༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་གི་བོད་རིགས་འབྲེལ་མཐུད་པས་བཏང་གནས་ནང་འཁོད་དོན། ཁེ་ན་ཌ་བྷི་སི་ (British Columbia, Canada) ས་གནས་གྲོས་ཚོགས་ནས་ཕྱི་ལོ་ ༢༠༢༣ ཟླ་བ་ ༥ ཚེས་ ༣ ལྷག་དཀར་ཉིན་མོར།  ལོ་ལྟར་གྱི་ཕྱི་ཟླ་ ༥ པའི་གཟའ་ཉི་མ་དང་པོ་དེ།  བྷི་སི་ནང་པའི་རིག་གཞུང་ཉིན་མོའམ།  བྷི་སི་སྟོན་པའི་དུས་ཆེན་ (BC Buddha Day) དུ་ངོས་འཛིན་གསལ་བསྒྲགས་གནང་གཏན་འཁེལ་ཡོད།  

དེ་ཡང་།  ཁེ་ན་ཌ་བྷི་སི་མངའ་སྡེ་ནང་ཡོད་པའི་གླིང་ཕྲན་བོད་རིགས་སྤྱི་མཐུན་ཚོགས་པའི་ (Tibetan Cultural Society of Vancouver Island) ཚོགས་གཙོ་པདྨ་དབང་ཆེན་ལགས་ནས་  “ བྷི་སི་ས་གནས་གྲོས་ཚོགས་ཀྱིས་ཟླ་བ་ ༥ ཚེས་ ༣ ལྷག་དཀར་ཉིན་མོར།  ལོ་ལྟར་གྱི་ཕྱི་ཟླ་ ༥ པའི་གཟའ་ཉི་མ་དང་པོ་དེ།  བྷི་སི་ནང་པའི་རིག་གཞུང་ཉིན་མོའམ། བྷི་སི་སྟོན་པའི་དུས་ཆེན་དུ་ངོས་འཛིན་སྲུང་བརྩི་ཞུ་རྒྱུའི་གསལ་བསྒྲགས་གནང་རྒྱུ་གཏན་འཁེལ་ཞིང་།  ཉིན་མོ་འདི་དང་བསྟུན་ནས།  བྷི་སི་གྲོས་ཚོགས་དང་ས་གནས་ནང་པའི་མཐུན་ཚོགས་མཉམ་འབྲེལ་གྱིས་ནང་པའི་དུས་སྟོན་གྱི་རྟེན་འབྲེལ་མཛད་སྒོ་ཟབ་རྒྱས་ཤིག་བྷི་སི་གྲོས་ཚོགས་ཀྱི་ཚོགས་ཁང་ནང་ཚོགས་གཏན་འཁེལ་ཡོད། ”  ཅེས་གསུང་གི་འདུག   

པདྨ་དབང་ཆེན་ལགས་ཀྱིས་འགྲེལ་བརྗོད་གནང་བ་ལྟར་ན།   བྷི་སི་ས་གནས་ནང་པའི་མཐུན་ཚོགས་ནི་ཕྱི་ལོ་ ༢༠༡༥ ལོར་དགའ་བྱང་ཀླུ་འབུམ་མཚན་སྒྲོགས་རིན་པོ་ཆེ་དབུ་བཞུགས་བྱས་པའི་ས་ཕྱོགས་འདྲ་མིན་གྱི་ནང་པ་ཐུན་མོང་ལས་གྲུབ་པའི་ཚོགས་པ་ཞིག་ཡིན།  ཕྱི་ལོ་ ༢༠༡༤ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཝན་ཁུ་ཝ་བྷི་སི་ (Vancouver, BC) ཁུལ་དུ་ཆིབས་སྒྱུར་བསྐྱངས་སྐབས།  ཁུལ་དེར་ཡོད་པའི་བོད་མི་ཡོངས་དང་།  སྟོན་པའི་རྗེས་འཇུག་ནང་པ་མང་པོས་མཉམ་གཅིག་ཏུ་༧གོང་ས་མཆོག་ལ་ཕེབས་བསུའི་དུས་སྟོན་གཟབ་རྒྱས་གོ་སྒྲིག་ཞུས་ཡོད་པ་བཞིན།  ལོ་དེའི་ཕྱི་ལོ་ནས་མཚན་སྒྲོགས་རིན་པོ་ཆེ་མཆོག་གིས་ནང་པའི་མཐུན་ཚོགས་ཤིག་དབུ་འཛུགས་གནང་ཞིང་།  དེ་ནས་བཟུང་མཐུན་ཚོགས་འདིས།  ནང་པའི་དུས་སྟོན་འཆར་ཅན་དུ་ས་ག་ཟླ་བ་སྲུང་བརྩི་ཞུ་བཞིན་ཡོད་པ་དང་།  རིང་མིན་གསལ་བསྒྲགས་སྐྱོང་གཏན་འཁེལ་བའི་བྷི་སི་ནང་པའི་རིག་གཞུང་ཉིན་མོའམ།  བྷི་སི་སྟོན་པའི་དུས་ཆེན་འདི་ཡང་།  མཚན་སྒྲོགས་རིན་པོ་ཆེས་དབུས་པའི་ནང་པའི་མཐུན་ཚོགས་ཀྱིས་ལོ་མང་མཉམ་ལས་གནང་བའི་གྲུབ་འབྲས་ཤིག་རེད་འདུག    

པདྨ་དབང་ཆེན་ལགས་ཀྱིས།  “ བྷི་སི་གྲོས་ཚོགས་ནས་ཟླ་བ་ ༥ ཚེས་ ༣ ལྷག་དཀར་ཉིན་མོར།  ལོ་ལྟར་གྱི་ཕྱི་ཟླ་ ༥ པའི་གཟའ་ཉི་མ་དང་པོ་དེ།  བྷི་སི་ནང་པའི་རིག་གཞུང་ཉིན་མོའམ།  བྷི་སི་སྟོན་པའི་དུས་ཆེན་དུ་ངོས་འཛིན་གསལ་བསྒྲགས་གནང་གཏན་འཁེལ་བ་ནི། ནང་ཆོས་ཀྱིས་དེང་རབས་ཀྱི་སྤྱི་ཚོགས་ལ་ཁ་ཡོད་ལག་ཡོད་ཀྱི་ཕན་བདེ་སྐྲུན་བཞིན་པར་ངོས་འཛིན་ཐོབ་པ་ཞིག་དང་།  རིག་གཞུང་སྣ་མང་དང་།  ཆོས་ལུགས་འདྲ་མིན་འཆམ་མཐུན་མཉམ་གནས་ཡོང་རྒྱུར་སྐུལ་མ་བྱས་པ་ཞིག་ཀྱང་ཡིན།  བྷི་སི་གྲོས་ཚོགས་ཀྱི་ཚོགས་ཁང་ནང་ནང་པའི་དུས་སྟོན་གྱི་རྟེན་འབྲེལ་མཛད་སྒོ་གཟབ་རྒྱས་ཚོགས་གཏན་འཁེལ་ཡོད་པ་དེར།  ཆོས་ལུགས་འདྲ་མིན་གྱི་མི་སྣ་གལ་ཆེན་ཁག་ཅིག་གདན་ཞུ་བྱས་ཡོད་པ་རེད། ”  ཅེས་འགྲེལ་བརྗོད་གནང་བྱུང་། 

ཕྱི་ལོ་ ༢༠༢༣ ལོར་བྷི་སི་ས་གནས་གཞུང་གིས་ནང་པའི་རིག་གཞུང་གི་ཉིན་མོ་ཞིག་ཡོངས་ཁྱབ་གསལ་བསྒྲགས་བསྐྱངས་པ་དང་།   འདི་ལོའི་ཟླ་བ་ ༢ པའི་ནང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཝན་ཁུ་ཝ་བྷི་སི་ཁུལ་དུ་འཚམས་གཟིགས་གནང་སྐབས་གྲོས་ཚོགས་ཀྱི་འཐུས་མིས་སྣེ་ལེན་གནང་ཡོད་པར།  ས་གནས་རྒྱ་ནག་གཞུང་ཚབ་ཀྱིས་ཚགས་ཤོག་ཐོག་ངོ་རྒོལ་གྱི་རྣམ་འགྱུར་བསྟན་ཡོད་ཀྱང་།  གྲོས་ཚོགས་ཀྱི་ངོས་ནས་ཕྱི་ལོག་གི་གནོན་ཤུགས་གང་རུང་གིས་གྲོས་ཚོགས་ཀྱི་ཐག་གཅོད་འགྱུར་བ་གཏོང་རྒྱུ་མིན་པའི་བརྡ་ལན་གནང་ཡོད་པ་བཅས།།