༄༅། །འདི་གར་བལ་ཡུལ་དོན་གཅོད་ཁང་ནས་བཏང་གནས་ནང་འཁོད་དོན། བལ་ཡུལ་ཀཐ་མན་གྲུའི་ནང་དཔལ་ལྡན་ཕུག་པའི་ལུགས་ལྟར་ལྔ་པ་སྣྲོན་ཟླའི་ཚེས་བཅུ་དང་སྟབས་བསྟུན་གྱི་བོད་བསྟན་སྲིད་སྤྱི་དང་། ལྷག་པར་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭའི་༸ཞབས་རིམ་སོགས་སྤྱི་མཐུན་བསོད་ནམས་གསོག་སླད་བལ་ཡུལ་དོན་ཁང་གི་དབུ་འཁྲིད་ཐོག་ཀཐ་མན་གྲུ་མ་ཧཱ་གུ་རུའི་འབུམ་ཚོགས་ཚོགས་ཆུང་ནས་གོ་སྒྲིག་ཞུས་ཏེ་ཉིན་གྲངས་གསུམ་རིང་མ་ཧཱ་གུ་རུའི་འབུམ་ཚོགས་འབུལ་གཤོམས་དང་། ཉིན་གཅིག་བསྟན་སྲིད་དང་། སྐུ་ཕྱྭའི་ཞབས་རིམ་བཅས་ཉིན་གྲངས་བཞིའི་རིང་དགོན་སྡེ་གྲྭ་ཚང་ཁག་ནས་དགེ་འདུན་པ་དང་། བཙུན་མ་རྣམས་ཕེབས་སྲོལ་ཇི་ལྟར་ཡོད་པ་བཞིན་ཕྱི་ལོ་ ༢༠༢༣ ཟླ་བ་ ༦ ཚེས་ ༢༦ སྟེ་བོད་ཟླ་ ༥ ཚེས་ ༨ ཉིན་རིས་མེད་ཆོས་བརྒྱུད་ཁག་གི་ཆོས་སྡེ་སོ་སོར་གཞུང་འབྲེལ་གསལ་བསྒྲགས་སྔོན་སོང་ལྟར་དབུ་བཞུགས་༸སྐྱབས་རྗེ་ཤྲཱི་ཆུ་བཟང་རིན་པོ་ཆེ། ཤེལ་དཀར་ཆོས་སྡེའི་མཁན་རིན་པོ་ཆེ། ཞེ་ཆེན་བསྟན་གཉིས་དར་རྒྱས་གླིང་གི་རྡོ་རྗེ་སློབ་དཔོན་འགྱུར་མེད་སྤྱིན་པ་མཆོག་གིས་གཙོས་ཆོག་གྲྭ་བ་དང་།དེ་བཞིན་འབུམ་ཚོགས་ཉིན་དང་པོར་གྲྭ་བཙུན་ཕེབས་མཁན་རྣམས་ཀྱི་དགོན་པ་ཁག་ནི། ཤེལ་དཀར་ཆོས་སྡེ་དགའ་ལྡན་བཤད་གླིང་གྲྭ་ཚང་། ཀོ་པན་འོག་མིན་བྱང་ཆུབ་ཆོས་གླིང་། ཀོ་པན་བཙུན་དགོན་མཁའ་སྤྱོད་དགའ་འཁྱིལ་གླིང་། ཤྲཱི་ཆུ་བཟང་བསམ་གཏན་ཡང་རྩེ། རོང་ཤར་ཆུ་དབར་དགའ་ལྡན་འགྲོ་ཕན་གླིང་། སྤོ་རོང་པདྨ་ཆོས་གླིང་། ཞེ་ཆེན་བཻ་རོ་གླིང་། ལི་པིང་གྲྭ་ཚང་། རི་དགོན་བཀྲ་ཤིས་ཆོས་གླིང་། ཀླུ་གན་རྒྱལ་ལྷུན་གྲུབ་ཆོས་གླིང་། ཇོ་ནང་དགོན་ནང་བསྟན་གཙུག་ལག་སློབ་གླིང་། དེ་བཞིན་སྔགས་པ་དང་སྐྱ་བོ་མི་མང་བཅས་ཤེལ་དཀར་ཆོས་སྡེ་དགའ་ལྡན་བཤད་གླིང་གྲྭ་ཚང་དུ་མ་ཧཱ་གུ་རུའི་འབུམ་ཚོགས་ཉིན་དང་པོ་དབུ་འཛུགས་ཞུས་ཡོད་པ་བཅས། །