འཇར་འཁོད་བོད་རིགས་ཚོགས་པའི་ལོ་འཁོར་ཚོགས་ཆེན་བསྐོང་ཚོགས་གནང་བ།

གསར་ལས་ཁང་གི་གསར་འགོད་པས།

༢༠༢༣-༠༥-༢༩

༄༅། །འདི་གར་སུད་སི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། འདི་ལོའི་འཇར་འཁོད་བོད་རིགས་ཚོགས་པའི་ཚོགས་ཆེན་དེ་བཞིན་ཕྱི་ལོ་ ༢༠༢༣ ཟླ་བ་ ༥ ཚེས་ ༢༨ རེས་གཟའ་ཉི་མ་ཉིན་འཇར་མ་ནི་གྲོང་ཁྱེར་ཀོལན་ (Koln) ནང་བསྐོང་ཚོགས་གནང་ཡོད།

དེ་ཡང་ཐེངས་འདིའི་ལོ་འཁོར་ཚོགས་ཆེན་གི་སྐུ་མགྲོན་དུ་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། འབྲེལ་ལས་བསྟན་འཛིན་ཆོས་བཟང་ལགས། འཇར་འཁོད་བོད་རིགས་ཚོགས་པའི་ཚོགས་གཙོ་བསྟན་འཛིན་ཡེ་ཤེས་ལགས་དང་། བྱང་ཕྱོགས་ས་གནས་ཚོགས་ཆུང་ཆོགས་གཙོ། ནུབ་བྱང་ས་གནས་ཚོགས་ཆུང་གི་ཚོགས་གཙོ། སྦེར་ལིན་ས་གནས་ཚོགས་ཆུང་གི་ཚོགས་གཙོ། Baden Wuettermberg ས་གནས་ཚོགས་ཆུང་གི་ཚོགས་གཙོ། མུན་ཆེན་ས་གནས་ཚོགས་ཆུང་གི་ཚོགས་གཙོ་གཙོས་པའི་རྒྱུན་ལས་རྣམ་པ། དེ་བཞིན་ས་གནས་མང་ཚོགས་བཅས་མཉམ་ཞུགས་གནང་ཡོད།

སྐབས་དེར་སྐུ་ཚབས་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་འཇར་འཁོད་བོད་རིགས་ཚོགས་པའི་བྱེད་སྒོ་སྤྱི་དང། ལྷག་དོན་དུ་ས་གནས་སུ་བོད་མི་རིགས་ཀྱི་ངོ་བོ་མི་ཉམས་རྒྱུན་འཛིན་སླད་ཐུགས་འཁུར་ཆེ་བཞེས་ཀྱིས་བོད་སྤྱི་པའི་རྩ་དོན་ཐོག་ཕྱག་ལས་གནང་མཁན་རྣམས་པར་བསྔགས་བརྗོད་དང་སྦྲགས། མ་འོངས་པར་ས་གནས་ཀྱི་ལས་དོན་ཚགས་ཚུད་ཡོང་སླད་ཚང་མས་ནུས་པ་མཉམ་སྤུངས་གནང་གལ་ཡིན་པ་སོགས་ཀྱི་གསུང་བཤང་གནང་བ་མ་ཟད། དེ་བཞིན་ས་གནས་མི་མང་གི་དོགས་འདྲི་ཁག་ལ་ལན་འདེབས་གསལ་བཤད་གནང་ཡོད་པ་རེད།

གཞན་ཡང་འཇར་འཁོད་བོད་རིགས་ཚོགས་པའི་ཚོགས་གཙོ་བསྟན་འཛིན་ཡེ་ཤེས་ལགས་ཀྱིས་ཕྱི་ལོ་ ༢༠༢༢ ལོའི་ལས་བསྡོམས་སྙན་སྒྲོན་དང་། ཚོགས་པའི་དངུལ་གཉེར་ནས་རྩིས་ཞིབ་ཟིན་པའི་རྩིས་ཁྲ་ཞིབ་ཕྲ་མི་མང་ལ་སྤྱན་འབུལ་དང་། མ་འོངས་ཚོགས་པའི་ལས་དོན་བྱེད་ཕྱོགས་དང་འབྲེལ་ས་གནས་མི་མང་ལྷན་གོ་བསྡུར་ལྷུག་པོ་གནང་བའི་ཐོག་ཚོགས་ཆེན་རྒྱལ་ཁའི་ངང་མཇུག་སྒྲིལ་གནང་ཡོད་པ་བཅས། །