༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཕྱི་ལོ་ ༢༠༢༣ ཟླ་བ་ ༥ ཚེས་ ༡༡ ནས་འགོ་བཙུགས་ཀྱིས་ཕྱི་ཚེས་ ༡༧ བར་སྦེང་ལོར་དང་མེ་སོར་གྲོང་ཁྱེར་དུ་མཐོ་རིམ་སློབ་གྲྭར་འགྲིམ་བཞིན་པའི་བོད་པའི་སློབ་མ་དང་། དེ་བཞིན་སྦེལ་ཀོབ་བོད་ཕྲུག་ཁྱིམ་སྡེ་སློབ་གྲྭའི་འཛིན་རིམ་བཅུ་གཅིག་པའི་སློབ་ཕྲུག་དང་སྦེལ་ཀོབ་བོད་མིའི་གཞིས་ཆགས་ཀྱི་མི་མང་བཅས་ལ་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་སྐོར་གོ་རྟོགས་ཀྱི་ལས་གཞི་ཞིག་གོ་སྒྲིག་གནང་གི་ཡོད།
དེ་ཡང་ཕྱི་ལོ་ ༢༠༢༣ ཟླ་བ་ ༥ ཚེས་ ༡༧ ཉིན་ཕྱོགས་བཞུགས་བོད་མི་མང་སྤྱི་འཐུས་མི་འགྱུར་རྡོ་རྗེ་ལགས་ཀྱིས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་རྟེན་གཞི་བྱས་པའི་༸ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་དགེ་ལས་སློབ་ཕྲུག་རྣམས་ལ་དབུ་མའི་ལམ་གྱི་སྲིད་བྱུས་ཀྱི་ངོ་བོ་དང་བྱུང་རིམ། སྲིད་བྱུས་དེ་བཞིན་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་དང་། བོད་རྒྱའི་དཀའ་རྙོག་སེལ་ཐབས་སུ་བོད་མིའི་སྒྲིག་འཛུགས་དང་བོད་རྒྱ་ཆེའི་མང་ཚོགས་ཀྱིས་བགྲོ་གླེང་དང་གོ་བསྡུར་སྦྱང་བཤད་རིམ་པ་གནང་རྗེས་མང་གཙོའི་བརྒྱུད་རིམ་གྱི་སྒོ་ནས་གཏན་ན་ཕབ་པའི་སྒྲིག་འཛུགས་ཀྱི་སྲིད་བྱུས་ཤིག་ཡིན་པ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༨༧ ལོར་ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་ཐོག་ཞི་བའི་དོན་ཚན་ལྔ་གསལ་བསྒྲགས་དང་། དབུ་མའི་ལམ་གྱི་སྲིད་བྱུས་ལ་བརྟེན་ནས་རྒྱ་ནག་གཞུང་དང་མཉམ་དུ་གང་མགྱོགས་གྲོས་མོལ་འགོ་འཛུགས་དགོས་པའི་གྲོས་འགོ་བཏོན་གནང་མཛད་པ་པ་མ་ཟད། ཕྱི་ལོ་ ༡༩༨༨ ལོར་ཞི་བའི་དོན་ཚན་ལྔའི་ནང་དོན་རྒྱས་བཤད་ཀྱི་ཚུལ་དུ་སི་ཏྲས་སྦག་ཏུ་གྲོས་འཆར་གསལ་བསྒྲགས་བསྐྱངས་གནང་མཛད་པ་སོགས་ཀྱི་སྐོར་གསུངས་རྗེས་སློབ་མ་རྣམས་ཀྱི་དྲི་བ་ཁག་ལ་ལན་འདེབས་གནང་ཡོད།
དེ་རྗེས་ཕྱི་དྲིལ་ལས་ཁུངས་ཀྱི་ཞུ་གཏུག་ཚན་པའི་འབྲེལ་ཡོད་ལས་བྱེད་བསྟན་འཛིན་ཀུན་མཁྱེན་ལགས་དང་རིན་ཆེན་ལགས་ཀྱིས་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་གནང་ཡོད་པ་བཅས།།
