༄༅། །སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཐར་མོ་ཕི་ཤར་བཟོ་ཚོང་ཁང་གིས་ཚུལ་མིན་གྱི་ཚོང་ལས་དང་། ལྷག་པར་བོད་མིའི་རིགས་རྫས་དཔེ་མཚོན་བསྡུ་རུབ་ཆེད་རྒྱ་ནག་གཞུང་ལ་ཡོ་བྱད་མཁོ་སྤྲོད་བྱེད་བཞིན་པར་སྐྱོན་བརྗོད་གནང་ཡོད་པ་རེད།
དེ་ཡང་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཐར་མོ་ཕི་ཤར་བཟོ་ཚོང་ཁང་གི་གཙོ་འཛིན་ལ་ཡིག་འབྲེལ་ཞིག་ཕུལ་ཏེ། བཟོ་ལས་ཁང་གིས་རྒྱ་ནག་ལྷན་ཚོང་འབྲེལ་བྱེད་པ་དེས་རྒྱ་ནག་གི་གཞི་རྒྱ་ཆེ་བའི་དྲག་གནོན་ལ་རྒྱབ་སྐྱོར་བྱེད་ཀྱི་ཡོད་སྲིད་པའི་ཉེན་བརྡ་དང་། བཟོ་ཚོང་ཁང་ངོས་ནས་རྒྱ་ནག་དང་ལྷན་དུ་ཚོང་འབྲེལ་བྱེད་སྐབས་དོ་གཟབ་གནང་གལ་ཆེ་བའི་ལམ་སྟོན་དང་སྦྲགས། རྒྱ་ནག་ལ་ཚོང་སྒྱུར་བྱས་པའི་མཁོ་ཆས་རྣམས་ཚུལ་མཐུན་བཀོལ་སྤྱོད་སླད་བྱ་ཐབས་གང་རྩོམ་གྱི་ཡོད་མིན་དང་། མཁོ་ཆས་དེ་དག་བརྒྱུད་རྒྱ་ནག་གཞུང་ནས་ཚུལ་མཐུན་གྱི་སྒོ་ནས་རིགས་རྫས་དཔེ་མཚོན་བསྡུ་རུབ་དང་གྲངས་ཐོ་དཔྱད་ཞིབ་བྱེད་ཀྱི་ཡོད་པའི་དཔང་རྟགས་གནས་ཚུལ་གསལ་སྟོན་དགོས་པའི་འདྲི་རྩད་གནང་ཡོད།
ཉམས་ཞིབ་སྙན་ཐོ་ལྟར་ན། རྒྱ་ནག་གཞུང་གིས་ལས་གཞི་དང་འཕྲོད་བསྟེན་བརྟག་དཔྱད་ལ་སྙད་དེ་རང་ལོ་ལྔ་ཡན་གྱི་བོད་མི་ས་ཡ་གཅིག་ལྷག་གི་རིགས་རྫས་དཔེ་མཚོན་བསྡུ་རུབ་བྱས་ཡོད་པ་དང་། ཛ་དྲག་གནས་སྟངས་དེའི་སྐོར་ཕྱི་ལོ་ ༢༠༢༣ ཟླ་བ་ ༠༣ ཚེས་ ༠༧ ཉིན་སུད་སི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་ལྷན་དུ་ཚོགས་པའི་ཚོགས་འདུའི་སྐབས་བགྲོ་གླེང་ལྷུག་པོ་བྱུང་ཡོད་པ་མ་ཟད། དེ་འབྲེལ་ལས་འགུལ་སྤེལ་དགོས་པའི་སྐོར་གྲོས་ཚོགས་འཐུས་མི་རྣམས་ལ་ཞུ་འབུལ་གནང་ཡོད་པ་རེད།
ཚོགས་འདུའི་སྐབས་སུད་སི་གྲོས་ཚོགས་འཐུས་མི་རྣམ་པས་རྒྱུན་ལྡན་ནས་རྒྱལ་སྤྱི་བཟོ་ཚོང་ཁང་ཁག་གིས་རྒྱ་ནག་གཞུང་དང་ཚུལ་མིན་གྱི་ཚོང་འབྲེལ་བྱེད་བཞིན་པའི་གནས་ཚུལ་ཐེ་བའི་བོད་ནང་གི་ཛ་དྲག་གནས་སྟངས་སྐོར་དོ་སྣང་གནང་གི་ཡོད་སྐོར་གསུངས། སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་གྲོས་ཚོགས་འཐུས་མི་རྣམ་པས་བོད་དོན་སླད་བཞེངས་ཕྱོགས་བརྟན་པོ་བཟུང་བ་མ་ཟད། བོད་རྒྱའི་དཀའ་རྙོག་ཞི་འགྲིག་ཡོང་སླད་རྒྱབ་སྐྱོར་མུ་མཐུད་གནང་བར་དགའ་བསུའི་བསྔགས་བརྗོད་དང་ཐུགས་རྗེ་ལེགས་འབུལ་ཞུས་ཡོད་པ་བཅས།།
