༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༠༨ ཉིན་མཉམ་འབྲེལ་རྒྱལ་ཚོགས་ཀྱི་མི་རིགས་དབྱེན་འབྱེད་འགོག་ཐབས་ཀྱི་ཚོགས་ཐུན་ ༨༥ པའི་སྐབས་སུད་སི་སྐུ་ཚབ་དོན་ཁང་དང་བོད་ཀྱི་བུད་མེད་ལྷན་ཚོགས་ཟུང་སྦྲེལ་གྱིས་བསྒྲགས་གཏམ་སྒྲོགས་སྦྱང་གནང་ཡོད།
དེ་ཡང་རྒྱ་ནག་གཞུང་གིས་བུད་མེད་ལ་དམིགས་པའི་དབྱེན་འབྱེད་འགོག་ཐབས་ཀྱི་ཁྲིམས་ཡིག་ལག་བསྟར་ཚུལ་བཞིན་བྱེད་མིན་ཐད་རྒྱལ་ཚོགས་ཀྱི་ཆེད་མཁས་པ་ཉི་ཤུ་རྩ་གསུམ་ནས་ཕྱི་ལོ་ ༢༠༢༣ ཟླ་བ་ ༠༥ ཚེས་ ༡༢ བར་དུ་ཞིབ་འཇུག་གནང་གི་ཡོད་པ་རེད།
ཚོགས་ཐུན་སྐབས་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་བཅས་མཉམ་ཞུགས་ཀྱིས་རྒྱལ་ཚོགས་ཀྱི་འབྲེལ་ཡོད་མི་སྣར་མཇལ་འཕྲད་གནང་བ་མ་ཟད། བོད་ནང་བོད་ཀྱི་བུད་མེད་ཀྱི་གནས་སྟངས་སྐོར་སྙན་སེང་ཞུས་ཡོད། དེ་ཡང་སྐར་མ་གཉིས་རིང་གི་དུས་ཡུན་ནང་སྐལ་ལྡན་མཚོ་མོ་ལགས་ཀྱིས་རྒྱ་ནག་གཞུང་གི་མི་རིགས་དབྱེན་འབྱེད་རང་བཞིན་ཅན་གྱི་སྲིད་བྱུས་དང་། དེ་ལ་བརྟེན་ནས་བོད་ཀྱི་བུད་མེད་རྣམས་ལ་དོ་ཕོག་འགྲོ་ཉེན་ཇི་ཡོད་སྐོར་དང་། རྒྱ་ནག་གཞུང་གིས་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་ཁག་བརྒྱུད་བོད་ཀྱི་ཆོས་དང་རིག་གཞུང་རྒྱ་ནག་ཅན་དུ་སིམ་ཡལ་གཏོང་གི་ཡོད་པ་མ་ཟད། གཏན་འཇགས་སློབ་གྲྭ་དེ་དག་ཏུ་བུད་མེད་རྣམས་ལ་སྣང་ཆུང་ཁྱད་གསོད་དང་བཙན་གཡེམ་སོགས་གཏོང་གི་ཡོད་སྐོར་ངོ་སྤྲོད་གནང་ཡོད།
ཕྱོགས་མཚུངས་ཁོང་མོས་རྒྱ་གཞུང་གིས་༸ཀུན་གཟིགས་པཎ་ཆེན་རིན་པོ་ཆེ་དང་ཁོང་གི་ཡུམ་གཙོས་པའི་སྐུ་འཁོར་ནང་མི་གར་སོང་ཆ་མེད་དུ་བཏང་ཚུལ་དང་། ཡ་ཆེན་སྒར་ནས་བཙུན་མ་རྣམས་བཙན་པོས་གནས་དབྱུང་གཏོང་བཞིན་པའི་སྐོར། དེ་བཞིན་ཕྱི་ལོ་ ༢༠༠༩ ནས་བཟུང་བོད་ཀྱི་བུད་མེད་ཐེ་བའི་བོད་མི་ ༡༥༧ ལྷག་གིས་བོད་ཀྱི་བདེན་པའི་འཐབ་རྩོད་ཆེད་རང་ལུས་མེར་སྲེག་བཏང་ཡོད་སྐོར་སྙན་སེང་ཞུས་ཡོད་པ་རེད།
མཐར་ཁོང་གིས་རྒྱལ་ཚོགས་ཀྱི་ཚོགས་མི་རྣམས་ནས་བོད་ཀྱི་བུད་མེད་ཐེ་བའི་བོད་མི་རྣམས་ལ་དྲག་གནོན་དབྱེན་འབྱེད་མཚམས་འཇོག་དང་། བོད་མི་རྣམས་ལ་རང་གི་ཆོས་དང་རིག་གཞུང་སྐད་ཡིག་བཅས་སྦྱོང་སྤྱོད་ཐོབ་ཐང་འཐོབ་རྒྱུའི་ཆེད་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུས་ཡོད།
སྤྱིར་རྒྱ་ནག་གཞུང་གིས་ཕྱི་ལོ་ ༡༩༨༠ ལོར་བུད་མེད་ལ་དམིགས་པའི་དབྱེན་འབྱེད་འགོག་ཐབས་ཀྱི་ཁྲིམས་ཡིག་ལ་མིང་རྟགས་བཀོད་ཅིང་། ཕྱི་ལོ་ ༢༠༡༤ ལོར་རྒྱལ་ཚོགས་ཀྱིས་རྒྱ་ནག་གིས་ཁྲིམས་ཡིག་དགོངས་དོན་ལག་བསྟར་བྱེད་མིན་ཞིབ་འཇུག་གནང་ཡོད། འདི་ལོར་ཚོགས་བཞིན་པའི་མི་རིགས་དབྱེན་འབྱེད་འགོག་ཐབས་ཀྱི་ཚོགས་ཐུན་ཐེངས་ ༨༥ པ་དེ་བཞིན་ཕྱི་ཟླ་ ༠༥ ཚེས་ ༠༨ ཉིན་དབུ་འཛུགས་ཀྱིས་ཕྱི་ཚེས་ ༢༦ ཉིན་མཇུག་སྒྲིལ་གྱི་ཡོད་པ་དང་། བོད་མིའི་སྐུ་ཚབ་ནས་རྒྱ་ནག་དང་འབྲེལ་བའི་ཚོགས་ཐུན་སྐབས་མཉམ་ཞུགས་གནང་གི་ཡོད་པ་བཅས།།
