༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༢༢ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་རྒྱ་ནག་གི་གནད་དོན་ཐོག་ཆེད་མཁས་པ་འབུམ་རམས་པ་ཇོ་བིན་ཐོ་མ་སི་ཇེ་ཀོབ་ (Dr Jabin Thomas Jacob) ལགས་ཀྱིས་རྒྱ་ནག་གི་ཕྱི་འབྲེལ་དང་ནང་སྲིད་གནད་དོན་ཐོག་གསུང་བཤད་གནང་ཡོད་པ་རེད།སྐབས་དེར་སྐུ་ཞབས་ཇེ་ཀོབ་ལགས་ཀྱིས་མཧུ་ཙེ་ཏུང་གི་དུས་སྐབས་ནས་འགོ་ཚུགས་པའི་རྒྱ་ནག་གི་འགོ་ཁྲིད་རིམ་བྱུང་སྐབས་ཀྱི་ཕྱི་འབྲེལ་སྲིད་བྱུས་དང་། ནང་སྲིད་ཀྱི་གནས་སྟངས་འཕེལ་རིམ་གཙོ་བོར་གྱུར་པའི་རྒྱ་ནག་གིས་ཁྱིིམ་མཚེས་རྒྱལ་ཁབ་དང་ནུབ་ཕྱོགས་རྒྱལ་ཁབ་དང་འབྲེལ་ལམ་འཛུགས་སྐྲུན་བྱེད་ཕྱོགས། དཔལ་འབྱོར་གུ་ཡངས་ཀྱི་སྲིད་བྱུས་ལ་བརྟེན་ནས་འཛམ་གླིང་སྟེང་གི་སྟོབས་ཆེན་རྒྱལ་ཁབ་ཅིག་ཏུ་འགྱུར་ཚུལ་སོགས་ཀྱི་སྐོར་འགྲེལ་བརྗོད་གནང་ཡོད་པ་མ་ཟད། ལྷག་པར་སྲིད་འཛིན་ཞི་ཅིང་ཕིན་གྱི་སྲིད་དབང་སྐབས་རྒྱ་ནག་གི་ཕྱི་འབྲེལ་སྲིད་བྱུས་དང་། ནང་སྲིད་སྲ་བརྟན་གཏོང་ཐབས་ཀྱི་ཐབས་བྱུས། དེ་བཞིན་རྒྱ་དཀར་ནག་དང་བོད་རྒྱའི་འབྲེལ་ལམ་སོགས་ཀྱི་སྐོར་ངོ་སྤྲོད་དང་ཚོགས་བཅར་བའི་དོགས་དྲི་ཁག་ལ་ལན་འདེབས་གསལ་བཤད་གནང་ཡོད། ཉིན་གྲངས་གཅིག་རིང་གི་གསུང་བཤད་ལས་རིམ་ནང་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། ཕྱི་འབྲེལ་དྲུང་འཕར་བསྟན་འཛིན་ལེགས་བཤད་ལགས། དྲིལ་བསྒྲགས་དྲུང་འཕར་རྣམ་རྒྱལ་ཚེ་དབང་ལགས། ཕྱི་དྲིལ་ལས་ཁུངས་ཀྱི་ལས་བྱེད། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ། བཞུགས་སྒར་ཁུལ་གྱི་གསར་ཁང་ཁག་གི་གསར་འགོད་པ་བཅས་མཉམ་ཞུགས་གནང་ཡོད་པ་བཅས།།