༄༅། །ཕྱི་ལོ་ ༢༠༢༣ ཟླ་བ་ ༠༥ ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་རྒྱ་གར་བྷེང་ལོར་དུ་རྟེན་གཞི་བྱས་པའི་ཝིས་ཝེས་ཝ་ར་པུ་ར་ཁྲིམས་རིག་མཐོ་སློབ་ཏུ་འགྲོ་བ་མིའི་ཐོབ་ཐང་དང་འགྲོ་བ་མིའི་ཐོབ་ཐང་རྡོག་རོལ་བཏང་བའི་ཉེས་དམིགས་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་པ་རེད། དེ་ཡང་གོང་ཚེས་ཉིན་ཝིས་ཝེས་ཝ་ར་པུ་ར་ཁྲིམས་རིག་མཐོ་སློབ་ཀྱི་ (Internal Quality Assurance Cell) ཞེས་པའི་སྡེ་ཚན་དང་ཧིན་བོད་མཛའ་འབྲེལ་ཚོགས་པ་ཟུང་སྦྲེལ་གྱིས་གོ་སྒྲིག་ཞུས་པའི་ཚོགས་འདུའི་ཐོག་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་སྐུ་མགྲོན་གཙོ་བའི་གསུང་བཤད་གནང་སྐབས་བོད་ནང་རྒྱ་ནག་གཞུང་གི་འཆར་གཞི་ལྡན་པའི་དྲག་གནོན་ཅན་གྱི་སྲིད་བྱུས་འོག་བོད་ཀྱི་ཆོས་དང་རིག་གཞུང་གོམས་སྲོལ་སོགས་རྩ་མེད་དུ་འགྲོ་ཉེན་ཆེ་བའི་ཛ་དྲག་གནས་སྟངས་དང་། བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་མཚོན་པའི་གཞུང་འབྲེལ་དབུ་མའི་ལམ་གྱི་སྲིད་བྱུས་སྐོར་ངོ་སྤྲོད་དང་སྦྲགས། དབུ་མའི་ལམ་གྱི་སྲིད་བྱུས་དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་རླབས་ཆེའི་དགོངས་གཞི་ལས་འཁྲུངས་པའི་བོད་རྒྱའི་དཀའ་རྙོག་ཞི་འགྲིག་ཡོང་ཐབས་ཀྱི་གཉིས་སྨན་གྱི་སྲིད་བྱུས་ཤིག་ཡིན་སྐོར་གསལ་བཤད་གནང་ཡོད། ཕྱི་དྲིལ་བཀའ་བློན་མཆོག་གི་གསུང་བཤད་གྲུབ་རྗེས་སྐུ་མགྲོན་གཞན་ཁག་གཅིག་གིས་ཀྱང་བོད་དོན་ཛ་དྲག་གནས་སྟངས་སྐོར་གསུང་བཤད་དང་བོད་དོན་ལ་རྒྱབ་སྐྱོར་མུ་མཐུད་ཞུ་རྒྱུའི་ནན་བརྗོད་གནང་རྗེས་སྐུ་མགྲོན་རྣམས་ལ་དྲན་རྟེན་ཕུལ་ཞིང་། མཐའ་དོན་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲོལ་ཡོད་པ་རེད། ཚོགས་འདུའི་གཙོ་སྐྱོང་ཁྲིམས་རིག་མཐོ་སློབ་ཀྱི་འཛིན་སྐྱོང་ལྷན་ཚོགས་ཀྱི་ཚོགས་གཙོ་སྐུ་ཞབས་ལོ་ཀེཤ་ (B N Lokesh) ལགས་ཀྱིས་གནང་ཞིང་། ཚོགས་འདུར་མཐོ་སློབ་ཀྱི་སློབ་སྤྱི་སུ་དཱ་ (Sudha G) ལགས་དང་། (IQAS) ཞེས་པའི་འབྲེལ་མཐུད་པ་བིཤ་བ་པྲྀ་ཡ་(Vishwapriya C) ལགས་ཀྱིས་གཙོས་པའི་དགེ་སློབ་མཉམ་ཞུགས་གནང་ཡོད། ཕྱི་དྲིལ་བཀའ་བློན་མཆོག་དང་ལྷན་དུ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་བཀྲ་ཤིས་བདེ་སྐྱིད་ལགས། ལྷོ་སྤྱི་ལས་ཁུངས་ཀྱི་ལས་བྱེད་བཅས་ལྷན་བཅར་ཞུས་ཡོད་པ་བཅས།།