༄༅། །རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ཀྱི་ཚོགས་ཐུན་བརྒྱད་བཅུ་གྱ་ལྔ་པ་འཚོག་བཞིན་པ་དང་སྟབས་བསྟུན་ཕྱི་ལོ་ ༢༠༢༣ ཟླ་བ་ ༠༥ ཚེས་ ༡༢ ཉིན་རྒྱལ་ཚོགས་ཀྱི་ཆེད་མཁས་པ་ ༢༣ ནས་བོད་ནང་གི་བུད་མེད་ཀྱི་གནས་སྟངས་དང་། རྒྱ་ནག་གཞུང་གིས་རྒྱལ་ཚོགས་ཀྱི་བུད་མེད་ལ་དབྱེ་འབྱེད་འགོག་ཐབས་ཀྱི་ཁྲིམས་ཡིག་ལག་བསྟར་ཚུལ་བཞིན་བྱེད་མིན་ཞིབ་འཇུག་གནང་ཡོད།
དེ་ཡང་དེ་སྔོན་ཟླ་འདིའི་ཕྱི་ཚེས་ ༠༨ ཉིན་སུད་སི་དོན་ཁང་དང་། བོད་ཀྱི་བུད་མེད་ལྷན་ཚོགས་ཟུང་སྦྲེལ་གྱིས་བོད་ནང་གི་བུད་མེད་གནས་སྟངས་གསལ་སྟོན་བྱས་པའི་བསྒྲགས་གཏམ་སྒྲོགས་སྦྱང་ཞུས་ཐོག་རྒྱལ་ཚོགས་ནས་བོད་ནང་གི་བུད་མེད་ཀྱི་གནས་སྟངས་དང་། རྒྱ་ནག་གཞུང་གིས་རྒྱལ་སྤྱིའི་ཁྲིམས་ཡིག་ལག་བསྟར་བྱེད་མིན་ཞིབ་འཇུག་གནང་དགོས་པའི་འབོད་སྐུལ་ཞུས་ཡོད་པ་རེད།
ཞིབ་འཇུག་ལས་དོན་ནང་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། རྒྱལ་ཚོགས་ཞུ་གཏུག་འགན་འཛིན་སྐལ་ལྡན་མཚོ་མོ་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས། བོད་དོན་ཞུ་གཏུག་མཉམ་སྦྲེལ་གྱི་འབྲེལ་མཐུད་པ་གྷོ་ལོ་རི་ཡ་མོན་ཊོ་གོ་མི་རི་ (Gloria Montgomery) ལགས་ཀྱང་མཉམ་ཞུགས་གནང་ཡོད། སྐབས་དེར་རྒྱལ་ཚོགས་ཀྱི་ཆེད་མཁས་པ་རྣམས་ཀྱིས་རྒྱ་ནག་གཞུང་གི་སྐུ་ཚབ་རྣམས་ལ་རྒྱ་ནག་སྤྱི་དང་བྱེ་བྲག་བོད་དང་ཧོང་ཀོང་སོགས་སུ་བུད་མེད་ཀྱི་གནས་སྟངས་དང་འབྲེལ་བའི་འདྲི་རྩད་ནན་པོ་གནང་བར། རྒྱ་ནག་གི་སྐུ་ཚབ་རྣམས་ནས་ལན་འདེབས་གསལ་པོ་སྤྲད་མེད་པར་བརྟེན་གཙོ་སྐྱོང་བས་ཡང་ཡང་ཐེ་བྱུས་ཀྱིས་གནད་ལ་འཁེལ་བའི་ལན་འདེབས་དགོས་པའི་འབོད་སྐུལ་གནང་དགོས་བྱུང་ཡོད།
བོད་ནང་གི་བུད་མེད་ཀྱི་གནས་སྟངས་དང་འབྲེལ་ཏེ་ཆེད་མཁས་པ་རྣམས་ནས་རྒྱ་ནག་གཞུང་གིས་བཙན་པོ་དབང་ཡོད་ཀྱིས་བོད་མི་འབྲོག་པ་རྣམས་གནས་སྤོ་དང་། བོད་ཀྱི་བུད་མེད་རྣམས་ལ་དམག་རྩལ་རང་བཞིན་ལྡན་པའི་ལས་རིགས་སྦྱོང་བརྡར་སྤྲོད་བཞིན་པ། དམའ་རིམ་ཡོང་འབབ་ཞན་པའི་ལས་རིགས་བཙན་སྐུལ། ཕྱི་བསྐྱོད་ལས་ཁྱེར་བཙན་འཕྲོག གཏན་འཇགས་སློབ་གྲྭ་ཁག་ཏུ་བོད་ཀྱི་སྐད་ཡིག་སློབ་སྤེལ་དང་སེམས་ཁམས་འཕྲོད་བསྟེན་གྱི་གནས་བབ་སོགས་ཀྱི་ཐད་འདྲི་རྩད་ནན་པོ་གནང་ཡོད།
དེ་ཡང་ཆེད་མཁས་པ་རྣམས་ནས་རྒྱ་ནག་གཞུང་གིས་ལས་ཀའི་གོ་སྐབས་སུ་སྙད་དེ་བོད་ཀྱི་བུད་མེད་རྣམས་ལ་དམག་རྩལ་རང་བཞིན་ལྡན་པའི་ལས་རིགས་སྦྱོང་བརྡར་སྤྲོད་བཞིན་པ་མ་ཟད། ཉེ་ལམ་རྒྱལ་ཚོགས་ཀྱི་ཆེད་མཁས་པའི་སྙན་ཐོ་གཞིར་བཟུང་རྒྱ་ནག་གཞུང་གིས་བོད་མི་ཕོན་ཆེ་གྲོང་གསེབ་ནས་གྲོང་ཁྱེར་དུ་གནས་སྤོས་ཀྱིས་གནས་རིམ་དམའ་ཞིང་ཡོང་འབབ་ཞན་པའི་ལས་རིགས་བཙན་སྐུལ་བྱེད་བཞིན་ཡོད་སྐོར་གསལ་བཤད་གནང་བ་དང་སྦྲགས། རྒྱ་ནག་གཞུང་ངོས་ནས་འདས་པའི་ལོ་ངོ་བཅུའི་ནང་བཙན་པོས་གནས་སྤོས་པའི་བོད་མི་ཞིང་འབྲོག་མི་མང་གི་གྲངས་ཐོ་མཁོ་སྤྲོད་དང་། བོད་ཀྱི་གྲོང་གསེབ་བུད་མེད་རྣམས་གནས་རིམ་དམའ་ཞིང་ཡོང་འབབ་ཞན་པའི་ལས་རིགས་ལ་བཙན་སྐུལ་བྱེད་དགོས་པའི་རྒྱུ་མཚན་གསལ་བཤད། དེ་བཞིན་རྒྱ་ནག་གཞུང་གིས་ངལ་རྩོལ་བ་གནས་སྤོའི་ལས་གཞིའི་ཁོངས་སུ་གནས་སྤོས་ཟིན་པའི་བོད་ཀྱི་བུད་མེད་ཀྱི་གྲངས་ཐོ་མཁོ་སྤྲོད་དགོས་པའི་རེ་སྐུལ་གནང་ཞིང་། སྐབས་དེར་རྒྱལ་ཚོགས་ཀྱི་ཆེད་པའི་དྲི་བ་ཁག་ལ་རྒྱ་གཞུང་གི་སྐུ་ཚབ་རྣམས་ནས་ལན་འདེབས་ཁ་གསལ་བརྒྱབ་ཐུབ་མེད།
དེ་བཞིན་ཆེད་མཁས་པ་རྣམས་ནས་བུད་མེད་ལ་དབྱེ་འབྱེད་འགོག་ཐབས་ཀྱི་ཁྲིམས་ཡིག་དགོངས་དོན་རྒྱ་ནག་གཞུང་གི་ཆབ་སྲིད་དང་སྤྱི་ཚོགས་ཀྱི་ལས་གནས་ཆེ་ཁག་ཏུ་བུད་མེད་ཉུང་བའི་གནས་སྟངས་གསལ་སྟོན་དང་འབྲེལ། རྒྱ་གཞུང་ངོས་ནས་ཆབ་སྲིད་དང་འཛིན་སྐྱོང་གི་ལས་སྣེ་ཁག་ཏུ་བུད་མེད་ཀྱི་མཉམ་ཞུགས་ཚད་མཐོར་གཏོང་བར་འབད་རྩོལ་བྱེད་དགོས་པའི་ལམ་སྟོན་གནང་བ་མ་ཟད། གཞན་ཡང་རྒྱ་གཞུང་ནས་ཕྱི་བསྐྱོད་ལག་འཁྱེར་བཙན་འཕྲོག་དང་། དོ་བདག་ཕྱི་རྒྱལ་ཁག་ཏུ་འགྲོ་བར་དམ་བསྒྲགས་བྱེད་དོན། མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་ཏུ་འགྲིམས་བཞིན་པའི་ཕྲུ་གུའི་སེམས་ཁམས་འཕྲོད་བསྟེན། གཞུང་གི་རྒྱབ་གཉེར་འོག་མི་རིགས་ཕན་ཚུན་བར་གྱི་གཉེན་སྒྲིག་ལམ་སྲོལ། བུད་མེད་ཀྱི་ཐོབ་ཐང་འཐབ་རྩོད་པའི་གནས་སྟངས་སོགས་ཀྱི་ཐད་འདྲི་རྩད་གནང་མཐར་རྒྱལ་ཚོགས་ཀྱི་ཆེད་མཁས་པ་རྣམས་ཀྱི་དྲི་བ་ཁག་ལ་རྒྱ་ནག་གཞུང་གི་སྐུ་ཚབ་ཚོས་ལན་འདེབས་འཐུས་ཚང་མ་ཐུབ་པར་བརྟེན་ཆེད་མཁས་པ་རྣམས་ཀྱིས་ལན་ཐེབས་མེད་པར་ངོས་འཛིན་ཞུས་ཡོད་པ་བཅས།།
