅས་སྲུང་སྐྱོབ་ཐོག་རླབས་ཆེན་གྱི་ཞབས་འདེགས་བསྒྲུབས་ཡོད་སྟབས། དེ་རིང་ང་ཚོས་བོད་བསྟན་སྲིད་ཐོག་བྱས་རྗེས་ཅན་རྣམས་རྗེས་དྲན་ཞུ་རྒྱུ་དང་། རྣམ་པ་ཚོས་བོད་ཀྱི་ཆབ་སྲིད་ཀྱི་འཐབ་རྩོད་ཐོག་ལ་ཆ་ཤས་བཞེས་ནས་བློས་གཏོང་ཐུབ་དགོས་པ། དེ་དང་འབྲེལ་བའི་ཐོག་སངས་རྒྱས་ཀྱི་བསྟན་པ་མི་ཉམས་གོང་སྤེལ་སླད་ང་ཚོས་སྲི་ཞུ་བསྒྲུབ་དགོས་པ་སོགས་མུ་མཐུད་བོད་ཀྱི་བསྟན་སྲིད་སླད་བྱས་རྗེས་འཇོག་གནང་དགོས་པ་གལ་ཆེན་པོ་རེད། གང་ཡིན་ཟེར་ན། བསྟན་སྲིད་གཉིས་ཀྱི་ཐོག་བོད་ཀྱི་བདེན་མཐའ་གསལ་དགོས་པའི་གནས་སྟངས་ཤིག་ཆགས་ཀྱི་ཡོད་པ་རེད།བོད་ནང་རྒྱ་ནག་དམར་གཞུང་གིས་གདུག་རྩུབ་མནར་གཅོད་འོག་བོད་ཀྱི་རིག་གཞུང་དང་བཅས་པ་རྩ་མེད་གཏོང་རྒྱུའི་སྲིད་བྱུས་འཛིན་བཞིན་ཡོད་ཀྱང་། ཁོང་རྣམ་པས་བོད་ཀྱི་ཆོས་དང་། རིག་གཞུང་སྲུང་སྐྱོབ་ཆེད་སྙིང་སྟོབས་ཞུམ་པ་མེད་པར་ཆོད་སེམས་རི་བོ་ལྟར་བརྟན་པོར་གནས་ནས་བོད་དོན་ཆེད་རང་ལུས་མེར་བསྲེགས་གནང་རྒྱུས་མཚོན་པའི་ལས་འགུལ་སྣ་ཚོགས་སྤེལ་བའི་ཐོག་ནས་བཙོན་ཁང་ནང་ད་དུའང་གདུག་སྦྱོང་མནར་གཅོད་མྱངས་དང་མྱོང་བཞིན་ཡོད་པ་རེད། ང་ཚོ་རང་དབང་ནང་ཡོད་མཁན་ཚོས་སོ་སོའི་ལྟོ་གོས་ཙམ་ལ་མགོ་འཁོར་ནས་མ་བསྡད་པར། བོད་བསྟན་སྲིད་དང་མི་རིགས་རིག་གཞུང་དང་བཅས་པའི་དོན་དུ་དུས་ཚོད་བཏང་ནས་ཞབས་འདེགས་བསྒྲུབ་རྒྱུའི་ཐོག་རྒྱུན་དུ་ནས་བསམ་བློ་གཏོང་དགོས་པ་གལ་ཆེན་པོ་རེད།སང་ཉིན་ནས་རྒྱལ་ཡོངས་ཚོགས་ཆེན་འགོ་འཛུགས་ཀྱི་ཡོད་པ་རེད། སྐབས་དེ་དུས་ཆུ་སྒང་དབུས་དང་། ས་གནས་ཁག་གི་ལས་བསྡོམས་དང་རྩིས་ཁྲ་སོགས་སྙན་སྒྲོན་དང་། མ་འོངས་ལས་འཆར་སོགས་ཀྱི་ཐོག་གོ་བསྡུར་ཡོང་གི་ཡོད་དུས། མི་རབས་རྒན་པ་ཚོའི་ཐོག་མའི་དམིགས་ཡུལ་དང་། འགན་བཞེས་ཕྱོགས་ལྟར་ལས་འཆར་བང་བསྒྲིག་ཐུབ་དགོས་པ་གལ་ཆེན་པོ་ཆགས་ཀྱི་ཡོད་པ་རེད། ད་བར་ཆུ་བཞི་སྒང་དྲུག་གི་དབུས་རྒྱུན་མང་པོ་ཞིག་གིས་ཕྱག་ལས་གནང་ཡོད། ཁོང་རྣམ་པར་བསྔགས་བརྗོད་ཞུ་རྒྱུ་དང་། ད་ལྟ་རྒྱུན་ལས་གསར་པའི་ནང་བཀའ་ཟུར་འཁོར་ལྷ་ཚང་བསོད་ནམས་སྟོབས་རྒྱལ་ལགས་དང་། དེ་ལས་གཞན་པའི་རྒྱུན་ལས་གཞོན་སྐྱེས་མང་པོ་ཞིག་ཕེབས་ཡོད། ཚོགས་པ་དེ་ཚགས་ཚུད་པོ་དང་། ཡག་པོ་ཡོང་རྒྱུར་ཚང་མས་འབད་བརྩོན་གནང་དགོས་པ་གལ་ཆེན་པོ་རེད་ཅེས་ཞུ་རྒྱུ་ཡིན།གཞན་ཡང་དེ་རིང་གི་དུས་དྲན་གཅིག་དེ། ཛ་སག་ཨ་འབྲུག་མགོན་པོ་བཀྲ་ཤིས་མཆོག་སྐུ་གཤེགས་ནས་ལོ་ངོ་ ༦༠ འཁོར་བའི་དུས་དྲན་ཆགས་ཀྱི་ཡོད། ཁོང་གིས་བོད་བསྟན་སྲིད་ཆེད་བློས་གཏོང་ཆེན་པོ་གནང་ཡོད། ཡོངས་གྲགས་སུ་ཛ་སག་དམག་སྤྱི་ཨ་འབྲུག་མགོན་པོ་བཀྲ་ཤིས་ཞེས་འབོད་ཀྱི་ཡོད་ཀྱང་། མཚམས་རེ་དབུས་ཀྱི་ཐ་སྙད་ལ་ཨ་འབྲུག་སྦྱིན་བདག་ཅེས་འབོད་སྲོལ་ཡོད་ཅིང་། ཁོང་གིས་གདན་ས་གསུམ་གྱིས་མཚོན་པའི་རིས་སུ་མ་མཆིས་པའི་ཆོས་བརྒྱུད་ཁག་ལ་བསྟན་པའི་སྦྱིན་བདག་གནང་བ། ཆབ་སྲིད་ཀྱི་དཀའ་ངལ་ཉག་ཕྲ་བའི་སྐབས་སུ་ཨ་འབྲུག་ཚང་གི་མཆོད་ཁང་ནང་བསྟན་སྲུང་དང་བླངས་དམག་གི་སྒྲིག་འཛུགས་དབུ་འཛུགས་གནང་རྒྱུའི་གོ་བསྡུར་གནང་བ་སོགས་བོད་དོན་ཆེད་བློས་གཏོང་ཆེན་པོ་གནང་ཡོད། ང་ཚོའི་ངོས་ནས་ཁོང་གི་མཛད་རྗེས་རྣམས་ལ་སློབ་སྦྱོང་བྱས་ནས་གཞན་ལ་ངོ་སྤྲོད་དང་། ཁོང་གི་དམུགས་ཡུལ་རྣམས་རྒྱུན་མཐུད་གནང་ཐུབ་དགོས་པ་དེ་གལ་ཆེན་པོ་ཆགས་ཀྱི་ཡོད།ཆུ་སྒང་སྒྲིག་འཛུགས་ཀྱིས་བོད་བསྟན་སྲིད་ཆེད་བློས་གཏོང་གནང་བ་རྣམས་བོད་སྤྱིའི་ལོ་རྒྱུས་ནང་མཛད་རྗེས་ཆེན་པོ་བཞག་ཡོད། ད་ལྟ་ང་ཚོ་བོད་མིའི་སྒྲིག་འཛུགས་ཀྱིས་༸སྐྱབས་མགོན་རིན་པོ་ཆེའི་དགོངས་གཞི་གཞིར་བཟུང་གཉིས་སྨན་དབུ་མའི་ལམ་གྱི་སྲིད་བྱུས་འཛིན་བཞིན་ཡོད་རེད། ཡིན་ནའང་། དེ་ནུས་པ་འཐོན་རྒྱུར་ལོ་རྒྱུས་ཐོག་བོད་རང་བཙན་ཡིན་པའི་གནས་བབ་དེ་ཁུངས་སྐྱེལ་བྱེད་དགོས་འདུག་ཅེས་སློབ་སྟོན་པ་མང་པོ་ཞིག་གིས་གསུང་བཞིན་ཡོད། ང་ཚོའི་ངོས་ནས་ཀྱང་ལོ་རྒྱུས་ཀྱི་ཐོག་ནས་རང་བཙན་ཡིན་པའི་གནས་བབ་བསྒྲུབ་ཐུབ་དགོས་ཀྱི་ཡོད་ཅེས་ཞུ་རྒྱུ་ཡིན། མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པ་དང་། ཆུ་བཞི་སྒང་དྲུག་གི་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན་ཞེས་གསུངས་སོང་།གཞན་ཡང་དཔལ་ལྡན་ཚོགས་གཙོ་མཆོག་གིས་ཆུ་སྒང་གི་དྲུང་ཆེ་སྙིང་མིག་ལགས་ཀྱིས་རྩོམ་སྒྲིག་གནང་བའི་ ” མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་ལོ་རྒྱུས་དང་འབྲེལ་བའི་དྲིས་ལན་སུམ་བརྒྱ་པ། ” དབུ་འབྱེད། ཆུ་སྒང་དབུས་འོས་བསྡུ་ཚོགས་ཆུང་དང་རྩིས་ཞིབ་ཚོགས་ཆུང་གི་ཚོགས་མི་རྣམས་ལ་ཐུགས་རྗེ་ཆེ་ཞུའི་ཕྱག་རྟགས་དང་། སྦིར་ས་ཁུལ་དུ་ཡོད་པའི་ཆུ་སྒང་དམག་ཟུར་རྣམས་ལ་བཀའ་དྲིན་རྗེས་དྲན་གྱི་ཆེ་བསྟོད་གཟེངས་རྟགས་བཅས་གནང་སོང་།

དེ་བཞིན་སྦིར་བཟོ་ལས་ཚོགས་པའི་ངོས་ནས་སྐུ་མགྲོན་གཙོ་བོ་མཆོག་ལ་ཕྱག་རྟགས་འབུལ་བཞེས་དང་།  སྐབས་ ༢༢ དབུས་རྒྱུན་རྣམས་ལ་ཐུགས་རྗེ་ལེགས་འབུལ། སྐབས་ ༢༣ པའི་དབུས་རྒྱུན་རྣམས་ལ་འཚམས་འདྲིའི་ཕྱག་རྟགས་སོགས་ཕུལ་སོང་། ཉིན་རྒྱབ་སྦིར་སྡེ་དགེ་དང་། ནང་ཆེན། ལི་ལི་གྲོང་སྡེ། རྡ་ས་རིག་གཞུང་ཚོགས་པ་བཅས་ཀྱིས་རིག་གཞུང་འཁྲབ་སྟོན་གཟིགས་འབུལ་ཞུས་གནང་ཡོད་པ་བཅས། །