༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༠༡ ཉིན་རྡ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་བོད་མིའི་སྒྲིག་འཛུགས་ཀྱི་སྲི་ཞུ་བ་ལས་བྱའི་སྡེ་ཚན་ཁོངས་སྡེ་འགན་ནས་ལས་དྲུང་བར་གྱི་སྲི་ཞུ་བ་གྲངས་ ༢༥ སྐོར་ལ་ལས་དོན་ཕུགས་འཕེར་ཡོང་སླད་འཛིན་སྐྱོང་དང་འབྲེལ་བའི་ཟབ་སྦྱོང་གནང་འགོ་ཚུགས་ཡོད།
དེ་ཡང་ཟབ་སྦྱོང་གི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་དང་། དྲུང་ཆེ་ཚེ་རིང་དབྱངས་སྐྱིད་ལགས། ཟབ་སྦྱོང་གི་སློབ་སྟོན་པ་རྣམ་པ། དེ་བཞིན་ཚོགས་བཅར་བ་བཅས་ལྷན་འཛོམས་ཐོག་ཟབ་སྦྱོང་དབུ་འབྱེད་གནང་ཡོད་པ་དང་། མཛད་སྒོའི་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་དབྱངས་སུ་གྱེར་རྗེས་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་བརྗོད་གཞི་དང་གསུང་བཤད་པ་ངོ་སྤྲོད་དང་། སློབ་སྟོན་པ་རྣམས་ནས་ཟབ་སྦྱོང་དང་འབྲེལ་བའི་གསུང་བཤད་གནང་གྲུབ་མཚམས་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་དཔེ་ཟུར་དབང་འདུས་ཚེ་རིང་ལགས་ཀྱིས་སྐུ་མགྲོན་གཙོ་བོའི་གསུང་བཤད་གནང་སྐབས་ལོ་སྔོན་མའི་ཟབ་སྦྱོང་ཚགས་ཚུད་དོན་ལྡན་བྱུང་ཡོད་པས་འདི་ལོར་ཡང་དེ་འབྲེལ་ཟབ་སྦྱོང་གོ་སྒྲིག་ཞུས་ཡོད་སྟབས། ཚོགས་བཅར་བ་ལས་བྱེད་རྣམས་ནས་གོ་སྐབས་དམ་འཛིན་གྱིས་སློབ་ཚན་ཁག་ལ་དོ་སྣང་གནང་གལ་ཆེ་ཞིང་། བསླབ་གཞི་དེ་དག་བརྒྱུད་དོ་བདག་སྒེར་སོ་སོར་བཟང་ཕྱོགས་ཀྱི་འགྱུར་བ་ཐེབས་ངེས་ཡིན་ཞེས་དང་། དེང་སྐབས་གོ་ལ་སྤྱི་ཡོངས་ལ་འགྲོ་བ་མིའི་བཟང་སྤྱོད་ཉམས་དམས་སུ་ཕྱིན་པར་བརྟེན་དཀའ་ངལ་མང་དག་ཅིག་འཕྲད་བཞིན་ཡོད་པ་དེ་དག་ལ་འགྲོ་བ་མིས་གདོང་ལེན་བྱེད་དགོས་སྐོར་གསུངས།
དེ་བཞིན་ཁོང་གིས་དབུ་ཁྲིད་ཅེས་པ་་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་གནང་བ་བཞིན་གཞན་གྱི་བདེ་སྡུག་ལ་སེམས་ཁུར་བྱེད་ཐུབ་མཁན་ཞིག་ལ་ཟེར་གྱི་ཡོད་པ་ལྟར། དེ་ལྟར་གནང་གལ་ཆེ་བ་མ་ཟད། སྲི་ཞུ་བ་གཞོན་སྐྱེས་རྣམས་ནི་བོད་མིའི་སྒྲིག་འཛུགས་ཀྱི་འབྱུང་འགྱུར་གྱི་དབུ་ཁྲིད་ཡིན་པས་དེ་དོན་ཧུར་སྐྱེད་གནང་དགོས་པའི་ལམ་སྟོན་གནང་ཡོད་པ་བཅས།།
