༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།   བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་དང་།  བོད་རིགས་འབྲེལ་མཐུད་པ་དྲུང་ཟུར་ཀུན་དཀའ་བཀྲ་ཤིས་ལགས་ཀྱིས་ཉེ་ཆར་ཟླ་བ་ལྔ་པའི་ནང་ཨ་རིའི་མངའ་སྡེ་མི་མི་ནི་སོ་ཊར་ཉིན་བཞིའི་རིང་གཞུང་འབྲེལ་འཚམས་གཟིགས་གནང་ཡོད།  

ཁོང་གཉིས་ཀྱིས་མི་ནི་སོ་ཊ་བོད་རིགས་སྤྱི་མཐུན་ཚོགས་པའི་གཟའ་མཇུག་སློབ་གྲྭར་ (མི་ནི་སོ་ཊ་བོད་ཀྱི་རིག་གཞུང་སློབ་གྲྭ) གཟིགས་སྐོར་གནང་སྐབས།  སློབ་སྤྱི་པ་སངས་ནོར་བུ་ལགས་ཀྱིས་ལས་བསྡོམས་སྙིང་བསྡུས་སྙན་སེང་ཞུས་པ་གསན་རྗེས།  དེར་བསྡུས་དགེ་ལས་སློབ་ཕྲུག་ཕ་མ་བཅས་ལ་གཟའ་མཇུག་སློབ་གྲྭའི་གལ་ཆེའི་རང་བཞིན་ནན་བརྗོད་གནང་བ་ཕུད།  སློབ་སྤྱིས་གཙོས་དགེ་རྒན་རྣམས་ཀྱི་ལྷག་བསམ་ལ་བསྔགས་བརྗོད་གནང་བ་མ་ཟད།  ཡུལ་དུས་གནས་བབ་དང་ཆ་རྐྱེན་དབང་གིས་དཀའ་ངལ་སྣ་ཚོགས་ཡོད་ཀྱང་།  དཀའ་ངལ་ལ་གདོང་ལེན་གྱིས་མུ་མཐུད་ཧུར་བསྐྱེད་ཐོག  དགེ་རྒན་དང་ཕ་མ་གཉིས་ཀའི་ངོས་ནས་མཉམ་རུབ་འགན་ཁུར་དགོས་པའི་འབོད་སྐུལ་གནང་།  སྤྲོ་སྣང་གིས་ཁེངས་ཤིང་བཅོས་མིན་གྱི་གཤིས་ཀ་ལྡན་པའི་སློབ་ཕྲུག་ ༡༥༠ ལྷག་ཙམ་ལ་སྐུ་ཚབ་དོན་གཅོད་ཀྱིས་སེམས་ཐག་ཉེ་པོའི་ངང་གླེང་མོལ་གནང་ཡོད།

ས་གནས་མང་ཚོགས་མཇལ་འཕྲད་ཀྱི་མཛད་སྒོར་སྤྱི་མཐུན་ཚོགས་པའི་ཚོགས་གཙོ་ངག་དབང་སྒྲོལ་དཀར་ལགས་ཀྱིས་ལས་བསྡོམས་སྙིང་བསྡུས་སྙན་སེང་ཞུས་པ་གསན་རྗེས།  སྐུ་ཚབ་དོན་གཅོད་ཀྱིས་དོན་གཅོད་ལས་ཁུངས་ཀྱི་ཁྱོན་ཡོངས་ཀྱི་ལས་དོན་བྱེད་ཕྱོགས་མང་ཚོགས་ལ་ངོ་སྤྲོད་གནང་བའི་ནང་།  དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་སྔ་རྗེས་སུ་ཨ་རིར་ཕེབས་པ་དང་།  དེའི་རྗེས་ཀྱི་ལས་དོན་རྣམས་དོན་གཅོད་ལས་ཁུངས་ནས་མཇུག་སྐྱོང་ཞུས་པའི་གྲུབ་འབྲས་སྐོར་དང་།   

རྒྱུན་དུ་ཨ་རི་གཞུང་དང་གྲོས་ཚོགས་ལ་འབྲེལ་བ་གནང་སྟངས།  བོད་དོན་ཞུ་གཏུག་ལས་འགུལ་དང་དེའི་མཇུག་སྐྱོང་ལས་དོན།  བོད་དོན་ཁྲིམས་འཆར་ལ་གྲོས་ཚོགས་འཐུས་མིའི་རྒྱབ་སྐྱོར་ཐོབ་ཐབས་སུ་ས་གནས་ནས་ཤུགས་སྣོན་དགོས་གལ་སྐོར།  གཟའ་མཇུག་སློབ་གྲྭར་གཟིགས་སྐོར་གནང་བའི་མཐོང་ཚུལ་ཇི་བྱུང་བཅས་ཀྱི་སྐོར་གསུང་།  དྲི་བ་རེ་ཟུང་དྲིས་པ་རྣམས་ལ་ལན་འདེབས་གསལ་བཤད་གནང་།  མཛད་སྒོར་གཟའ་མཇུག་སློབ་གྲྭའི་སློབ་ཕྲུག་རྒན་པ་རྣམས་ཀྱིས་རིག་གཞུང་འཁྲབ་སྟོན་གནང་ཞིང་།  སློབ་ཕྲུག་ཚོའི་འཁྲབ་རྩལ་ལ་མཛད་སྒོར་ཕེབས་མཁན་ཚང་མའི་ལེགས་གསོའི་དགའ་བསུ་ཐོབ།  

ཁོང་གཉིས་ཀྱིས་ད་དུང་།  དབུ་མའི་ལམ་གྱི་གཞོན་ནུའི་མཐུན་ཚོགས་དབུ་བརྙེས་པའི་མཛད་སྒོར་ཕེབས་ཏེ།  དབུ་མའི་ལམ་གྱི་གཞོན་ནུའི་མཐུན་ཚོགས་ཀྱི་གལ་ཆེའི་རང་བཞིན་སྐོར་དང་།  དེ་བཞིན་གཞོན་སྐྱེས་མི་རབས་ནི་མ་འོངས་བོད་ཀྱི་བདག་པོ་ཡིན་པར་བརྟེན།  ད་ལྟ་ནས་སྤྱི་པའི་ལས་དོན་ནང་ཆ་ཤས་ལེན་དགོས་པ་དང་།  སྤྱི་པའི་ལས་དོན་ཞིག་ཡིན་ཕྱིན་ཚོགས་པ་སུས་གོ་སྒྲིག་བྱས་ཀྱང་ཕན་ཚུན་མཉམ་ཞུགས་དགོས་གལ།  ཕ་མ་སོ་སོའི་ངོས་ནས་དུས་རྒྱུན་དུ་གཞོན་སྐྱེས་རྣམས་ལ་མིག་དཔེ་ཡག་པོ་སྟོན་དགོས་པའི་སྐོར་མཛད་སྒོར་ཕེབས་མཁན་རྣམས་ལ་དྲན་སྐུལ་གནང་། 

བར་ལམ་ནས་ལྷག་བསམ་ཅན་རེ་ཟུང་གིས་མི་ནི་སོ་ཊའི་ནང་བོད་གྲོང་འཛུགས་སྐྲུན་ (གཞིས་ཆགས་ལས་གཞི།) གྱི་ལས་གཞི་ཞིག་དང་།  དམིགས་བསལ་སློབ་གྲྭ་ (Charter school) འཛུགས་རྒྱུའི་ལས་གཞི་ཞིག་ལ་དོ་ཁུར་གནང་བཞིན་ཡོད་པ་དང་།  འཆར་གཞི་དེ་གཉིས་ཀྱི་སྐོར་འབྲེལ་ཡོད་ཚོས་དེ་སྔ་དཔལ་ལྡན་སྲིད་སྐྱོང་མཆོག་མཇལ་བའི་སྐབས་སྙན་སེང་ཞུས་ཡོད།  སྐུ་ཚབ་དོན་གཅོད་ཀྱིས་ས་གནས་བོད་རིགས་སྤྱི་མཐུན་ཚོགས་པའི་འོག་ལ་ཡོད་པའི་ “བོད་གྲོང་འཛུགས་སྐྲུན་ལས་གཞིའི་ཚོགས་ཆུང་། ” དང་།  དེ་བཞིན་ “དམིགས་བསལ་སློབ་གྲྭ་འཛུགས་རྒྱུའི་ལས་འཆར།” ལ་དོ་ཁུར་གནང་མཁན་གྱི་འབྲེལ་ཡོད་མི་སྣ་དང་ཐུག་འཕྲད་གནང་སྟེ།  ཁོང་ཚོའི་འཆར་གཞི་སྙན་སེང་ཞུས་པ་ཞིབ་ཕྲ་གསན་པ་དང་།  དོགས་འདྲི་ཁག་བཀའ་འདྲི་ཞུས་པ་མ་ཟད།  བོད་གྲོང་འཛུགས་སྐྲུན་གྱི་དམིགས་སྒོའི་ས་ཆར་གཟིགས་ཞིབ་ཡང་གནང་།

སྐུ་ཚབ་དོན་གཅོད་ཀྱིས་ལས་འཆར་དེ་གཉིས་ཀའི་ཕུགས་དམིགས་ལ་བསྔགས་བརྗོད་རྒྱབ་སྐྱོར་གནང་།  ད་ལྟའི་ཆར་ལས་འཆར་དེ་གཉིས་གཞི་ནས་ཡིན་ཀྱང་།  རིམ་བཞིན་གོམ་པ་མདུན་སྤོས་ཀྱིས་དངོས་གཞིའི་ལག་བསྟར་བྱེད་སྐབས་ཁྲིམས་མཐུན་དགོས་རྒྱུ་གལ་ཆེ་ཡིན་པ་དང་།  ས་གནས་མང་ཚོགས་ཀྱིས་མཉམ་ཞུགས་དང་རྒྱབ་སྐྱོར་གང་འདྲ་ཡོད་མེད་བལྟ་རྒྱུ་ཡང་གལ་ཆེན་པོ་ཡིན་པའི་ལམ་སྟོན་གནང་། 

 མི་ནི་སོ་ཊ་ནི་ཨ་རིའི་ནང་བོད་མི་མང་ཤོས་ཨང་གཉིས་པའི་ས་ཁུལ་ཡིན་པ་དང་།  སྐུ་ཚབ་དོན་གཅོད་དང་བོད་རིགས་འབྲེལ་མཐུད་པས་ལས་འགན་བླངས་རྗེས།  ས་གནས་སུ་གཞུང་འབྲེལ་འཚམས་གཟིགས་གནང་བ་ད་རེས་ཐེངས་དང་པོ་ཡིན་ཞིང་།  ཁོང་གཉིས་ཀྱིས་འཚམས་གཟིགས་ཀྱི་གོ་སྐབས་དང་བསྟུན་ནས་དཔལ་ལྡན་རྒྱུད་སྟོད་གྲྭ་ཚང་དུ་མི་ནི་སོ་ཊར་ཡོད་པའི་གྲུབ་མཐའ་རིས་མེད་ཀྱི་ཆོས་ཚོགས་ཁག་གི་སྐུ་ཚབ་རྣམས་དང་ལྷན་དུ་མཇལ་མོལ་གནང་ཡོད།  ཐེངས་འདིའི་ཉིན་གྲངས་བཞིའི་མཛད་རིམ་ཆ་ཚང་གྲ་སྒྲིག་གནང་མཁན་མི་ནི་སོ་ཊ་བོད་རིགས་སྤྱི་མཐུན་ཚོགས་པ་ཡིན་པ་བཅས།།