༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༡༡ ཉིན་ཨོསྟྲེ་ལི་ཡཱ་བོད་དོན་ལྷན་ཚོགས་དང་། ཨོསྟྲེ་ལི་ཡཱ་སྐུ་ཚབ་དོན་ཁང་། ཨོསྟྲེ་ལི་ཡའི་བོད་རིགས་སྤྱི་མཐུན་ཚོགས་པ་བཅས་ཀྱི་མཐུན་འགྱུར་འོག་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་རྣམས་ལ་བོད་དོན་ངོ་སྤྲོད་ཀྱི་ཚོགས་འདུ་ཞིག་བསྐོང་ཚོགས་གནང་ཡོད་པ་རེད།

དེ་ཡང་བོད་དོན་ངོ་སྤྲོད་ཚོགས་འདུའི་དམིགས་ཡུལ་གཙོ་བོ་ནི་བོད་དོན་ལ་རྒྱབ་སྐྱོར་གནང་མཁན་གྲོས་ཚོགས་འཐུས་མི་གསར་པ་རྣམས་ལ་བོད་དོན་སྤྱི་དང་ཡང་སྒོས་བོད་ནང་གི་ད་ལྟའི་ཛ་དྲག་གནས་སྟངས་སྐོར་ངོ་སྤྲོད་གནང་རྒྱུ་ཡིན་ཞིང་། སྐབས་དེར་ཚོགས་འདུའི་ཐོག་ཉེ་ལམ་བཞུགས་སྒར་རྡ་རམ་ས་ལར་ཕེབས་མཁན་གྲོས་ཚོགས་ཀྱི་ཚོགས་གཞོན་ཤ་རོན་ཀེ་ལེ་ཊོན་(Sharon Claydon) ལགས་དང་། གྲོས་ཚོགས་འཐུས་མི་སུ་སན་ཀྲེམ་པེ་ལེ་ཊན་(Susan Templeman) ལགས། གྲོས་ཚོགས་གོང་མའི་འཐུས་མི་ཇེ་ནེཊ་ར་ཧི་སི་( Janet Rice) ལགས། གྲོས་ཚོགས་འཐུས་མི་སོ་ཕི་ཨི་སི་ཀེམ་(Sophie Scamps) ལགས་བཅས་ནས་བོད་མིའི་སྒྲིག་འཛུགས་ཀྱི་དབུ་ཁྲིད་མཛད་གཙོ་རྣམ་པ་མཇལ་འཕྲད་ཞུས་པ་དང་། བོད་ཀྱི་གནད་དོན་སྤྱི་དང་བྱེ་བྲག་ཏུ་བཙན་བྱོལ་བོད་མིའི་འཚོ་བའི་སྐོར་གོ་རྟོགས་གཏིང་ཟབ་ལོན་པའི་མྱོང་ཚོར་ཇི་བྱུང་གསལ་བཤད་གནང་ཡོད།

དེ་བཞིན་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ནས་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་བ་དང་ཆབས་ཅིག་གྲོས་ཚོགས་འཐུས་མི་རྣམ་པས་བོད་དོན་ལ་རྒྱབ་སྐྱོར་གཡོ་མེད་གནང་བར་ཐུགས་རྗེ་ལེགས་འབུལ་ཞུས་པ་མ་ཟད། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རིང་མིན་ཕྱི་ཟླ་ ༠༦ ནང་ཨོསྟྲེ་ལི་ཡཱར་ཕེབས་འཆར་ཡོད་སྐོར་བརྡ་ལན་ཕུལ་ཡོད།

ཐེངས་འདིའི་ཚོགས་འདུའི་ཐོག་ཨོསྟྲེ་ལི་ཡཱའི་གྲོས་ཚོགས་འོག་མའི་ཚོགས་གཞོན་ཤ་རོན་ཀེ་ལེ་ཊོན་(Sharon Claydon) ལགས་དང་། སྲིད་བློན་གཞོན་པ་ཟུར་པ་དང་གྲོས་ཚོགས་འཐུས་མི་མ་ཧི་ཀལ་མེག་ཀོར་མེག་(Michael McCormack) ལགས། ཕྱི་འབྲེལ་དང་། བདེ་སྲུང་། ཚོང་འབྲེལ་ལས་དོན་དང་འབྲེལ་བའི་རྒྱུན་ལས་ཚོགས་ཆུང་གི་ཚོགས་གཙོ་ཤཱེ་ནི་ནིའུ་མན་(Shayne Neumann) ལགས་ཐེ་བའི་གྲོས་ཚོགས་འཐུས་མི་དང་ལས་བྱེད་བཅས་ཁྱོན་མི་གྲངས་ ༢༠ མཉམ་ཞུགས་གནང་ཡོད་པ་བཅས།།