༄༅། །ཕྱི་ལོ་ ༢༠༢༣ ཟླ་བ་ ༦ ཚེས་ ༡༡ ཉིན་དྷ་སྟེང་བོད་ཁྱིམ་རྩེད་ཐང་དུ་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་གསེར་གྱི་རྟགས་མའི་རྩེད་འགྲན་ཐེངས་ ༢༨ པའི་ཉིན་མཐའ་མའི་མཇུག་སྡོམ་མཛད་སྒོ་ཞིག་ཚོགས་ཡོད།

དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣ ཙམ་ལ་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་ཀངྒ་རཱ་རྫོང་གི་རྫོང་དཔོན་སྐུ་ཞབས་ནི་པུན་ཇིན་ཌལ་ (Dr Nipun Jindal) མཆོག་དང་། དམིགས་བསལ་སྐུ་མགྲོན་དཔལ་ལྡན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག བོད་མི་མང་སྤྱི་འཐུས་ཁག་གཅིག དེ་བཞིན་བཀའ་དྲུང་གིས་གཙོས་པའི་ལྷན་ཁང་ཁག་གི་དྲུང་ཆེ་ཆུང་ཁག་གཅིག གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ། རྡ་ས་གཙོ་བོར་གྱུར་པའི་ཕྱོགས་མཐའ་འདྲ་མིན་ནས་ཕེབས་པའི་རྐང་རྩེད་སྤོ་ལོར་སྤྲོ་སྣང་དང་དགའ་ཞེན་ཆེ་བའི་མི་ཚོགས་སྟོང་ཕྲག་བརྒལ་བ་འདུ་འཛོམས་ཀྱིས་ཐོག་མར་འཕགས་བོད་གཉིས་ཀྱི་རྒྱལ་གླུ་བླངས།དེ་ནས་བོད་བསྟན་སྲིད་མི་རིགས་ཀྱི་བདེ་དོན་ཆེད་རང་སྲོག་ཚུན་བློས་གཏོང་གནང་མཁན་གྱི་རྒྱལ་གཅེས་པ་ཕོ་མོ་འདས་སོན་ཡོངས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་གྲུབ་མཚམས་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་གསེར་གྱི་རྟགས་མའི་རྩེད་འགྲན་ཐེངས་ ༢༨ པའི་གོ་སྒྲིག་ཚོགས་ཆུང་གི་ཚོགས་གཙོ་དྷ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་དགའ་བསུའི་གསུང་བཤད་དང་། བོད་རྒྱལ་ཡོངས་རྩེད་རིགས་ཆུང་གི་རྒྱུན་ལས་འཕྲིན་ལས་བྱམས་པ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་གྲུབ་རྗེས་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་གསེར་གྱི་རྟགས་མའི་རྩེད་འགྲན་ཐེངས་ ༢༨ པའི་མཐའ་མའི་རྩེད་འགྲན་དྷ་ས་རུ་ཁག་དང་དོན་གྲུབ་གླིང་བོད་མིའི་གཞིས་ཆགས་ཀྱི་རྐང་རྩེད་སྤོ་ལོ་རུ་ཁག་གཉིས་དབར་རྩེད་འགྲན་འགོ་བརྩམས་པ་དང་ཆབས་ཅིག་དྷ་ས་རུ་ཁག་གིས་སྤོ་ལོ་ ༢ དང་། དོན་གྲུབ་གླིང་བོད་མིའི་གཞིས་ཆགས་ཀྱི་རྐང་རྩེད་སྤོ་ལོ་རུ་ཁག་གིས་སྤོ་ལོ་ ༡ བླུགས་ཏེ་ཐེངས་འདིའི་རྒྱལ་ཡུམ་ཆེན་མོའི་དྲན་རྟེན་རྐང་རྩེད་སྤོ་ལོའི་གསེར་གྱི་རྟགས་མ་དེ་བཞིན་དྷ་ས་རུ་ཁག་གིས་རྒྱལ་ཁ་བླངས་ཡོད་པ་བཅས། །