༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།   ཨ་རིའི་མངའ་སྡེ་མལ་སི་ཆུ་སིའི་ (Massachusetts) གཞུང་འབྲེལ་མཛད་སྒོ་ཞིག་ལ་ཁུལ་དེའི་བོད་མིའི་སྐུ་ཚབ་མགྲོན་འབོད་གནང་འདུགདེ་ཡང་སྦོ་སི་ཊོན་བོད་རིགས་སྤྱི་མཐུན་ཚོགས་པས་གནས་ཚུལ་ཕུལ་བར་གཞིགས་ན།  ཉེ་ཆར་ཟླ་བ་ ༥ ཚེས་ ༡༧ ལྷག་དཀར་ཉིན་གྲོང་ཁྱེར་སྦོ་སི་ཊོན་ཏུ་ཆགས་པའི་མངའ་སྡེའི་གྲོས་ཚོགས་ཀྱི་ཁང་ཆེང་ནང་ “ཨེ་ཤ་ཡ་མི་རིགས་ཡིན་པའི་ཨ་རི་བ་དང་།  ཞི་བདེ་རྒྱ་མཚོའི་གླིང་ཕྲན་མི་མང་གི་ཤུལ་རྒྱུན་ཟླ་བ་ (Asian American and Pacific Islander Heritage Month)” ཞེས་པ་སྲུང་བརྩིའི་མཛད་སྒོར་མལ་སི་ཆུ་སི་མངའ་སྡེའི་སྲིད་སྐྱོང་ལྕམ་ (Maura T. Healey) མཆོག་གི་ལས་ཁུངས་ནས་མགྲོན་འབོད་གནང་བ་བཞིན།  བྱང་ཨ་རིའི་སྤྱི་འཐུས་དོན་གྲུབ་ཚེ་རིང་ལགས་དང་།  སྦོ་སི་ཊོན་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཕུན་ཚོགས་ལགས།  མལ་སི་ཆུ་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚུལ་ཁྲིམས་ཀུན་བཟང་ལགས།  ཀུ་རུ་ཀུ་ལ་ཆོས་ཚོགས་ཀྱི་དགེ་བཤེས་ངག་དབང་འཕྲིན་ལས་ལགས་བཅས་ཀྱིས་མལ་སི་ཆུ་སི་མངའ་ཁུལ་གྱི་བོད་མིའི་སྐུ་ཚབ་གྱི་ངོ་བོའི་ཐོག་ནས་མཛད་སྒོར་མཉམ་ཞུགས་གནང་འདུག  མཛད་སྒོ་དེར་མངའ་སྡེའི་སྲིད་སྐྱོང་བགྲེས་གཞོན་དང་།  སྦོ་སི་ཊོན་གྱི་གྲོང་ཁྱེར་སྤྱི་ཁྱབ་ལྕམ་ (Michelle Wu) ལགས།   མལ་སི་ཆུ་སི་མངའ་སྡེའི་གྲོས་ཚོགས་གོང་མའི་འཐུས་མི་ལྕམ་ (Joanne Comerford) ལགས་སོགས་མངའ་སྡེ་དང་།  གྲོང་ཁྱེར།  གྲོས་ཚོགས་བཅས་ཀྱི་གནད་ཡོད་མི་སྣ་མང་པོ་ཕེབས་ཡོད་འདུག  ཨ་རིའི་སྲིད་འཛིན་ཨོ་སྦ་མ་མཆོག་གིས་ཕྱི་ལོ་ ༢༠༠༩ ལོའི་ཟླ་བ་ ༥ ཚེས་ ༡ ཉིན་ཟླ་བ་ལྔ་པ་འདི་བཞིན་ “ཨེ་ཤ་ཡ་མི་རིགས་ཡིན་པའི་ཨ་རི་བ་དང་།  ཞི་བདེ་རྒྱ་མཚོའི་གླིང་ཕྲན་མི་མང་གི་ཤུལ་རྒྱུན་ཟླ་བ།” ཡིན་པར་དངོས་སུ་གསལ་བསྒྲགས་གནང་ཞིང་།  དེའི་དགོས་དམིགས་གཙོ་བོ་ནི།  ཨེ་ཤ་ཡ་མི་རིགས་ཡིན་པའི་ཨ་རི་བ་དང་།  ཞི་བདེ་རྒྱ་མཚོའི་གླིང་ཕྲན་མི་མང་གིས་ཨ་མེ་རི་ཀའི་རྒྱལ་ཁབ་ལ་ལེགས་སྐྱེས་ཕུལ་བར་གཟེངས་བསྟོད་མཚོན་ཆེད་དུ་ཡིན་པ་རེད།  སྦོ་སུ་ཊོན་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཕུན་ཚོགས་ལགས་ཀྱིས་ “ གདན་ཞུས་ལྟར་ང་ཚོ་མཛད་སྒོར་བཅར་སྐབས་མངའ་སྡེའི་སྲིད་སྐྱོང་མཆོག་དང་།  སྦོ་སི་ཊོན་གྲོང་ཁྱེར་སྤྱི་ཁྱབ་པ།  གྲོས་ཚོགས་འཐུས་མི་བཅས་གནད་ཡོད་མི་སྣ་ཁག་ཅིག་དངོས་སུ་ངོ་མཇལ་གྱི་གོ་སྐབས་བྱུང་བ་དམ་འཛིན་གྱིས།  མངའ་སྡེའི་གཞུང་འབྲེལ་མཛད་སྒོར་བོད་མི་མགྲོན་འབོད་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག  མལ་སི་ཆུ་སི་མངའ་སྡེའི་ནང་གི་ཨ་རིའི་མི་སེར་ཡིན་པའི་བོད་མིའི་གནས་སྟངས་རོབ་ཙམ་སྙན་སེང་ཞུ་རྒྱུ་བྱུང་སོང་། ” ཞེས་འགྲེལ་བརྗོད་གནང་བྱུང་བའི་གནས་ཚུལ་མདོར་བསྡུས་སུ།  །