༄༅། །སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་འོས་སྤྲུལ་ས་བོན་དུ་མའི་ནང་ནས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་༸ཀུན་གཟིགས་པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་བྲལ་དུ་ངོས་འཛིན་གནང་བའི་གསལ་བསྒྲགས་མཛད་རྗེས་ཉིན་གསུམ་པ་སྟེ། ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་པཎ་ཆེན་ཆུང་སྲིད་རིན་པོ་ཆེ་དང་། ཡབ་ཡུམ། ནང་མི། བྱ་བྲལ་རིན་པོ་ཆེ་བཅས་བཙན་ཁྲིད་བྱས་པ་ནས་བཟུང་ད་བར་གར་སོང་ཆ་མེད་དུ་གྱུར་ཏེ་ལོ་ངོ་ ༢༨ འཁོར་བཞིན་ཡོད།
ཕྱི་ལོ་ ༢༠༢༣ ཟླ་བ་ ༥ ཚེས་ ༡༧ ཉིན་ཁེན་བྷེ་ར་བོད་རིགས་མཐུན་ཚོགས་ཀྱི་ཚོགས་མི་རྣམས་ཀྱིས་གཙོས་ས་གནས་བོད་མི་རྣམས་ནས་རྒྱ་ནག་གཞུང་ལ་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་དང་། ཡབ་ཡུམ། ནང་མི་བཅས་སྐུ་གཟུགས་གསལ་ཐང་ཡིན་མིན་དང་གང་དུ་ཡོད་མེད་ཀྱི་གནས་ཚུལ་ཡོངས་ཁྱབ་ཀྱི་གསལ་བསྒྲགས་བྱེད་དགོས་པའི་འབོད་སྐུལ་གནང་ཡོད།
དེ་ཡང་ཁེན་བྷེ་ར་བོད་རིགས་མཐུན་ཚོགས་ཀྱི་ཚོགས་མི་རྣམས་དང་ས་གནས་བོད་མི་རྣམས་ཀྱིས་རྒྱ་ནག་གཞུང་ཚབ་ཁང་གི་མདུན་དུ་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་འཕྲལ་དུ་གློད་བཀྲོལ་གཏོང་དགོས་པའི་དགོས་འདུན་དང་ངོ་རྒོལ་སྐད་འབོད་ཀྱི་ལས་འགུལ་སྤེལ་གནང་ཡོད་པ་མ་ཟད། ཁུན་སི་ལན་ཊི་དང་། གནས་མཁར་གསར། པར་ཐི་ཁུལ་གྱི་ས་གནས་བོད་མི་རྣམས་ནས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་རྒྱ་ནག་གཞུང་གིས་བཙན་ཁྲིད་བྱས་པ་ནས་བཟུང་ད་བར་གར་སོང་ཆ་མེད་དུ་གྱུར་ཏེ་ལོ་ངོ་ ༢༨ འཁོར་བཞིན་པ་དྲན་གསོ་དང་། རྒྱ་ནག་གཞུང་གིས་བོད་ཀྱི་ཆོས་བརྒྱུད་ཁག་གི་གནད་ཡོད་མི་སྣ་དང་། དབུ་ཁྲིད། བོད་དོན་ཞུ་གཏུག་པ་རྣམས་ཚུད་པའི་བོད་ནང་གི་བོད་མི་སྤྱིའི་ཐོག་སྡུག་སྦྱོང་མནར་སྤྱོད་གཏོང་བཞིན་པ་འཕྲལ་དུ་མཚམས་འཇོག་བྱེད་དགོས་པའི་འབོད་སྐུལ་གནང་ཡོད།
གཞན་ཡང་ཝིག་ཊོ་རི་ཡ་ཁུལ་གྱི་བོད་མི་རྣམས་ཀྱིས་མེལ་བྷོན་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་དུ་མདུན་དུ་ཞི་བའི་སྒོ་ནས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་འཕྲལ་དུ་གློད་བཀྲོལ་གཏོང་དགོས་པའི་སྐད་འབོད་གནང་ཡོད་པ་དང་། སྐབས་དེར་ཨོསྟྲེ་ལི་ཡཱ་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟླ་བ་བཟང་མོ་ལགས་ཞི་བའི་སྐད་འབོད་ལས་འགུལ་ནང་མཉམ་ཞུགས་ཀྱིས་རྒྱ་ནག་གཞུང་ལ་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གང་དུ་ཡོད་མེད་དང་། སྐུ་གཟུགས་གསལ་ཐང་ཡིན་མིན་གྱི་གནས་ཚུལ་ཡོངས་ཁྱབ་ཀྱི་གསལ་བསྒྲགས་བྱེད་དགོས་པའི་འབོད་སྐུལ་གནང་ཡོད་པ་མ་ཟད། རྒྱ་ནག་གཞུང་གིས་བོད་མིའི་ཆོས་དད་རང་དབང་ཐོག་དམ་བསྒྲགས་བྱེད་བཞིན་པའི་ཐད་རྒྱལ་སྤྱིའི་ཚོགས་སྡེ་ཁག་ནས་མཐའ་གཅིག་ཏུ་ངོ་རྒོལ་གནང་དགོས་པའི་འབོད་སྐུལ་ཡང་ཡོད་པ་བཅས།།
