༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༣༠ ཉིན་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཤེས་ཡོན་དང་། ཚན་རིག རིག་གཞུང་། འགྲོ་བ་མིའི་ཐོབ་ཐང་ལས་དོན་ཚོགས་ཆུང་གིས་རྒྱ་ནག་གཞུང་ནས་བོད་ཕྲུག་རྣམས་རྒྱ་རིགས་སུ་བཙན་སྒྱུར་གཏོང་བཞིན་པ་མ་ཟད། བོད་ཀྱི་ཆོས་དད་རང་དབང་ལ་ཐེ་བྱུས་ཤུགས་ཆེ་བྱེད་བཞིན་པར་ཐུགས་འཚབ་བསྟན་པའི་གྲོས་ཆོད་གཏན་འབེབས་གནང་ཡོད།
དེ་ཡང་ཉེ་ལམ་མཉམ་འབྲེལ་རྒྱལ་ཚོགས་ཀྱི་ཆེད་མཁས་པའི་ཞིབ་འཇུག་སྙན་ཐོའི་ནང་རྒྱ་གཞུང་གིས་བོད་ནང་བོད་ཕྲུག་རྣམས་འཆར་གཞི་ལྡན་པའི་ཐོག་ནས་རང་ཁྱིམ་ལས་ཁ་ཕྲལ་ནས་མི་སེར་སྤེལ་ཡུལ་གྱི་གཏན་འཇགས་སློབ་གྲྭར་བཙན་འཇུག་བྱེད་པར་བློ་འཚབ་བསྟན་པ་ལྟར། གྲོས་ཆོད་དུ་རྒྱ་ནག་གཞུང་ནས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་བོད་ཕྲུག་བཙན་འཇུག་བྱེད་རྒྱུ་མཚམས་འཇོག་གིས་བོད་ཕྲུག་རྣམས་ལ་རང་གི་སྐད་ཡིག་རིག་གཞུང་སྦྱོང་སྤྱོད་བྱེད་རྒྱུའི་ཐོབ་ཐང་སྤྲོད་དགོས་པའི་འབོད་སྐུལ་གནང་ཡོད་པ་རེད།
གཞན་ཡང་གྲོས་ཆོད་ནང་རྒྱ་ནག་དམར་ཤོག་གཞུང་གིས་བོད་ཀྱི་ལོ་རྒྱུས་རང་བཞིན་ལྡན་པའི་༧གོང་ས་ཏཱ་ལའི་བླ་མ་དབུས་པའི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་པར་དགག་བྱ་གནང་ཡོད་པ་མ་ཟད། རྒྱ་གཞུང་གི་བྱེད་སྒོ་དེ་ནི་བོད་མིའི་ཆོས་དད་རང་དབང་ལ་རྡོག་རོལ་བཏང་བ་ཆགས་ཡོད་སྐོར་གསུངས།
ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་གྲོས་ཆོད་དེ་བརྒྱུད་ཅེཀ་སྤྱི་མཐུན་རྒྱལ་ཁབ་ཀྱི་སྲིད་གཞུང་ངོས་ནས་རྒྱ་ནག་དང་འབྲེལ་བ་གནང་སྐབས་བོད་ནང་གི་ཛ་དྲག་གནས་སྟངས་ལ་ཐུགས་སྣང་གིས་རྒྱ་ནག་གཞུང་ནས་བོད་ནང་གི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཕྱིར་བསྡུ་མཚམས་འཇོག་དང་། བོད་མིའི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོ་གཙོས་པའི་ཆོས་དད་རང་དབང་ལ་གུས་བརྩི་ཞུ་རྒྱུར་འབོད་སྐུལ་གནང་དགོས་པའི་བཀོད་བྱུས་གནང་ཡོད། གྲོས་ཚོགས་ཀྱི་ཚོགས་ཆུང་གིས་གཏན་འབེབས་གྲོས་ཆོད་དེ་ཉིད་ཚོགས་ཆུང་གི་ཚོགས་གཙོས་གྲོས་ཚོགས་གོང་མའི་ཚོགས་གཙོ་དང་། ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན། ཕྱི་སྲིད་བློན་ཆེན་བཅས་ལ་ཕུལ་དགོས་པའི་ལམ་སྟོན་གནང་ཡོད་པ་རེད།
སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ནང་གྲོས་ཚོགས་ཀྱི་ཤེས་ཡོན་དང་ཚན་རིག རིག་གཞུང་། འགྲོ་བ་མིའི་ཐོབ་ཐང་ལས་དོན་ཚོགས་ཆུང་དང་། ལྷག་པར་ཚོགས་ཆུང་གི་ཚོགས་གཞོན་དང་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་པེ་རེམ་སེལ་ར་བ་སི་ (Premysl Rabas) མཆོག་གིས་དེ་སྔའི་ཚོགས་འདུའི་ཐོག་གྲོས་མོལ་བྱུང་དོན་བཞིན་གྲོས་ཆོད་གཏན་འབེབས་གནང་བར་ཐུགས་རྗེ་ལེགས་འབུལ་ཞུས་ཏེ། གྲོས་ཆོད་འདིས་སླར་ཡང་ཅེཀ་སྤྱི་མཐུན་རྒྱལ་ཁབ་ཀྱིས་བོད་དང་བོད་མིར་རྒྱབ་སྐྱོར་དང་གདུང་སེམས་མཉམ་སྐྱེ་ཤུགས་ཆེ་གནང་བ་མཚོན་ཐུབ་པ་དང་། གྲོས་ཆོད་འདི་ལ་བརྟེན་ནས་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ནང་དུ་བོད་ནང་གི་ཛ་དྲག་གནས་སྟངས་སྐོར་གྲོས་ཆོད་གཏན་འབེབས་གནང་ཐུབ་པའི་རེ་བ་ཡོད་སྐོར་གསུངས་ཡོད་པ་བཅས།།
