༄༅། །འདི་གར་སུད་སི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། སུད་སི་དང་ལིག་ཏེན་སིཊཡན་བོད་རིགས་མི་མང་སྒྲིག་འཛུགས་ཀྱི་གོ་སྒྲིག་འོག་མ་ཧཱ་གུ་རུའི་འབུམ་ཚོགས་ཐེངས་བརྒྱད་པ་དེ་བཞིན་འཁོན་རིགས་བསྟན་པའི་མངའ་བདག་དཔལ་ས་སྐྱ་ཁྲི་འཛིན ༤༣ ཛྙ་ན་བཛྲ་རིན་པོ་ཆེ་མཆོག་དབུ་བཞུགས་ཐོག་ཕྱི་ལོ ༢༠༢༣ ཟླ་བ་ ༥ ཚེས་ ༡༨ ཉིན་གྲོང་ཁྱེར་ཧོར་གྷན་ནང་ཚོགས་གནང་ཡོད།དེ་ཡང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རིས་མེད་བོད་ཀྱི་བླ་ཆེན་རྣམས་ཀྱི་སྐུ་ཚེ་ཡུན་རིང་བརྟན་ཞིང་། བསྟན་དང་འགྲོ་བའི་དོན་དུ་རླབས་ཆེན་གྱི་མཛད་འཕྲིན་མཐའ་དག་བགེགས་མེད་ལྷུན་གྱིས་འགྲུབ་པ་དང་། བོད་མིའི་སྤྱི་མཐུན་བསོད་ནམས་གོང་འཕེལ་ཆེད་མཧཱ་གུ་རུ་འབུམ་ཚོགས་ལོ་ལྟར་གོ་སྒྲིག་གནང་བཞིན་ཡོད། སྐབས་དེར་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་མཉམ་ཞུགས་གནང་ཡོད། མ་ཧཱ་གུ་རུ་འབུམ་ཚོགས་དེ་བཞིན་ཕྱི་ལོ་ ༢༠༢༣ ཟླ་ ༥ ཚེས་ ༢༠ ཉིན་མཇུག་བསྒྲིལ་གནང་གི་ཡོད་པ་བཅས། །